پرەزيدەنت قاسىم-جومارت توقاەۆ ەلىمىزدىڭ كولىك-لوگيستيكالىق الەۋەتىن ارتتىرۋ ءۇشىن بەلسەندى جۇمىس ىستەۋ قاجەت ەكەنىن ايتتى. ول وسى باعىتتا ۇكىمەتكە قازاقستاندى ەۋرازيانىڭ تولىققاندى كولىك-لوگيستيكالىق جانە ترانزيتتىك حابىنا اينالدىرۋدى تاپسىردى, دەپ جازادى Egemen.kz.
«وسى مىندەتتى ىسكە اسىرۋ ءۇشىن كولىك مينيسترلىگى قۇرىلدى. سوندىقتان, مينيسترلىك وسى سالاداعى وزەكتى ماسەلەلەر بويىنشا شۇعىل جانە ءتيىمدى شەشىمدەر قابىلداۋى كەرەك. ناقتى ناتيجە كۇتەمىن.بيىل ءبىرىنشى جارتىجىلدىقتا تەمىرجول سالاسىنداعى وزەكتى ماسەلەلەردى شەشۋ جولدارىن قامتيتىن باعدارلامالىق قۇجاتتى قابىلداۋ قاجەت. ماسەلە از ەمەس. اتاپ ايتقاندا, ۆاگونداردى جاڭارتۋ جۇمىسىن تەزدەتۋ كەرەك. كونتەينەرلەردىڭ تاپشىلىعىن جويۋ قاجەت. ماگيسترالدى جەلىلەردى كەڭەيتۋگە قاتىستى بارلىق جوبالاردى جۇزەگە اسىرۋ قاجەت (2028 جىلعا قاراي 1,3 مىڭ شاقىرىم). جالپى, تەمىرجول سالاسىن قارقىندى تۇردە تسيفرلاندىرۋ كەرەك. بۇل قادام ونىڭ تيىمدىلىگى مەن ونىمدىلىگىن ەداۋىر ارتتىرۋعا, بيۋدجەت قاراجاتىن ۇنەمدەۋگە مۇمكىندىك بەرەدى», دەدى مەملەكەت باسشىسى.
پرەزيدەنت ەلىمىزدەگى ەكونوميكالىق ءوسىمدى قامتۋ ىسىندە اۆتوجولداردىڭ ماڭىزدى نىسان ەكەنىن ايتتى. سونىمەن بىرگە ق.توقاەۆ ەل بويىنشا جوندەۋ جۇمىستارى سوزىلىپ كەتكەن اۆتوجولداردى اتاپ, ءىستى بيىل اياقتاۋدى تالاپ ەتتى.
«ەلىمىز ءۇشىن ايرىقشا ماڭىزدى «استانا-بالقاش-الماتى» تاس جولى ءالى كۇنگە دەيىن جوندەلىپ بىتكەن جوق. قۇرىلىس 2017 جىلدان بەرى ءجۇرىپ جاتىر. رەسپۋبليكالىق ماڭىزى بار «اتىراۋ-استراحان», «اقتوبە-قاندىاعاش», «تالدىقورعان-وسكەمەن» جولدارىنىڭ جوندەلىپ جاتقانىنا 5 جىلدان استى. بيىل وسى جۇمىستار ءبىرجولا اياقتالۋعا ءتيىس. بۇل جەردە بىرنەشە ماسەلەنى ەسكەرۋ قاجەت. قالىپتاسقان تاجىريبەگە قاراساق, رەسپۋبليكالىق ماڭىزى بار جولداردىڭ تەندەرىن كوپ جاعدايدا تەك شەتەل كومپانيالارى ۇتىپ الادى. مۇنداي جوبالارعا قولىنان ءىس كەلەتىن, ءتيىستى تەحنيكامەن جابدىقتالعان ءوز كاسىپورىندارىمىزدى تارتۋ كەرەك. سونىمەن قاتار جول قۇرىلىسىنا قاجەتتى تەحنيكانى ەلىمىزدە شىعارۋ تەتىكتەرىن دامىتىپ, ءوزىمىزدىڭ دايىن ءونىمدى پايدالانۋ كەرەك», دەدى مەملەكەت باسشىسى.
قاسىم-جومارت كەمەل ۇلى جول سالۋ ماسەلەسىندە ونىڭ قاي اۋماقتا سالىنىپ جاتقانىنا قاراماستان ساپالى بولىپ شىعۋىن باستى ورىنعا قويۋدى تاپسىردى.