الماتىدا قازاقستان پرەمەر-ءمينيسترى ءاليحان سمايىلوۆ پەن رەسەي ۇكىمەتىنىڭ توراعاسى ميحايل ميشۋستين كەزدەستى. كەلىسسوزدەر ەۋرازيالىق ۇكىمەتارالىق كەڭەستىڭ وتىرىسى قارساڭىندا ءوتتى, دەپ جازادى Egemen.kz.
تاراپتار ساۋدا, ينۆەستيتسيا, ونەركاسىپتىك ىنتىماقتاستىق, ەنەرگەتيكا, كولىك-لوگيستيكا, اۋىل شارۋاشىلىعى جانە ءبىلىم بەرۋ سالالارىنداعى مەملەكەتارالىق ىنتىماقتاستىقتىڭ كەڭ اۋقىمدى ماسەلەلەرىن تالقىلادى.
اتاپ ايتقاندا, قازاقستاندىق كومىردى رەسەي فەدەراتسياسىنىڭ اۋماعى ارقىلى تاسىمالداۋ, سونداي-اق قازاقستاندىق تاسىمالداۋشىلاردىڭ رەسەيگە كىرۋىنە قاتىستى پروبلەمالاردى جويۋ ماسەلەلەرى جان-جاقتى تالقىلاندى.
ءاليحان سمايىلوۆ ەكى مەملەكەت باسشىلارىنىڭ ساياسي ەرىك-جىگەرىنىڭ ارقاسىندا قازاقستان رەسپۋبليكاسى مەن رەسەي فەدەراتسياسى اراسىنداعى قارىم-قاتىناستار ءوزارا قۇرمەت قاعيداتتارى نەگىزىندە پروگرەسسيۆتى تۇردە دامىپ كەلە جاتقانىن اتاپ ءوتتى.
«رەسەي قازاقستاننىڭ نەگىزگى ساۋدا-ەكونوميكالىق سەرىكتەستەرىنىڭ ءبىرى بولىپ تابىلادى, بۇعان وتكەن جىلدىڭ 11 ايىندا 24 ميلليارد دوللاردى قۇراعان تاۋار اينالىمىنىڭ كەرەمەت كولەمى دالەل», دەدى ول.
ۇكىمەت باسشىسىنىڭ ايتۋىنشا, قازاقستان وڭىرارالىق جانە شەكارالىق ىنتىماقتاستىقتى دامىتۋعا ۇلكەن كوڭىل ءبولىپ وتىر. بۇل باعىتتاعى ءتيىمدى الاڭ – وڭىرارالىق ىنتىماقتاستىق فورۋمى.
«اعىمداعى جىل بىرلەسكەن ءىس-شارالار مەن ءتۇرلى دەڭگەيدەگى ءوزارا بايلانىستار تۇرعىسىنان قارقىندى بولاتىنىنا سەنىمدىمىن. قازاقستان ۇكىمەتى بارلىق سالالاردا تولىق اۋقىمدى جانە ءوزارا ءتيىمدى ىنتىماقتاستىقتى دامىتۋعا دايىن», دەدى ءاليحان سمايىلوۆ.
ميحايل ميشۋستين ءداستۇرلى قوناقجايلىلىق ءۇشىن العىس ايتىپ, رەسەي قازاقستانمەن ءوزارا ءتيىمدى قارىم-قاتىناستاردى نىعايتۋعا باسىمدىق بەرەتىنىن اتاپ ءوتتى.
ءبىز ونەركاسىپ, اۆتوموبيل, ەنەرگەتيكا, مۇناي-حيميا, كولىك ينفراقۇرىلىمى, تسيفرلىق ەكونوميكا جانە باسقا دا كوپتەگەن سالالاردا ءىرى ينۆەستيتسيالىق جوبالاردى بىرلەسىپ جۇزەگە اسىرىپ جاتىرمىز. ءبىز جاڭا ءوندىرىس تىزبەگىنىڭ قۇرىلىسىن جەدەلدەتۋدى ۇسىنامىز», دەدى رف ۇكىمەتىنىڭ توراعاسى.