وتكەن جىلدان باستاپ 8 وڭىردە ەلدىڭ قارجىلىق ساۋاتىن كوتەرۋگە باعىتتالعان «قارىزسىز قوعام» جوباسى قولعا الىنعانى بەلگىلى. مەملەكەت باسشىسى قاسىم-جومارت كەمەل ۇلى توقاەۆ «اmاnاt» پارتياسى مەن Halyk Bank-ءتىڭ بىرلەسكەن باستاماسىنىڭ تيىمدىلىگىن ايتىپ, الدا ونىڭ اياسىن كەڭەيتۋدى تاپسىرعان بولاتىن. وسىلايشا, وتكەن جىل ىشىندە 65 مىڭنان استام ادامنىڭ قارجىلىق ساۋاتىن ارتتىرۋعا مۇمكىندىك جاساعان جوبا بيىل ەلىمىزدىڭ بارلىق ايماعىندا جۇزەگە اسا باستايدى.
بيىلعى ەرەكشەلىك – قارجىلىق ساۋاتتىلىق نەگىزىن مەكتەپ قابىرعاسىنان باستاپ وقىتۋ جوسپارلانىپ وتىر. ول ءۇشىن ۇكىمەتپەن بىرلەسىپ وقۋشىلارعا, كوللەدجدەر مەن جوعارى وقۋ ورىندارىنىڭ ستۋدەنتتەرىنە ارنالعان وقۋ قۇرالدارى ازىرلەنۋ ۇستىندە. جالپى, قارجىلىق ساۋاتتىلىق كۋرستارىندا 90 كۇننەن ارتىق مەرزىمى وتكەن قارىزى بار ادامدارعا باسىمدىق بەرىلەدى.
وسى جىلى قىزىلوردا وبلىسىندا وسى باستاما اياسىندا 8 مىڭ ازاماتتى وقىتۋ جوسپارلانىپ وتىر. دۇيسەنبى كۇنى قىزىلوردا قالاسىمەن قاتار جالاعاش, سىرداريا, شيەلى جانە جاڭاقورعان اۋداندارىندا كۋرستار باستالدى.
– جوبا قاتىسۋشىلارى قارجى كەڭەسشىلەرى دارىستەرىنەن بولەك, enbek.kz پورتالىنا تىركەلۋ مەن جەكە كاسىپ اشۋدان باستاپ, سوتتان تىس بانكروتتىقتى سۇيەمەلدەۋ جانە بەرەشەكتى وتەۋ كەستەسىن جاساۋ سەكىلدى ماسەلەلەر بويىنشا كەڭەس الا الادى. سونداي-اق وقۋ ۇدەرىسىنە قاتىسۋشىلارعا زاڭگەرلەر دە كومەك بەرەدى. ەلدەگى ازاماتتار كۋرسقا جازىلۋ ءۇشىن «Amanat» پارتياسىنىڭ قالالىق نەمەسە اۋداندىق فيليالىنا حابارلاسۋعا بولادى, دەيدى – پارتيانىڭ وبلىستىق فيليالىنىڭ اتقارۋشى حاتشىسى ءلايلا تورەشوۆا.
جۇرتشىلىققا قارجى ساۋاتتىلىعى كۋرستارىن وتكىزەتىن ساراپشىلاردى پارتيانىڭ ورتالىق اپپاراتى ارنايى وقۋدان وتكىزگەن. وبلىستا جوبا اياسىندا ءدارىس وقيتىن وسىنداي 5 ساراپشى بار. ولاردىڭ جەتەكشىسى «قارىزسىز قوعام» جوباسىنىڭ قىزىلوردا وبلىسى بويىنشا مەنەدجەرى, سەرتيفيكاتتالعان ترەنەر, مەنتور ناتاليا ميشۋكوۆا.
– جوسپار بويىنشا بيىل 8 مىڭ ادامدى وقىتۋىمىز كەرەك. وقۋمەن قاتار قالا اكىمدىگىنىڭ جانىنان اشىلعان فرونت-وفيستە ءتۇرلى كەڭەس الىپ, كاسىپپەن اينالىسقىسى كەلەتىندەرگە بيزنەس-جوسپار جاساۋعا كومەك بەرىلەدى, – دەيدى ناتاليا ميشۋكوۆا.
قاتىسۋشىلار اراسىندا ايەلدەردىڭ كوپتىگى بايقالادى. سولاردىڭ ءبىرى – ايگۇل بازارباەۆا. العا قاراي قارىزسىز قادام باسۋدى كوزدەگەن ول قالتاڭداعى قارجىڭدى ەسەپتەپ, ءجون-جوسىقسىز نەسيەگە ۇرىنباۋ ءۇشىن ءار ادامنىڭ وسىنداي كۋرستاردان وتكەنىن دۇرىس دەپ سانايدى.
وبلىس ورتالىعى مەن 4 اۋداندا قاتار باستالعان قارجى ساۋاتتىلىعى ساباقتارى الدا بايقوڭىر قالاسى مەن قالعان ءۇش اۋداندا دا جالعاسادى.
قىزىلوردا