ەكىباستۇز قالاسىندا تەمىرجول كلاستەرىن دامىتۋدىڭ وڭ ىستەرى بايقالادى. جەرگىلىكتى كاسىپورىن شىعارعان تەمىرجول دوڭعالاقتارىنىڭ 75 پايىزى بۇگىندە ەكسپورتقا جونەلتىلىپ وتىر. ال كەلەشەكتە مۇندا لوكوموتيۆتەر ءۇشىن مۇلدە جاڭا ونىمدەر وندىرىلە باستايدى.
«پرومماشكومپلەكت» جشس-دا ايىنا 25 مىڭ, ءبىر جىلدا 300 مىڭ تەمىرجول دوڭعالاعى شىعارىلادى. بۇل – ەلىمىزدە بالاماسى جوق كاسىپورىن. مۇنداي زاۋىتتىڭ بۇكىل تمد-دا تورتەۋى عانا بار. 2012 جىلى ىسكە قوسىلعان ءوندىرىس ورنىندا 930 ادام ەڭبەك ەتەدى, ورتاشا ەڭبەكاقى 430 مىڭ تەڭگەنى قۇراپ وتىر.
«زاۋىت شىعاراتىن تۇتاس تاپتامالى جانە ءتىستى دوڭعالاقتار ەلىمىز بويىنشا بىزدە عانا وندىرىلەدى. نەگىزىنەن دوڭعالاقتىڭ 9 ءتۇرىن شىعارامىز. ولار جۇك جانە جولاۋشىلار ۆاگوندارىنا, اۋىر تارتقىش لوكوموتيۆتەر مەن جىلدامدىعى جوعارى لوكوموتيۆتەرگە, ەلەكتروۆوزدارعا, مەتروپوليتەن كولىكتەرىنە ارنالعان. ءونىمنىڭ 25 پايىزى قازاقستاننىڭ ىشىنە, وزگەسى شەتەلدەرگە ساتىلادى. ىشكى سۇرانىستى 100 پايىز وتەپ تۇرمىز. كاسىپورىننىڭ قازىرگى ماقساتى – ەۋروپالىق ستاندارتتاعى دوڭعالاقتاردى ءوندىرۋ. العاشقى پارتياداعى ەۋروپالىق دوڭعالاقتارىمىز اۋديتتەن وتكىزىلدى. ەندى ناقتى نارىققا باعىتتايتىن جوسپارىمىز بار. مۇنداعى قۇرال-جابدىقتىڭ بارلىعى زامانعا ساي اۆتوماتتاندىرىلعان, قولمەن اتقارىلاتىن جۇمىس وتە سيرەك. كۇن سايىن شىعارىلعان ونىمدەرىمىزدى بىردەن سىرتقا تيەپ جىبەرىپ وتىرامىز. سەبەبى سۇرانىس جەتكىلىكتى. شامامەن تاۋلىگىنە 700-800-دەي دوڭعالاق ەكسپورتقا جىبەرىلەدى. بەلورۋسيا ەلىندەگى تەمىرجول كومپانياسىمەن كەلىسىمگە وتىرىپ, ولاردىڭ ۆاگوندارى ءۇشىن دە ءونىم ءوندىرىپ جاتىرمىز. بىزدەن شىعارىلعان دوڭعالاقتاردا اقاۋ وتە از كەزدەسەدى. سوندىقتان شەت مەملەكەتتەردە تاۋارىمىزعا دەگەن سەنىم جوعارى», دەيدى كاسىپورىننىڭ باس ديرەكتورى يۆان دىچكو.
سەرىكتەستىك جۇزەگە اسىرىپ وتىرعان اۋقىمدى جوبا قازاقستاننىڭ تەمىرجول سالاسىن دامىتىپ قانا قويماي, سىرتتان كەلەتىن تاۋاردى وتاندىق ونىممەن الماستىرۋ ماسەلەسىن وڭ شەشىپ بەرىپ وتىر. زاۋىتتا شىعارىلاتىن تەمىرجول دوڭعالاقتارىنىڭ باعاسى يمپورتتىق قۇرالداردان ارزان ءارى ساپالى. مۇندا چەحيا, گەرمانيا, شۆەيتساريا, رەسەي, بەلارۋس, جاپونيا, يتاليا مەملەكەتتەرىنەن اكەلىنگەن ستانوكتور مەن قوندىرعىلار پايدالانىلادى.
اتاپ ءوتۋ كەرەك, «پرومماشكومپلەكت» «Railcast systems» تەمىرجول كلاستەرىنىڭ قۇرامىنا ەنەدى. «Railcast systems» جشس-نىڭ ءوزى وندىرىستىك اۋماقتا تاعى ءبىر زاۋىتتىڭ قۇرىلىسىن قولعا العان. 2026 جىلى پايدالانۋعا بەرىلەتىن جوبانىڭ جۇمىس اتاۋى – «ۇستالىق-بانداج كەشەنىن قۇرۋ». ياعني كەلەشەكتە مۇلدە جاڭا, زامانعا ساي روبوتتەحنولوگيامەن جاراقتالعان زاۋىتتا لوكوموتيۆ بانداجدارى شىعارىلا باستاماق. لوكوموتيۆ بانداجى – لوكوموتيۆتىڭ دوڭعالاق جۇبىنىڭ اۋىستىرىلاتىن ەلەمەنتى.
پاۆلودار وبلىسىنىڭ كاسىپكەرلىك جانە يندۋستريالىق-يننوۆاتسيالىق دامۋ باسقارماسى باسشىسىنىڭ ورىنباسارى رۋسلان تىلەۋلەسوۆتىڭ دەرەگىنشە, جوبانىڭ جالپى قۇنى – 78,6 ملرد تەڭگە. بولاشاقتا كاسىپورىندا جىلىنا 160 000 بۇيىم شىعارىلىپ, ونىڭ 92 پايىزى ەكسپورتتالادى دەپ كوزدەلىپ وتىر. ءوندىرىس ورنى ىسكە قوسىلعاندا ەكىباستۇز قالاسىندا جاڭادان 570 جۇمىس ورنى قۇرىلادى.
«ونەركاسىپتى دامىتۋ قورى» اق «Railcast Systems» سەرىكتەستىگىنىڭ جوباسى بويىنشا ءوتىنىمدى ماقۇلداعان. قازىر قۇرىلىس-مونتاجداۋ جۇمىستارىنىڭ 60 پايىزى, جالپى جوبانىڭ 40 پايىزى جۇزەگە اسىپ ۇلگەردى. كومپانيا كەلەشەك زاۋىتقا جەتكىزىلەتىن قۇرال-جابدىقتار قۇنىنىڭ 50 پايىزىن بۇگىندە تولەپ قويىپتى. وسىنداي جوبالاردىڭ ناتيجەسىندە ەكىباستۇزدىڭ ەكونوميكاسى ءارتاراپتانىپ, قالانىڭ وتىن-ەنەرگەتيكالىق كەشەنگە تاۋەلدىلىگىنەن ارىلۋى جوسپارلانىپ وتىر.
پاۆلودار وبلىسى