ماجىلىستە وتكەن ورمان ورتتەرىنىڭ الدىن الۋ جانە ولارمەن كۇرەس تاقىرىبىنا ارنالعان ۇكىمەت ساعاتىندا دەپۋتات ەرمۇرات باپي ەكولوگيا جانە تابيعي رەسۋرستار ءمينيسترى ەرجان نىسانباەۆقا ساۋال جولداپ, ءورت زاردابىن جويۋدىڭ جايىن سۇرادى, دەپ جازادى Egemen.kz تومەنگى پالاتانىڭ ءباسپاسوز قىزمەتىنە سىلتەمە جاساپ.
ء«بىز ورمان-توعايى تىم ماردىمسىز ەلدەردىڭ قاتارىندامىز. ەلدەگى ورمان قورىن ايالاپ, ساقتاپ مولايتۋىمىز كەرەك. ال بىزدە كەرىسىنشە. بىلتىر قوستاناي مەن اباي وبلىسىندا الاپات ءورت بولدى. پرەزيدەنت ۇكىمەتكە ناقتى تاپسىرمالار بەرگەن ەدى. بۇگىنگى كۇنى ورمان قورىن قالپىنا كەلتىرۋ ماسەلەسىندە اباي, قوستاناي وبلىستارىندا قانداي ناقتى جۇمىستار جۇرگىزىلىپ جاتىر؟ ورمان قورىن تولىق قالپىنا كەلتىرۋدىڭ بولاشاقتاعى مۇمكىندىگى قانداي؟ سەمەي ورمانىندا بولعان الاپات ءورتتىڭ تولىق شىعىنى انىقتالدى ما؟», دەپ سۇرادى دەپۋتات.
ە.باپيدىڭ ساۋالىنا قاتىستى جاۋاپ بەرگەن مينيستر ە.نىسانباەۆ سەمەي ورمانى بويىنشا بىلتىر قازان ايىندا شتاب قۇرىلعانىن, جول كارتاسى جاسالعانىن ايتتى. 63,5 مىڭ گەكتار جەردەگى 6 ميلليون تەكشەمەتر ءورت شالعان اعاشتى تامىرىمەن قازىپ الىپ, ورنىنا جاڭا كوشەت ەگۋ ماسەلەسى تالقىلانىپ جاتقانىن جەتكىزدى.
«ەڭ الدىمەن ءبىز وزەگىن ءورت شالىپ قۋراعان اعاشتاردى كەسىپ اكەتىپ, القاپتى تازارتۋعا كۇش سالامىز. بۇل شارۋاعا ورمان القابى سيرەك وڭتۇستىك, باتىس وبلىستارىنىڭ ورمان شارۋاشىلىق ماماندارىن شاقىرىپ, تومەن باعادا ۇسىنساق دەيمىز, وزدەرى كەلىپ قازىپ الادى. تازارعان القاپقا اعاش كوشەتتەرىن ەگەمىز», دەدى مينيستر. بىراق ورتەنگەن ورمان اعاشىنىڭ 20-25 پايىزى عانا كادەگە جارايتىنىن, قالعانى تەك وتىن ەكەنىن ايتتى.