كەيىنگى جىلدارى ماڭعىستاۋدا تۇيە, قوي جۇندەرىن قاجەتكە جاراتۋعا باسا ءمان بەرىلىپ كەلەدى. وسى ارقىلى وڭدەلگەن تۇيە, قوي جۇنىنەن ءتۇرلى بۇيىمدار جاساپ, تابىس تابۋعا قىزىعۋشىلار قاتارى كۇن ساناپ كوبەيۋ ۇستىندە. مىسالى, قاراقيا اۋدانىنا قاراستى قۇرىق اۋىلىنىڭ تۇرعىندارى ء«بىر اۋىل – ءبىر ءونىم» جوباسى اياسىندا تۇيە, قوي ءجۇنىن سۇرىپتاپ, ءتۇرلى كادەسىيلار, ويىنشىقتار, كيىمدەر مەن ءارتۇرلى بۇيىم جاساپ, ساۋداعا شىعارا باستادى.
2022 جىلدىڭ قاراشا ايىندا باستاۋ العان ء«بىر اۋىل – ءبىر ءونىم» جوباسى شەڭبەرىندە 33 ادام جۇمىسپەن قامتىلدى. ولاردىڭ قاتارىندا زەينەتكەرلەر دە, مۇمكىندىگى شەكتەۋلى جاندار دا, جاستار دا بار. جوبا ناتيجەسىندە ءبىر جىلدىڭ ىشىندە اقش, گەرمانيا, تۇركيا, قىتاي جانە رەسەي سىندى بەس مەملەكەتكە ءوز ونىمدەرىن جولداپ ۇلگەرگەن. قازاقستاننىڭ دا تۇكپىر-تۇكپىرىنەن تاپسىرىس كەلىپ تۇسەدى. ايتا كەتەيىك, ء«بىر اۋىل – ءبىر ءونىم» – ەلىمىز بويىنشا تۇيە, قوي جۇنىنەن كوپتوپتامالى ويىنشىقتار مەن كادەسىيلار شىعاراتىن جالعىز جوبا.
– تىڭ يدەيانى نەگىزى مەنتورىمىز ساۋلە حالەلقىزى جاپوندىقتاردان كورىپ, ءوز ەلىمىزدە ىسكە اسىرۋعا بەل بۋدى. ويتكەنى ماڭعىستاۋدا قوي مەن تۇيە ءجۇنى كوبىنە پايداعا اسپاي, دالادا ورتەنىپ جاتادى. قولداعى شيكىزاتتى كادەگە جاراتىپ, ءبىر جاعىنان اۋىلداعى قىز-كەلىنشەكتەرگە ۇيرەتىپ, تابىس تابۋىنا سەپتەسۋگە ماقسات قويدىق. سول ماقسات بۇگىندە ىسكە اسىرىلىپ جاتىر, دەدى جوبا جەتەكشىسى جاڭاگۇل جاپاروۆا.
جوبا جەتەكشىسى جەرگىلىكتى شارۋا قوجالىقتارىنان تۇيە ءجۇنىنىڭ 1 كيلوسىن 500 تەڭگەگە, قوي ءجۇنىن تەگىن الاتىندىعىن ايتتى. بۇگىندە جوبا اياسىندا ءونىم كولەمىن ۇلعايتىپ, وزگە ەلدەرگە ەكسپورتتاۋ جوسپارى بار.
بۇل جوبا قىز-كەلىنشەكتەردىڭ قىزىعۋشىلىعىن تۋعىزعان, ولار جوباعا اتسالىسىپ قوسىمشا تابىس تابۋدى ءجون سانايدى.
– مەكتەپتە – مۇعالىممىن, ال بۇل جەردە بىلگەنىمدى قىزدارعا ۇيرەتەمىن. ءونىم تولىق دايىن بولعاننان كەيىن, ءوزىم تەكسەرىپ, ولقى كەتكەن تۇستارىن وڭدەيمىن. جۇننەن جاسالعان كەز كەلگەن بۇيىمدى, اياقكيىم, سىرت كيىم بولسىن ءوز تاجىريبەمە سۇيەنىپ وڭدەپ, وزگەرتىپ, جارامدى دۇنيە شىعارا الامىن. جالپى, مۇنداي ىسپەن اينالىسىپ كەلە جاتقانىما ون جىلدىڭ شاماسى بولدى, – دەدى ء«بىر اۋىل – ءبىر ءونىم» جوباسىندا تەحنولوگ قىزمەتىن اتقارىپ جۇرگەن مۇعالىم انار قوشاەۆا.
مال ءجۇنىن قاجەتكە جاراتىپ, ەلگە پايدالى بۇيىمدار ۇسىنا بىلگەن قىز-كەلىنشەكتەر ءىسى كوپكە ۇلگى بولۋعا لايىقتى.
ماڭعىستاۋ وبلىسى