ءال-فارابي اتىنداعى قازاق ۇلتتىق ۋنيۆەرسيتەتىنىڭ 90 جىلدىعىنا وراي Digital Farabi II حالىقارالىق فورۋمى ءوتتى. فورۋمعا قاتىسۋشىلارمەن قاشىقتىقپەن بايلانىسقا شىققان عىلىم جانە جوعارى ءبىلىم ءمينيسترى ساياسات نۇربەك جاساندى ينتەللەكتىنىڭ كاسىبي قىزمەتكە ساندىق جانە ساپالىق اسەرىن تالدايتىن «جي باسقاراتىن اۆتوماتتاندىرىلعان الەمدەگى كەڭەيتىلگەن جۇمىس» بويىنشا IBM ەسەبىنىڭ دەرەكتەرىن ۇسىندى.
«سوڭعى بەس جىلدا 27 ەل جاساندى ينتەللەكتىنى دامىتۋدىڭ وزىندىك تۇجىرىمداماسىن ازىرلەدى. ەل پرەزيدەنتى وسى باعىتقا باسىمدىق بەرۋدى تاپسىردى. ەسەپتىڭ ەكى نەگىزگى قورىتىندىسى: ءبىرىنشىسى – جاساندى ينتەللەكت توڭكەرىسى بولدى, ەكىنشىسى – الگوريتمدەر ادامداردى تىكەلەي الماستىرا المايدى. جاساندى ينتەللەكتىنى, جاڭا تەحنولوگيالاردى يگەرگەن ماماندار جي مۇمكىندىكتەرىن پايدالانۋعا مۇمكىندىكتەرى مەن رەسۋرستارى جوق ادامداردى ەڭبەك نارىعىنان ىعىستىرا باستايدى», دەپ اتاپ ءوتتى مينيستر.
ءال-فارابي اتىنداعى قازۇۋ-دىڭ باسقارما توراعاسى-رەكتور جانسەيىت تۇيمەباەۆ ءوز كەزەگىندە جاساندى ينتەللەكت داۋىرىندە يننوۆاتسيالىق جوبالاردىڭ ماڭىزدىلىعىن اتاپ ءوتتى.
عىلىمي-يننوۆاتسيالىق كورمەدە قازۇۋ عالىمدارى مەن ستۋدەنتتەرى جانە «Stem» ورتالىقتارىنداعى وقۋشىلار وزدەرىنىڭ عىلىمي ازىرلەمەلەرى مەن ستارتاپتارىن ۇسىندى. جاس عالىمداردىڭ يننوۆاتسيالىق جوبالارىن ىسكە اسىرۋعا قولداۋ كورسەتۋ جانە نارىققا شىعۋىنا جاردەمدەسۋدى ماقسات ەتكەن كورمە بارىسىندا 20-دان استام يننوۆاتسيالىق جوبا تانىستىرىلدى.
سولاردىڭ قاتارىندا ۋنيۆەرسيتەت عالىمى ديانا راحيموۆا سويلەۋ قابىلەتى ناشار بالالارعا ارنالعان قازاق تىلىندەگى ءموبيلدى قوسىمشانى تانىستىردى. جوبانىڭ ماقساتى – جاساندى ينتەللەكتىنى پايدالانا وتىرىپ, وقۋ جانە جازۋ ءادىسى ارقىلى بالالاردىڭ سويلەۋ قابىلەتىن جەتىلدىرۋ جانە دامىتۋ. عالىم دايىنداعان عىلىمي جوبانىڭ ارقاسىندا بالالار تەز سويلەۋدى جانە اقپاراتتاردى جەدەل قابىلداۋدى ۇيرەنەدى. الداعى ۋاقىتتا جوبا اۆتورلارى ءموبيلدى قوسىمشاعا لوگوپەدتەردىڭ ۆيدەودارىستەرىن ەنگىزۋدى جوسپارلاپ وتىر. بولاشاقتا ءموبيلدى قوسىمشا تولىق بىتكەننەن كەيىن اتا-انالار تەگىن پايدالانا الادى.
قازۇۋ-دىڭ جاس عالىمدارى ۇسىنعان جوبانىڭ ءبىرى – ينتەللەكتۋالدى اۆتوماتتاندىرىلعان اقىلدى جىلىجاي. بۇل اقىلدى جىلىجاي داقىلداردى ءوسىرۋ پروتسەسىن جەڭىلدەتىپ قانا قويماي, ادامداردىڭ جۇمىسىن بارىنشا ازايتادى. ياعني وسىمدىكتەردى قاجەتتى كەزدە عانا سۋارۋ ءۇشىن جانە اۋا تەمپەراتۋراسىن قاداعالاۋ ماقساتىندا ارنايى داتچيكتەر ورناتىلعان. اتالعان داتچيكتەر ارقىلى جىلىجايداعى جۇمىستار زاماناۋي تەحنولوگيالاردىڭ كومەگىمەن جۇزەگە اسادى. جوبانى جەتىلدىرۋ بارىسىندا ەنەرگيا كوزى كۇن پانەلدەرىنەن الىنعان. قازۇۋ-دىڭ 3-كۋرس ستۋدەنتى, جوبا اۆتورلارىنىڭ ءبىرى گۇلنۇر قۇدايبەرگەنوۆانىڭ ايتۋىنشا, مۇنداي عىلىمي جوبا الەمدىك پراكتيكادا بار. ال ەلىمىزدە اقىلدى جىلىجايدىڭ بالامالارى بولعانىمەن, ولار تولىق جۇزەگە اسىرىلماعان.
فورۋم اياسىندا بوس جۇمىس ورىندارىنىڭ جارمەڭكەسى ءوتتى. جارمەڭكەگە بارلىعى 35-تەن استام ءىرى كومپانيالار مەن ۇيىمدار قاتىستى. جۇمىس بەرۋشىلەر ستۋدەنتتەرگە ءارتۇرلى سالاداعى بوس جۇمىس ورىندارىنىڭ مۇمكىنشىلىكتەرى تۋرالى ايتىپ بەردى.
الماتى