14 ناۋرىز - امال مەرەكەسى, كورىسۋ كۇنىندە «بارمىسىڭ باۋىرىم» راديو-حابارىنىڭ ۇجىمى قۋانىشتى جاڭالىقتى حابارلادى, دەپ جازادى Egemen.kz.
«قازاق راديوسىنىڭ» تولقىنىندا 1 اپتا بۇرىن اناسىن ىزدەپ كەلگەن روزا ەسىمدى كەيىپكەردىڭ اتا-اناسى تابىلعانى جاريالاندى.
جۋرناليست قىمبات دوسجان كەيىپكەرمەن تەلەفون ارقىلى تىلدەسىپ, ءسۇيىنشى حاباردى جەتكىزدى.
«كورىسۋ كۇنىندە وزىڭە وسىنداي جاقسى جاڭالىقپەن شىعىپ وتقانىمىزعا ءبىز دە باقىتتىمىز. ءبىر قازاقستان جەرىندەمىز عوي, اتا-اناڭمەن كەزدەسكەننەن كەيىن جاعدايدىڭ قالاي بولعانىن وزدەرى وزىڭە ءتۇسىندىرىپ ايتا جاتار. بىراق ستۋديا تورىندە, بىزگە قوناققا اكەڭنىڭ تۋىسى كەلىپ وتىر», دەدى قىمبات دوسجان تىكەلەي ەفيردە.
ارقالىقتاعى بالالار ۇيىندە تاربيەلەنىپ جاتقان 1 جاسار روزانى باعۇسوۆتار وتباسى قاناتىنىڭ استىنا الادى. سول جولى ول بالالار ۇيىندەگى نۇرلان ەسىمدى ازاماتپەن بىرگە اتالعان وتباسىنىڭ قامقورلىعىنا وتەدى.
ەفير بارىسىندا نۇرلاننىڭ دا اناسى تابىلدى. ايگۇل ەسىمدى كەلىنشەك بەلگيالىقتار اسىراپ العان جاني ساۆەلەۆتى «مەنىڭ بالام بولۋى مۇمكىن» دەپ العاش دنق ءاناليزىن تاپسىرعان كەلىنشەك ەكەنى بەلگىلى بولدى. ءجانيدىڭ اناسىن ىزدەپ كەلۋىنىڭ ارقاسىندا ايگۇل 20 جىل ىزدەگەن بالاسىن تاپتى. ول «بارمىسىڭ باۋىرىم» راديو-حابارىنىڭ تىكەلەي ەفيرىندە بالاسىن پەرزەنتحاناعا تاستاپ كەتۋ سەبەبىن ەگجەي-تەگجەي ءتۇسىندىردى.