كەشەگى كۇنگى جەر سىلكىنىسى كەزىندە اق جەلەڭدى ابزال جانداردىڭ انتىنا ادالدىعى مەن ءوز ىسىنە بەرىكتىگى قىزۋ تالقىلانىپ, وپەراتسيا ۇستەلىندەگى جۇمىستارىن ەش الاڭسىز ءساتتى اياقتاپ شىققاندارىنا جۇرت العىسىن جاۋدىردى.
سونىڭ ءبىرى قوناەۆ قالالىق كوپسالالى اۋرۋحاناسىنىڭ اكۋشەر-گينەكولوگ دارىگەرى راۋشان ابدۋاليەۆا جەر سىلكىنىسى كەزىندە ءتورتىنشى بالاسىن امان-ەسەن دۇنيەگە اكەلۋدى كوزدەگەن اياعى اۋىر ايەلگە كەسار تىلىگىن جاسادى.
«نارەستە مەن ونىڭ جولداسىن قۇرساق قۋىسى مەن جاتىردى كەسۋ ارقىلى شىعارۋ كەزىندە جان-جاعىمىزدىڭ ءدىر ەتە قالعانىن سەزدىك. بۇل جەر سىلكىنىسى ەكەنىن تۇسىندىك. دەگەنمەن انا مەن بالا ءومىرىنىڭ قاۋىپسىزدىگىنىڭ ماڭىزىن ويلاپ, وپەراتسيانى ءساتتى اياقتاۋدى كوزدەدىك. ايەلگە جۇلىن انەستەزياسى بەرىلگەندىكتەن, ول نارەستەسىنىڭ امان-ەسەن دۇنيەگە كەلگەنىن ءتۇسىنىپ, جاقسى سەزىمدە بولدى. مەن ءۇشىن ونىڭ سول كەزدەگى پسيحولوگيالىق تىنىشتىعى بارىنەن دە ماڭىزدى ەدى.
جەر سىلكىنگەنىن سەزبەگەن ايەل ءسابيلى بولعانىنا قاتتى قۋانعان. جۇرتتى ۇرەيلەندىرگەن توتەنشە جاعدايدا دۇنيەگە كەلگەن ۇل بالانىڭ سالماعى – 3 910 گرامم, بويى – 55 سم. انانىڭ دا, جاڭا تۋعان نارەستەنىڭ دە جاعدايى جاقسى. بۇل – دارىگەرلەر ءۇشىن ەڭ ۇلكەن جەتىستىك. وپەراتسيادان شىققاننان كەيىن وتباسىنا قوڭىراۋ شالىپ, ولاردىڭ اماندىعىن بىلگەن دارىگەردىڭ كوڭىلى جايلانعان.
«تىنىشتىق ەموتسيالاردان كۇشتى ەكەنىن العاش اڭعاردىم. بۇعان دەيىن ايەل بوسانعان كەزدە جەر سىلكىنىسى بولاتىنىن ەلەستەتىپ كورمەگەنمىن. بار نازارىمدى قۋانىشتى وقيعاعا اۋدارۋ ۇرەيگە بەرىلمەۋىمە كومەكتەستى. ءتىپتى جاماندىق ويلاۋعا ۋاقىت بولمادى. ءسويتىپ, وپەراتسيامىز ءساتتى اياقتالدى. دەگەنمەن بۇل ءسات ەسىمىزدە ماڭگى ساقتالىپ قالاتىنى ءسوزسىز», دەيدى دارىگەر راۋشان بەكجانقىزى.
جەر ءدۇمپۋى كەزىندە وسى اۋرۋحانانىڭ حيرۋرگ-دارىگەرلەرى تاحير شكۋراليەۆ, ايدوس قيزاتوۆ جانە ايجارىق شەرحان دا 50 جاستاعى ناۋقاسقا وپەراتسيا جاساپ جاتقان ەدى.
ء«بىز نە بولىپ جاتقانىن بىردەن تۇسىندىك, بىراق ەشقايسىمىز ۇرەيلەنبەي, سابىرلى تۇردە وپەراتسيانى جالعاستىردىق. جەر سىلكىنىسىنىڭ كۇشى ودان جوعارى بولسا دا, ءبىز ناۋقاستى جالعىز قالدىرمايتىن ەدىك. ونىڭ ءومىرى مەن دەنساۋلىعى بارىنەن جوعارى. ءبىزدىڭ ەمدەۋ مەكەمەسىندە بىردە-ءبىر دارىگەر ناۋقاسىن تاستاپ كەتپەي, ونىڭ قاۋىپسىزدىگى ءۇشىن جەر سىلكىنىسىنىڭ ىقتيمال زارداپتارىنان قورعاۋعا تىرىسقانىنا سەنىمدىمىن», دەيدى وتاشى-دارىگەر شەرحان مۇرات ۇلى.
ادام ءومىرىنىڭ ساقشىسىنا اينالعان اق جەلەڭدى ابزال جانداردىڭ بىلىكتىلىگىمەن قوسا, مەيىرىمدىلىگىنە تۇرعىندار ءدان ريزا.
الماتى وبلىسى