«ەۋروپالىق قۇبىر جۇيەلەرى» جشق اقتاۋدا تۇرعىن ءۇي-كوممۋنالدىق سەكتورىندا قولدانۋعا ارنالعان «اrmpex pursystems» برەندىمەن الدىن الا وقشاۋلانعان يكەمدى قۇبىرلاردى وندىرۋگە قىزىعۋشىلىق تانىتىپ وتىر. ايتۋلارىنشا, بۇل ءونىمنىڭ نەگىزگى تەحنيكالىق ارتىقشىلىقتارى – جوعارى تەمپەراتۋراعا توزىمدىلىگى 115°C دەيىن جانە 1,6 مپا دەيىنگى قىسىمدا جۇمىس ىستەۋى.
«اقتاۋ تەڭىز پورتى» ارنايى ەكونوميكالىق ايماعىنىڭ اۋماعىندا سالىنىپ, وسى جىلدىڭ سوڭىنا تامان پايدالانۋعا بەرۋدى كوزدەپ وتىرعان «ماڭعىستاۋ وبلىسىندا جىلۋمەن جابدىقتاۋ, ىستىق سۋمەن جابدىقتاۋ جانە ونەركاسىپ ءۇشىن يكەمدى پوليمەرلى الدىن الا وقشاۋلانعان قۇبىرلار شىعاراتىن زاۋىت سالۋ» جوباسى اياسىندا «ەۋروپالىق قۇبىر جۇيەلەرى» جشق ماڭعىستاۋ وبلىسىنىڭ اكىمدىگىمەن ىنتىماقتاستىق تۋرالى مەموراندۋمعا قول قويدى.
– «اقتاۋ تەڭىز پورتى» اەا اۋماعىندا ءوندىرىستى وقشاۋلاۋ بىرنەشە وزەكتى مىندەتتەردى شەشۋگە كومەكتەسەدى. ەكونوميكالىق تۇرعىدا بۇل بىزگە يمپورتتى وتاندىق ونىممەن اۋىستىرۋعا مۇمكىندىك بەرەدى. سونداي-اق ءبىز شەتەلدىك كومپانيالاردان ءونىمدى ساتىپ الۋدان گورى ءوزىمىز وندىرۋگە جانە قايتا وڭدەۋگە كوشەمىز. جاڭا جوبا وڭىرلىك دامۋعا ۇلەس قوسىپ, سالا ءۇشىن كادرلار دايارلاۋ مۇمكىندىگىن اشادى. باستى ارتىقشىلىقتىڭ ءبىرى – جاڭا جۇمىس ورىندارىن قۇرۋ. بولاشاق كاسىپورنىمىز 50 تۇراقتى جۇمىس ورنىن اشۋعا نيەتتى. ءوندىرىستى وقشاۋلاۋ جەرگىلىكتى شاعىن جانە ورتا بيزنەس ءۇشىن مۋلتيپليكاتيۆتى جانە قوسىمشا پايدا اكەلەدى دەپ ۇمىتتەنەمىز. بۇل – جەرگىلىكتى بيزنەس ءۇشىن ناقتى پەرسپەكتيۆا, – دەگەن ديرەكتورلار كەڭەسىنىڭ مۇشەسى – «ەۋروپالىق قۇبىر جۇيەلەرى» جشق كوممەرتسيالىق ديرەكتورى ا.ارۋتيۋنوۆ جوباعا ينۆەستيتسيا سالۋعا دايىن ەكەندەرىن جەتكىزدى. جوبانى جۇزەگە اسىرۋ ءۇشىن «ەۋروپالىق قۇبىر جۇيەلەرى» جشق باستاپقى كەزەڭدە 5 ميلليون دوللار قاراجات ءبولۋدى قاراستىرىپ وتىر.
ءداستۇرلى بولات قۇبىرلارمەن سالىستىرعاندا كەم دەگەندە 50 جىلدىق ۇزاقمەرزىمدى كەپىلدىك جانە سالقىنداتقىشتىڭ گيدراۆليكالىق وتكىزگىشتىگىنىڭ جاقسارۋى, ءابسوليۋتتى كەدىر-بۇدىرلىقتىڭ تومەندىگى, سونداي-اق بىتەلۋ مەن شوگىندىلەردىڭ جينالۋ قاۋپىنىڭ بولماۋى سياقتى سيپاتتامالارى بۇل ونىمگە باسىمدىق بەرەدى. زاۋىتتىڭ وندىرىستىك قۋاتى جىلىنا كەمىندە 200 كم قۇبىر ءونىمىن قۇرايدى. جوبا اۆتورلارىنىڭ سوزىنە سەنسەك, جاڭا تەحنولوگيالاردى قولدانۋ كەزىندەگى جىلۋ جەلىلەرى مەن ىستىق سۋمەن جابدىقتاۋدىڭ شىعىندارىن بولات قۇبىرلارىن سالۋعا كەتەتىن شىعىندارمەن سالىستىرۋعا بولادى. ۇزاقمەرزىمدى پەرسپەكتيۆادا قولدانىلاتىن قۇبىرلار اپاتتىق رەجىمدەردىڭ جانە قۇبىرلاردىڭ جارىلۋىنا بايلانىستى وقيعالاردىڭ بولماۋى ەسەبىنەن پايدالانۋ شىعىندارىن بارىنشا ازايتۋعا مۇمكىندىك بەرەدى, بۇل قالا جانە ءوڭىر تۇرعىندارى ءۇشىن جىلۋ ەنەرگياسىنىڭ تاريفتەرىنە پايدالى اسەر ەتەدى ەكەن.
– تەحنولوگيانىڭ ەرەكشەلىگىن ەسكەرە وتىرىپ, جوعارى ساپالى ءونىم وندىرۋمەن اينالىساتىن زاۋىت بەلگىلەنگەن مەرزىمدە پايدالانۋعا بەرىلۋگە ءتيىس. ماڭعىستاۋ وبلىسىنىڭ اكىمدىگى قولدانىستاعى زاڭناما شەڭبەرىندە جەر ۋچاسكەسىن بەرۋ, «اقتاۋ تەڭىز پورتى» ارنايى ەكونوميكالىق ايماعىنىڭ اۋماعىندا قاجەتتى ينجەنەرلىك كوممۋنيكاتسيالاردى جۇرگىزۋ ۇدەرىسىنە جاردەمدەسۋدى قوسا العاندا, الەۋەتتى ينۆەستورعا جان-جاقتى قولداۋ كورسەتۋگە دايىن. جوبانى ىسكە اسىرۋ اقتاۋ قالاسىنىڭ تۇرعىندارىن ساپالى جىلۋ ەنەرگياسىمەن جانە ىستىق سۋمەن قامتاماسىز ەتۋگە, ەنەرگيا تيىمدىلىگى مەن ەنەرگيا ۇنەمدەۋدى ارتتىرا وتىرىپ, ەنەرگيا شىعىندارىن تومەندەتۋگە باعىتتالعان, – دەدى ماڭعىستاۋ وبلىسىنىڭ اكىمى ن.نوعاەۆ.
ماڭعىستاۋدا ەكىجاقتى جوبالارعا تالاي قول قويىلىپ قۋانتقان, بىراق بۇگىندە وتاندىق ءونىمدى كول-كوسىر ءوندىرىپ جاتقاندارى شامالى. بۇل جوبا دا جوعالىپ كەتە مە, جوق الدە ءونىمدى كاسىپورىن بولا ما, ول جاعىن ۋاقىت كورسەتەدى.
ماڭعىستاۋ وبلىسى