«بارمىسىڭ, باۋىرىم؟» راديو حابارىنىڭ جۇرگىزۋشىسى, تۋعان اناسىن ىزدەپ جۇرگەن بەلگيالىق ازامات ەددي جان ساۆەلەۆتىڭ قازاقستانداعى زاڭدى وكىلى, جۋرناليست قىمبات دوسجان بالا ساتۋعا بايلانىستى قوزعالعان قىلمىستىق ءىستىڭ نەلىكتەن قىسقارتىلىپ قالعانىن ايتتى, دەپ جازادى Egemen.kz.
«سۇراۋى بار» يۋتۋب ارناسىندا جاريالانعان سۇحباتىندا قىمبات دوسجان 20 جىل بۇرىن ارقالىق قالاسىنان بەلگيالىق ايەلگە ساتىلعان جانىبەك-ەددي جان ساۆەلەۆتىڭ جازعان ارىزى بويىنشا قوزعالعان قىلمىستىق ءىس بىردەن قىسقارتىلعانىن جەتكىزدى.
«2002 جىلدىڭ 17 قاڭتارىندا قوستاناي وبلىسى, ارقالىق قالاسىنىڭ پەرزەنتحاناسىندا ومىرگە كەلگەن جانىبەكتىڭ تەگى جۇماعۇلوۆ بولعان. پەرزەنتحانادا اناسى «بالامنان باس تارتامىن» دەپ ەشقانداي ارىز جازباعان. ءبىر اپتادان كەيىن ء«ۇي-جايىمدى رەتتەپ كەلەيىن» دەپ اناسى پەرزەنتحاناعا تاستاپ كەتەدى-ءمىس. جانىبەكتىڭ اناسى قولحاتتى مەديتسينا قىزمەتكەرىنىڭ ايتۋىمەن جازعان. پەرزەنتحانا باسشىسىنىڭ اتىنا جانىبەكتىڭ اناسىنىڭ «ۇيىمە بارىپ كەلەيىن» دەپ سۇرانۋ ماقساتىندا جازعان قولحاتىن دا تاپتىق.
پوليتسيا قىزمەتكەرلەرى «سالعىرتتىق» بابىمەن قىلمىستىق ءىستى 5 قاڭتار كۇنى قوزعادى, پروكۋراتۋرا وكىلدەرى «مۇنداي باپقا ساي ەمەس, ارادا 20 جىل ءوتتى» دەپ قىلمىستىق ءىستى 13 قاڭتاردا قىسقارتىپ وتىر. ماعان قاۋلىسىن دا جىبەردى», دەدى جۋرناليست.
ەددي جان ساۆەلەۆتىڭ زاڭدى وكىلى قىمبات دوسجان «سالعىرتتىق» بابى بويىنشا قىلمىس قۇرامى جوق دەپ قىسقارتىلعان ىستەن كەيىن باس پروكۋرور بەرىك اسىلوۆتىڭ اتىنا ارىز جازىپ, «كامەلەتتىك جاسقا تولماعان بالانى شەتەلگە اسىرۋ» بابى بويىنشا قىلمىستىق ءىس قوزعاۋدى سۇراعانىن ايتتى.