«جىگىتتەر» كۆارتەتىنىڭ ءانشىسى ەردوس قاناەۆ «Urpaq» پودكاستىندا بۇرىن-سوڭدى ەشقايدا بولىسپەگەن جان سىرىن اقتارىپ سالدى. ول العاش اكە اتاندىرعان ۇلىنىڭ اۋىر دياگنوزبەن دۇنيەگە كەلگەنىن ايتتى. جىلدار بويى دەرتپەن كۇرەسكەن ءانشىنىڭ ۇلى 10 جاسىندا ومىردەن وزعان, دەپ جازادى Egemen.kz.
ەردوس قاناەۆ «اتا-انا قادىرىن بالالى بولعاندا بىلەرسىڭ» تۇجىرىمىن اكە اتانعاندا ەكى ەسە تۇسىنگەن. ويتكەنى ءانشىنىڭ شاڭىراعىندا تۇڭعىش پەرزەنتى دەنساۋلىعىندا كىناراتپەن دۇنيەگە كەلگەن. ول 10 جىل بويعى قيىن كەزەڭدى ەسىنە الىپ, كوزىنە جاس الدى.
«2010 جىلى 26 جاسىمدا العاش اكە اتاندىم. ول كەزدە اكەلىك جاۋاپكەرشىلىكتى جەتە تۇسىنە قويماپپىن. قۋانعانىمنان كوپشىلىكتەن ءسۇيىنشى سۇراي بەرىپپىن. بىراق تۇڭعىشىم بىزگە سىناقپەن كەلدى. ەسىمىن ابدۋراحيم دەپ قويعان ەدىك. سول بالامىز 2020 جىلى قايتتى. 10 جىل عانا ءومىر ءسۇردى. ول بىردەن دۇنيەگە سىناقپەن كەلدى. تۋعانداعى قۋانىشىمىز سول ساتتە سۋ سەپكەندەي باسىلدى. پەرزەنتحاناعا كەلگەندە ۇلىمدى جانساقتاۋ بولىمىنە الىپ كەتىپتى. ەكى اي ۆاكۋمدە دەمالىپ جاتتى. دياگنوزبەن تۋعانىن سول كەزدە بىلدىك», دەيدى ءانشى.
ءانشى سول كۇننەن باستاپ وتباسىندا اۋىر كەزەڭ باستالعانىن جاسىرمادى. ونەر يەسى ءان-ساپاردا جۇرگەندە پەرزەنتىنىڭ جانىندا ءانشىنىڭ جارى ءجيى بولعان.
«مۇنداي سىناقتى مەن جاۋىما دا تىلەمەس ەدىم. ۇيقىسىز تۇندەر. ونەر ادامى بولعاننان كەيىن سىرتتا كوپ ءجۇردىم. اناسى عانا جانىندا بولدى.10 جىل بويى اۋرۋحانا مەن ءۇيدىڭ اراسىندا جۇردىك. اپارماعان جەرىمىز جوق. اۋىر دياگنوز بولعاندىقتان جانساقتاۋ بولىمىنە كوپ تۇسەتىن. ءتىپتى ەكى كۇن ۇيدە, ەكى اي اۋرۋحانادا جاتقان كەزدەر بولدى. اناسى جانىندا, مەن سىرتتا كولىكتە كۇتىپ وتىراتىن ەدىم. ءار سىناقتىڭ ارتىندا ءبىر جاقسىلىق بار دەيدى عوي. سول بالامىزدان كەيىن اللا ەكى ۇل مەن ەكى قىز بەردى», دەدى ەردوس قاناەۆ.
پودكاستتا «جىگىتتەر» كۆارتەتىنىڭ ءانشىسى وتباسى, ۇرپاق تاربيەسىندەگى ويىن ورتاعا سالىپ, پىكىرىمەن ءبولىستى.