مايقايىڭنىڭ جالعىز قۇبىرى جارىلدى

«21 اقپان كۇنى باياناۋىل اۋدا­نىنىڭ مايقايىڭ كەنتىنە سۋ جەتكىزەتىن ديامەترى 1020 مم سۋىق سۋمەن جابدىقتاۋ قۇبىرىندا اقاۋ انىقتالدى. اقاۋدىڭ ۋچاسكەسى «ەكىباستۇز قالالىق سۋ ارناسى» مەملەكەتتىك كوم­مۋنالدىق كاسىپورنىنا قاراس­تى ەكىنشى كوتەرگىش سورعى­سىنان 27 كم قاشىقتىقتا ورنالاسقان. وقيعا ورنىنا ءوڭىر باسشىسى اسايىن بايحانوۆ, ەكىباستۇز قالاسىنىڭ جانە باياناۋىل اۋدا­نىنىڭ باسشىلارى, سون­داي-اق وبلىستىق توتەنشە جاعداي­لار دەپارتامەنتىنىڭ باس­شى­سى بارىپ, جەدەل شتاب ۇيىم­داستىرىلدى. اقاۋدىڭ سەبە­بىن انىقتاۋ جانە جويۋ جۇمىس­تارى «ەكىباستۇز قا­لالىق سۋ ارناسى» مكك كۇش­تەرىمەن جۇر­گىزىلىپ جاتىر. جوندەۋ جۇمىس­تارىنا 30 ادام جانە 10 بىرلىك مامانداندىرىلعان تەحنيكا جۇمىلدىرىلدى. سونداي-اق وقيعا ورنىندا پاۆلودار وب­لىسىنىڭ توتەنشە جاعدايلار كۇشتەرى مەن «مايقايىڭالتىن» اق ما­ماندارى جۇمىس ىستەپ جاتىر», دەپ حابارلادى وبلىس اكىمىنىڭ ءباسپاسوز قىزمەتى.

كەنتتەگى اۋىزسۋ قۇبىرى «مايقايىڭالتىن» اق-نىڭ سەنىم­گەرلىك باسقارۋىنا بەرىلگەن. كاسىپورىننىڭ باس ديرەكتورى قۋانىش ءبوتيننىڭ ايتۋىنشا, ەكىباستۇز قالاسىنان ۇلكەن قۇ­بىر ارقىلى اعىپ كەلەتىن اۋىز­سۋ كەشە تۇسكى ۋاقىتتا مۇلدە جوعالىپ كەتكەن.

«اپات قۇبىردىڭ ەكىباستۇز قالاسى اۋماعىندا بولىپ وتىر. جالپى, سۋدىڭ قۇبىرداعى اقاۋ­دان ىسىراپ بولۋى 19 اقپان­نان بەرى بايقالعان. نەگىزگى اقاۋ ورنى كەشە عانا تابىلعان ءتارىزدى. بۇگىن تۇندە وقيعا ورنىنا بارىپ, كاسىپورىننىڭ ماماندارى مەن تەحنيكالارىن كومەككە جۇ­مىلدىردىق. قازىر كەنتتە اۋىز­سۋ بويىنشا ءبىراز شەكتەۋ ەنگىزىلدى. «مايقايىڭالتىن» اق بويىنشا سۋدى مەيلىنشە از پايدالانۋعا تاپسىرما بەردىك. وزگە جەرگىلىكتى كاسىپورىندار اسا كوپ تۇتىنا قوي­مايدى. جاع­داي تۇراقتالعانشا شەكتەۋلەر كۇشىندە ساقتالادى», دەدى قۋا­نىش بوتين.

مايقايىڭ كەنتىنىڭ تۇرعىن­دارى كۇنىنە 1 مىڭ تەكشە مەتر اۋىز­سۋ تۇتىنىپ كەلگەن. كەشە قىسىمنىڭ تومەندەۋىنە بايلانىستى «مايقايىڭالتىن» اق سۋ تاسيتىن ماشينالاردى جۇ­مىلدىردى. كەنتكە جاقىن جەردە سكۆاجينا بار, جەتپەگەن سۋدى سول جەردەن الادى. ال كەنتتى جىلۋمەن قامتىپ تۇرعان قازاندىق تاۋلىگىنە 200–250 تەكشە مەتر سۋ تۇتىنادى.

نەگىزى سۋ قۇبىرى جولاي «بو­گاتىر-كومىر» اق وندىرىستىك نىساندارىن باسىپ وتەدى. اقاۋعا بايلانىستى كەنىشكە سۋ بەرۋ دە ۋاقىتشا توقتاتىلدى. پاۆلودار وبلىسى اكىمىنىڭ ءباسپاسوز قىزمەتى حابارلاعانداي, كەنىشتەگى كومىر ءوندىرىسى توقتاماعان. سەبەبى وعان سۋدىڭ قاجەتى جوق. شارۋاشىلىق قاجەتتىلىكتەر ءۇشىن سۋدى جەتكىزۋ ۇيىمداستىرىلدى.

اتالعان سۋ جەلىسى 1996 جىلى سالىنعان جانە بۇگىنگى تاڭ­دا اي­تارلىقتاي توزىعى جەت­كەن. قۇ­بىردى بيىل رەكون­سترۋك­­تسيالاۋ جوسپارلانىپتى. قا­زىرگى كەزدە كونكۋرس وتكىزىلىپ, ال­ماتىينجستروي» جشس مەر­دىگەر ۇيىم رەتىندە تاڭ­دال­عان. جۇ­مىستاردى كوكتەم-جاز كەزە­ڭىندە باستاۋ ۇيعارىلىپ وتىر.

مايقايىڭ كەنىشى مەن «بوگاتىر-كومىر» اق-عا سۋ جەت­كىزەتىن ماگيسترالدى قۇبىر «ەكىباستۇز قالالىق سۋ ارناسىنا» تيەسىلى. ال كەنت ىشىندەگى سۋ قۇ­بىرلارىنا جوعارىدا ايت­قانداي «مايقايىڭالتىن» اق جاۋاپ بەرەدى.

التىن كەنىشىن جاعا­لاي ور­نالاسقان كەنتتە ورتالىق­تان­دىرىلعان اۋىزسۋدى تۇتىناتىن 2500 جەكە ابونەنت بار. وڭىرلىك تا­بيعي مونوپوليالاردى رەتتەۋ دە­پارتامەنتىنىڭ باسشىسى نۇر­لان نۇرمۇراتوۆتىڭ ايتۋىنشا, جەرگىلىكتى جەكە تۇتىنۋشىلار ءۇشىن تاريف قۇنى 130,58 تەڭگە تۇرادى. بيۋدجەتتىك ۇيىمدار تەكشە مەترىنە 779,01 تەڭگە تولەسە, وزگە تۇتىنۋشىلار ءۇشىن تاريف باعاسى – 754,1 تەڭگە.

پاۆلودار وبلىسى,

باياناۋىل اۋدانى,

مايقايىڭ كەنتى