وقۋشىلار مەن مۇعالىمدەر اراسىندا كىتاپ وقۋ مادەنيەتىن كوتەرۋ ماقساتىندا ا.بايتۇرسىن ۇلى ءبىلىم اكادەمياسى رەسپۋبليكالىق «ۇزدىك وقىرمان» مۇعالىمدەر بايقاۋىن ۇيىمداستىرىپ, قورىتىندىسى سالتاناتتى جاعدايدا ءوتتى. «وقۋعا قۇشتار مەكتەپ» جوباسى اياسىنداعى بايقاۋ استاناداعى ى.التىنسارين اتىنداعى BINOM SCHOOL مەكتەپ-ليتسەيىندە قورىتىندىلاندى.
كىتاپ وقۋ – بوس ۋاقىتتى قىزىقتى وتكىزۋ عانا ەمەس, تۇلعا بولىپ قالىپتاسۋعا وراسان كومەگى تيەتىن وتە پايدالى ءىس. اتالعان ءىس-شاراعا قوعام قايراتكەرلەرى, عالىمدار, مۇعالىمدەر مەن كىتاپحاناشىلار قاتىسىپ, كىتاپ وقۋدىڭ ماڭىزدىلىعى جونىندە وي ءبولىستى. كوركەم شىعارما وقۋدان باسەكەگە ەلىمىزدىڭ تۇكپىر-تۇكپىرىنەن 3 500 ۇستاز قاتىستى. سولاردىڭ اراسىنان ون رومان بويىنشا ون ەسسە جازىپ, ۇزدىكتەر قاتارىنا ىلىككەن 50 ۇستاز استاناعا شاقىرىلىپ, ماراپاتتالدى. ماسەلەن, ولار ءى كەزەڭ بويىنشا د.يسابەكوۆتىڭ «گاۋھار تاس» پوۆەسىن, ش.مۇرتازانىڭ «اي مەن ايشا» رومانىن, ءا.نۇرشايىقوۆتىڭ «اقيقات پەن اڭىز» رومانىن, ي.تۋرگەنەۆتىڭ «اكەلەر مەن بالالار» رومانىن جانە ش.ايتماتوۆتىڭ «قوش بول, گۇلسارى!» پوۆەسىن وقىعان. قاتىسۋشىلارعا ءار كىتاپتان 2 سۇراق بەرىلىپ, ونىڭ ارقايسىسىنا كەمى 200 سوزدەن تۇراتىن ەسسە ارقىلى جاۋاپ بەرگەن.
بايقاۋدىڭ ءىى كەزەڭىندە قاتىسۋشىلار ب.سوقپاقباەۆتىڭ «بالالىق شاققا ساياحات», م.اۋەزوۆتىڭ «قيلى زامان», ب.ءمايليننىڭ «كۇلپاش», ا.سەنت-ەكزيۋپەريدىڭ «كىشكەنتاي شاحزادا», و.بالزاكتىڭ «جەرگىلىكتى دارىگەرى» سياقتى شىعارمالارىن وقىعان. بۇل كىتاپتاردىڭ ءبارى «قاسىم» باسپاسىنىڭ ءونىمى ەكەنىن اتاپ وتكەن ءجون.
ءبىر جىلعا سوزىلعان بايقاۋ ناتيجەسىندە 3 500 قاتىسۋشىنىڭ اراسىنان 50 ۇستاز «ۇزدىك وقىرمان» دەپ تانىلسا, 12 قاتىسۋشى ءىىى ورىن, 6 قاتىسۋشى ءىى ورىن يەلەنىپ, 2 قاتىسۋشى ءى ورىنعا لايىق دەپ تانىلىپ, ديپلومدار مەن اقشالاي سىياقى جەڭىپ الدى. مۇنان بولەك 30 قاتىسۋشىعا ىنتالاندىرۋ سىيلىعى مەن قارجىلاي سىياقى تاپسىرىلدى.