بيىلعى قاڭتاردا «Aurora Tech Award 2024» جاھاندىق دامۋعا اسەر ەتكەن تەحنولوگيالىق ستارتاپتاردىڭ نەگىزىن قالاۋشىلارعا 30 مىڭ دوللارعا دەيىنگى سىياقى ۇسىندى. وعان 102 ەلدەن 649 ءوتىنىم ءتۇسىپ, جەڭىسكە ۇمىتكەرلەردىڭ قورىتىندى تىزىمىنە 20 كاسىپكەر عانا كىردى. جەڭىسكە جاقىنداعان جيىرمانىڭ ىشىندە ءۇش وتانداسىمىز وزىق تۇر. بۇگىن سول ۇشتىكتىڭ بىرەگەيى اسەم تاجيەۆا نەگىزىن قالاعان «Ozim Platform» تۋرالى اڭگىمەلەمەكپىز.
بۇل الەۋمەتتىك جوبا ەرەكشە بالالارى بار وتباسىلاردى قولداۋعا باعىتتالعان. ۇلكەن زەرتتەۋدىڭ نەگىزىندە جاسالعان پلاتفورما ءبىلىم مەن پسيحولوگيالىق رەسۋرستاردى قامتاماسىز ەتەدى. ول 2021 جىلى «techpreneurs» باعدارلاماسى اياسىندا «Astana Hub»-تا ىسكە قوسىلدى. بۇگىندە قوسىمشانى اتا-انالار عانا ەمەس, ەرەكشە بالالاردى ەرتە دامىتۋ سالاسىنداعى ماماندار مەن پەداگوگتەر پايدالانادى. «Ozim» پلاتفورماسى بۇۇ-نىڭ حالىقارالىق DPG مارتەبەسىنە دە يە بولعان. DPG – قوعامعا ازاماتتاردىڭ ءوسۋى مەن ءال-اۋقاتىنا ىقپال ەتەتىن باعدارلامالىق ونىمدەر ەكەنىن ەسكەرسەك, وتاندىق جوبا ءوز ورنىن ويىپ تۇرىپ تاپقان.
«Ozim» پلاتفورماسىنىڭ نەگىزىن قالاۋشى ءا.تاجيەۆا: «ماعان ەرەكشە انا بولۋ ءۇشىن جاڭا ءبىلىم قاجەت بولدى», دەيدى. ونىڭ سەبەبى – ءوزىنىڭ بالاسىنىڭ دا ەرەكشە قاجەتتىلىگى بار.
«Ozim» پلاتفورماسى ءموبيلدى قوسىمشاسىن قۇرۋ يدەياسى 2020 جىلى پاندەميا كەزىندە ويىما كەلدى. وندا بارلىق وڭالتۋ قىزمەتى مۇمكىندىگى شەكتەۋلى بالالاردى تاربيەلەپ وتىرعان وتباسىلارعا قولجەتىمدى بولمادى. اتا-انالار بالالارىمەن رەابيليتولوگتەر مەن باسقا مامانداردىڭ باسشىلىعىمەن ءوز بەتىنشە جۇمىس ىستەۋگە ءماجبۇر بولدى. الايدا پاندەميا ءار وتباسىندا كومپيۋتەر نەمەسە نوۋتبۋك جوق ەكەنىن, بىراق بارلىعىندا سمارتفون بار ەكەنىن كورسەتتى. وسىنى ەسكەرە وتىرىپ, ماعان سمارتفون قوسىمشاسىن قۇرۋ يدەياسى كەلدى. بۇل باستاما ەلىمىزدىڭ شالعاي وڭىرلەرىندەگى اتا-انالارعا وتە قولايلى بولىپ كورىندى», دەيدى ستارتاپتىڭ نەگىزىن قالاعان ءا.تاجيەۆا.
پلاتفورما قولدانۋشىلارعا نە بەرەدى؟ اتا-انالاردى ونلاين رەجىمدە وقىتىپ, اقپاراتتاندىرادى. تەك تەوريالىق ماتەريالدار عانا ەمەس, سونىمەن قاتار قازاق جانە ورىس تىلدەرىندەگى پراكتيكالىق ساباقتار دا بار. مىسالى, «Ozim Platform» جوبالىق توبى اتا-انالاردىڭ اقپاراتتىق قاجەتتىلىگى تۋرالى زەرتتەۋ جۇرگىزدى. زەرتتەۋ ناتيجەسىندە اتا-انالارعا دياگنوزدار تۋرالى ماڭىزدى اقپاراتتار, بەيىندى مامانداردىڭ ماقالالارى, ءۇي جاعدايىندا بالانى وڭالتۋ تۋرالى ساباقتار جانە پسيحولوگتەر مەن زاڭگەرلەردىڭ كەڭەسى قاجەت ەكەنىن انىقتالعان. سولاي «Android» جانە «IOS» نەگىزىندە ىسكە قوسىلاتىن ەرەكشە ءموبيلدى قوسىمشا حالىققا ۇسىنىلدى.
«ەرەكشە بالالاردى تاربيەلەپ وتىرعان وتباسىلاردى قولداۋ كەرەك. ءبىرتۇرلى ەستىلسە دە, عىلىمي الەم مەن جەكە انا تاجىريبەسى ارقىلى ستارتاپ جاسادىم. بالامنىڭ جاعدايىن كورىپ, قاتتى الاڭدادىم. پاندەميا كەزىندە ءتىپتى قيىن بولدى. ەرتە ارالاسۋدى قاجەت ەتەتىن بالانىڭ اناسى رەتىندە پاندەميا كەزىندە وڭالتۋ مۇمكىن ەمەستىگىن ۇقتىم. سوسىن ەرەكشە قاجەتتىلىگى بار بالالاردىڭ انالارىنا كەرەك اقپاراتتارعا ءۇڭىلدىم. سودان كەيىن وسى قيىندىققا تاپ بولعان وتباسىلارعا قولجەتىمدى الەۋمەتتىك جوبانى ءموبيلدى قوسىمشا تۇرىندە جاسايمىن دەپ شەشتىم», دەيدى ول.
«قازاقستاننىڭ 100 جاڭا ەسىمى» بايقاۋىنىڭ جەڭىمپازى, 11 جىلدىق تاجىريبەسى بار دەفەكتولوگ يۋستينا ۆيكتوريانىڭ ايتۋىنشا, مامانداردىڭ مۇنداي جوبالارعا قاتىسۋى – وڭ ءىس. ويتكەنى الدەقايدا كەڭ اۋديتورياعا وتۋگە ءارى بالالارعا كوبىرەك كومەكتەسۋگە مۇمكىندىك بەرەدى. ەڭ الدىمەن, بۇل الاڭ بالالاردىڭ يگىلىگى ءۇشىن تاجىريبە الماسۋعا, قاشىقتان كومەكتەسۋگە ارنالعان. وكىنىشكە قاراي, ماماندار بارلىق بالانى قامتي المايدى. بىراق قاشىقتان قاتىسۋعا, باقىلاۋعا, قانداي دا ءبىر ءبىلىم مەن تاجىريبە الۋعا مۇمكىندىك بەرە الادى. ەلىمىزدىڭ شالعاي وڭىرلەرىندە بۇل ماسەلە بويىنشا ماماندار جەتىسپەيدى. ءتىپتى ماماندار جوق ايماقتار بار. تۇزەتۋ مۇعالىمى بولۋى مۇمكىن, بىراق سۋردوپەداگوگ, دەفەكتولوگتەر جوق. ال پلاتفورما اتا-انالارعا اۋرۋمەن تانىسۋعا جانە قىزمەتتەردىڭ بارلىق سپەكترى بار ۇلكەن قالاعا كەڭەس الۋعا بارعانعا دەيىن نە ىستەۋگە بولاتىنىن كورسەتەدى.
ءبىر ەسكەرەر جايت, قوسىمشا العاش ىسكە قوسىلعاندا ديدجيتال-ينكليۋزيا بويىنشا ساراپشى زيات ابدىقايىموۆ زاعيپ جانە ناشار كورەتىن ادامدار ءۇشىن قوسىمشانىڭ قولجەتىمدىلىگىنە اۋديت جۇرگىزگەن ەدى. دامۋ كەزەڭىندە كوماندا تەحنولوگيانىڭ مۇمكىندىگىن تەكسەرىپ, ەرەكشە جانداردى شەكتەيتىن تەحنيكالىق كەمشىلىكتەردى تۇزەتكەن. زياتتىڭ ايتۋىنشا «Ozim Platform» كومانداسى وعان قوسىمشانى جوسپارلاۋ كەزەڭىندە قولجەتىمدىلىك ماسەلەسىمەن جۇگىنگەن. ەرەكشە جاندارعا ەشبىر كەدەرگى بولماي, قولجەتىمدى بولۋى – باستى ماسەلە. بۇل قارجىعا قاتىستى عانا دۇنيە ەمەس, ۇيىم مەن كومپانيانىڭ قۇندىلىقتارىنا قاتىستى دەيدى ساراپشى. ونىڭ ويىنشا, ارحيتەكتۋرادا عانا ەمەس, تسيفرلىق الەمدە دە ەرەكشە جانداردى ەسكەرەتىن ۋاقىت كەلدى.
«Ozim» ازىرلەۋ توبى اتا-انالارعا ماتىندىك جانە بەينەجازبا فورماتىندا ماڭىزدى اقپارات بەرە وتىرىپ, پلاتفورما مازمۇنىن جاساۋ ءۇشىن ساراپشىلاردى, سونىڭ ىشىندە تاجىريبەشىلەر مەن مۇعالىمدەردى شاقىردى. قولدانبادا قاجەتتى اقپاراتتى ىزدەۋدى قاراپايىم جانە ءتيىمدى ەتۋ ءۇشىن توعىز لوگيكالىق جانە تاقىرىپتىق قۇرىلىمدالعان ءبولىم بار. سونداي-اق مۇندا ءارتۇرلى وڭالتۋ ۇيىمىنىڭ بىرىڭعاي دەرەكقورى بار. وسىنىڭ ءبارى بالالاردىڭ دامۋىن باقىلاۋعا مۇمكىندىك بەرەدى. پايدالانۋشىلار بالالارىنىڭ دەرەكتەرىن ءوز ەسەپتىك جازبالارىنا ەنگىزىپ, ۇدەرىستى باقىلاۋ ءۇشىن مەزگىل-مەزگىل تەست جۇرگىزە الادى.
ءموبيلدى قوسىمشا انالار مەن اكەلەرگە عانا ەمەس, ماماندارعا دا پايدالى بولدى. ولار مامان رەتىندە تىركەلىپ, وزدەرىنىڭ پراكتيكالىق تاجىريبەلەرىن ورنالاستىرىپ, قازاقستان مەن تمد ەلدەرىندە وقۋ ماتەريالدارىن تاراتا الادى. بۇل ارىپتەستەردىڭ تاجىريبەسىن زەرتتەۋ جانە حالىقارالىق ادەبيەتتەرگە قولجەتكىزۋگە جول اشادى. پىكىرلەس ادامدارمەن قارىم-قاتىناس جاساۋ مەن اتا-انالاردان كەرى بايلانىس الۋ ساراپشىلارعا ءوز داعدىلارىن جەتىلدىرۋگە جانە قاجەتتىلىكتەردى انىقتاۋعا كومەكتەسەدى.
كوپتەگەن مامان قوسىمشا تۋرالى اقپاراتتى الەۋمەتتىك جەلىدەن بىلگەن. سونىڭ ءبىرى – لوگوپەد ءارى ءتورت بالانىڭ اناسى اجار نۇركەنوۆا. ونىڭ ايتۋىنشا, پلاتفورماداعى تىركەۋدىڭ قاراپايىمدىلىعى, ءينتۋيتيۆتى ينتەرفەيس وتە ءتيىمدى. قوسىمشا, شىنىندا دا, اسەم بەزەندىرىلگەن, ەستەتيكالىق كومپونەنتتەر كوپ.
ء«اربىر اتا-انانىڭ قولدانبادان تەوريالىق ماتەريالداردان باستاپ, پراكتيكالىق ساباقتارعا دەيىن ناقتى اقپاراتتى تابا الاتىنى وتە كەرەمەت. اسىرەسە ماعان بەينەوقۋلىقتار ۇنادى. ساراپشىلار اقپاراتتى اتا-انالار ءۇشىن قاراپايىم جانە تۇسىنىكتى تىلدە جەتكىزدى. اقپارات تا ساپالى. «ينكليۋزيا» قويىندىسىن پلاتفورمانىڭ ماڭىزدى بولىمشەلەرىنىڭ ءبىرى دەپ سانايمىن. قوعام ءاردايىم مۇمكىندىگى شەكتەۋلى بالالاردى قابىلداي بەرمەيدى, سوندىقتان قوسىمشانىڭ اتا-انالارعا وسى ماسەلەلەرى مەن ولاردىڭ تاجىريبەلەرىن تالقىلاۋعا مۇمكىندىك بەرگەنى دۇرىس», دەيدى لوگوپەد.
ەلىمىزدە كەيىنگى جىلدارى دەنساۋلىعى ناشار, بەلگىلى ءبىر دەرتكە شالدىققان بالالار سانى كوبەيىپ بارادى. دامۋى تەجەلگەن بالالار اينالاسىنداعى ادامدارمەن ارالاسپاعاندىقتان, تۇيىقتالىپ, ومىرگە بەيىمسىز بولىپ قالادى. كوپ جاعدايدا اتا-انا بالانىڭ بويىنان قانداي دا ءبىر اۋىتقۋ بايقاماي, بايقاسا دا اسا ءمان بەرمەي ءجۇرىپ قالۋى مۇمكىن. بۇل – ۇلكەن قيىندىقتىڭ باسى. ءتىپتى بالاسىنىڭ سىرقاتى تۋرالى بىلگەن اتا-انالار نە ىستەرىن بىلمەي, ابدىراپ قالادى. اسەمنىڭ جوباسى وسى تۇيتكىلدەردىڭ ءتۇيىنىن شەشۋگە باعىتتالعان.
«قازىر «Ozim Platform»-نىڭ ناعىز داميتىن كەزى. ءبىز مۇمكىندىگىنشە ورتالىق ازياداعى كوپتەگەن وتباسىن قامتۋدى جانە اتا-انالارعا بالا دامۋىنىڭ كەشىگۋىن ەرتە انىقتاۋعا كومەكتەسۋدى جوسپارلاپ وتىرمىز. ەرتە دامۋ جانە ارالاسۋ ءاربىر جەكە تۇلعانىڭ ءوسۋى مەن دامۋى ءۇشىن وڭتايلى جاعدايلاردى قامتاماسىز ەتە وتىرىپ, تۇراقتى جانە سالاماتتى قوعامدى قالىپتاستىرۋدا شەشۋشى ءرول اتقارادى», دەپ ويىن قورىتتى ءا.تاجيەۆا.