وقۋ-اعارتۋ مينيسترلىگى مەن توتەنشە جاعدايلار مينيسترلىگى اراسىندا بالالاردىڭ قاۋىپسىزدىگىن قامتاماسىز ەتۋ بويىنشا ىنتىماقتاستىق تۋرالى مەموراندۋمعا قول قويىلدى, دەپ جازادى Egemen.kz ۆەدومستۆونىڭ ءباسپاسوز قىزمەتىنە سىلتەمە جاساپ.
«باستى ماقسات – بالالاردىڭ قاۋىپسىزدىگىن قامتاماسىز ەتۋ. ءبىز بالالارىمىزدىڭ, ستۋدەنتتەر مەن مۇعالىمدەردىڭ ءومىرى مەن دەنساۋلىعىن قورعاۋ ءۇشىن بارلىق ۆەدومستۆولاردىڭ كۇش-جىگەرىن بىرىكتىرۋدى كوزدەپ وتىرمىز. وسى ىنتىماقتاستىقتىڭ ارقاسىندا ءبىلىم بەرۋ ۇيىمدارى توتەنشە جاعدايلاردا دۇرىس ارەكەت ەتۋ جانە قاۋىپسىز ءبىلىم بەرۋ ورتاسىن قامتاماسىز ەتۋدە قوسىمشا ءبىلىم مەن داعدىعا يە بولادى», دەدى وقۋ-اعارتۋ ۆيتسە-ءمينيسترى ەدىل وسپان.
سونداي-اق ۆەدومستۆولار ءبىلىم بەرۋ قىزمەتكەرلەرىن قاۋىپسىزدىك تەحنيكاسىنا وقىتۋ جانە ونى تاراتۋ بويىنشا جانە ءبىلىم بەرۋ ۇيىمدارىنىڭ جەكە قۇرامىنىڭ ءارتۇرلى توتەنشە جاعدايلارعا دايىندىعىن ارتتىرۋ ماقساتىندا ءىس-شارالار مەن جاتتىعۋلارىن بىرلەسىپ وتكىزۋدى قۇپتادى.