بىلتىر 5 مىڭنان استام تۇرعىننىڭ اباتتاندىرۋ ەرەجەسىن بۇزعاندىعى تۋرالى دەرەك ۇسىنعان سەناتور اندرەي لۋكين دەپۋتاتتىق ساۋالىندا ءۆانداليزمنىڭ جيىلەپ كەتكەنى تۋرالى ماسەلە قوزعادى, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.
ءتارتىپ بۇزۋشىلار جاسىل جەلەكتەردى, اعاشتاردى جويعان, ايالدامالاردى, ليفتتەردى بۇزعان, باسقا دا ينفراقۇرىلىمدىق جانە كوشەدەگى ساندىك نىسانداردى قيراتقان.
ء«بىر كەزدەرى ماڭعىستاۋ وبلىسىنداعى ىبىقتى ساي شاتقالىنىڭ قابىرعاسىنا ەسىمىن بالعا-قاشاۋمەن ويىپ جازعان مادەنيەت سالاسى شەنەۋنىگىنىڭ ارەكەتى جۇرتشىلىق اراسىندا ءدۇمپۋ تۋعىزعان ەدى. ارينە, ءتارتىپ بۇزعاندارعا ايىپپۇل سالىنۋى دا, قاماۋعا الىنۋى دا مۇمكىن. زاڭنامالىق تۇزەتۋلەر وتكەن جىلدىڭ باسىندا قابىلداندى. دەگەنمەن, تاجىريبە كورسەتىپ وتىرعانداي, قولدانىستاعى شارالار جەتكىلىكسىز بولىپ وتىر», دەدى سەنات دەپۋتاتى.
اندرەي لۋكين پارلامەنت دەپۋتاتتارى ۆانداليزم كورىنىستەرى ءۇشىن جاۋاپكەرشىلىكتى ودان ءارى كۇشەيتۋ ماسەلەسىن پىسىقتاپ جاتقانىن, سونداي-اق ۇكىمەتكە ونىمەن كۇرەسۋ تەتىكتەرىن ۇسىنعانىن ايتتى.
«ۆانداليزم ءۇشىن جاۋاپكەرشىلىكتى كۇشەيتۋدى جانە زاڭناماعا ءتيىستى وزگەرىستەر ەنگىزۋدى ۇسىنامىن. قازىرگى ۋاقىتتا ۆانداليزمگە قارسى كۇرەس نەگىزىنەن قۇقىقتىق سالادا جازالاۋ ارقىلى جۇزەگە اسىرىلادى. سوندىقتان حالىقارالىق وڭ تاجىريبەنى پايدالانۋ مۇمكىندىگىن قاراستىرۋ جانە ءۆانداليزمنىڭ الدىن الۋدا كرەاتيۆتى يندۋستريا وكىلدەرىنىڭ قاتىسۋىن پىسىقتاۋ ماڭىزدى. ولار ءوز ونىمدەرى ارقىلى جاڭا جاعدايدىڭ الدىن الۋعا, حالىقتىڭ, اسىرەسە جاستاردىڭ مادەنيەتىن كوتەرۋگە ىقپال ەتەدى, مۇنداي ارەكەتتەردىڭ زاڭسىزدىعىن قولجەتىمدى تاسىلدەرمەن تۇسىندىرە الادى», دەدى دەپۋتات.