ومىردە توسىن, توتەنشە جاعدايلار بولماي تۇرمايدى. قيىن كەزدە قينالعاننىڭ قاسىنان تابىلىپ, اۋىرتپالىعىن بىردەي كوتەرىسەتىن قۇتقارۋشىلاردىڭ ورنى بولەك.
ماڭعىستاۋ وبلىسىندا قۇتقارۋ قىزمەتى 1995 جىلى قۇرىلدى. سودان بەرى اپاتتى جاعداي مەن ءورتتى جويۋ بولىمشەلەرى 80 مىڭنان اسا قۇتقارۋ قىزمەتىن جۇزەگە اسىرعان. وسى ۋاقىت ارالىعىندا قۇتقارۋشىلاردىڭ كاسىبيلىگى مەن جەدەلدىگىنىڭ ناتيجەسىندە 5 مىڭعا جۋىق ادام قۇتقارىلىپ, زارداپ شەككەندەرگە مەديتسينالىق كومەك كورسەتىلىپ, تج-نىڭ ءتۇرلى ايماقتارىنان 18 مىڭنان اسا ادام ەۆاكۋاتسيالانعان.
وڭىرلىك ازاماتتىق قورعانىس باسقارماسىنىڭ باستىعى راتبەك دەمەۋبەرگەننىڭ ايتۋىنشا, وڭىرىمىزدە بىلتىر قۇتقارۋشىلاردىڭ كومەگىمەن 300-دەن اسا ادام قۇتقارىلىپ, 600-گە جۋىق ادام ەۆاكۋاتسيالانعان, سونداي-اق 70-تەن اسا ازاماتقا العاشقى مەديتسينالىق كومەك كورسەتىلگەن.
– قۇتقارۋشى ماماندىعى ەڭ سۇرانىسقا يە جانە قۇرمەتتى مامانداردىڭ ءبىرى بولىپ قالا بەرەدى. قۇتقارۋشىلار قيىندىققا تاپ بولعان ادامدارعا كومەككە اسىعادى, ولاردىڭ ءومىرى ءۇشىن كۇرەسەدى, كۇن سايىن دەرلىك تۇزاققا تۇسەتىن جانۋارلاردى دا كومەكسىز قالدىرمايدى, – دەدى راتبەك دەمەۋبەرگەن.
وڭىردە تۇراقتى نەگىزدە الدىن الۋ جۇمىستارى جۇرگىزىلۋىنە قاراماستان, توتەنشە وقيعالار مەن ءورت تۇتانۋ جايتتارى ءجيى تىركەلەدى. ال جاز ايلارىندا, ياعني تەڭىزگە شومىلۋ ماۋسىمىندا سۋعا كەتۋ وقيعالارى ورىن الادى. تۇرعىنداردىڭ تىيىم سالىنعان جەرلەردەن سۋعا ءتۇسۋىنىڭ سوڭى قايعىلى, قيىن جاعدايلارعا دۋشار ەتەدى.
سۋدان قۇتقارۋدىڭ قيىندىعىمەن بەتپە-بەت كەلگەندەردىڭ ءبىرى – ماڭعىستاۋ وبلىسى تجد ء«وس جانە اقجق» مم جەدەل قۇتقارۋ جاساعىنىڭ باس قۇتقارۋشىسى جولداسوۆ قۇرالباي. بىلتىر ءساۋىر ايىندا اقتاۋ قالاسى 4ا شاعىن اۋدانى تۇسىندا تەڭىز جاعالاۋىندا سۋعا تۇسۋگە تىيىم سالىنعان اۋماقتا ۇگىت-ناسيحات جۇمىستارىن جۇرگىزۋ كەزىندە باس قۇتقارۋشى قۇرالباي وسەرباي ۇلى سۋعا باتىپ بارا جاتقان جاسوسپىرىمدەردى بايقادى. ولار ۇلكەن تولقىن سالدارىنان جاعاعا جۇزە الماي, سۋعا باتا باستاعان. قۇرالباي دەرەۋ قۇتقارۋ شەڭبەرىن لاقتىرعانمەن, جاسوسپىرىمدەر قۇتقارۋ شەڭبەرىن ۇستاي المايدى. ءوز ءومىرىن قاتەرگە تىككەن قۇرالباي ويلانباستان سۋعا سەكىرىپ, ەكى ءجاسوسپىرىمدى جان-دارمەنىمەن سۋدان الىپ شىعادى. قۇرالباي باتىردىڭ ارقاسىندا 2011 جىلى جانە 2016 جىلى تۋعان ەكى ءجاسوسپىرىم اجال تىرناعىنان اراشالانىپ, وتباسىنا ورالادى.
بۇل – باس قۇتقارۋشى قۇرالباي وسەرباي ۇلىنىڭ باسىنان وتكىزگەن قۇتقارۋ وپەراتسيالارىنىڭ بىرەۋى عانا. ازاماتتىق قورعاۋ ورگاندارىندا 2019 جىلدىڭ ماۋسىم ايىنان باستاپ جۇمىس ىستەيتىن قۇرالباي ءوز ەڭبەگىن ادال اتقارۋىمەن, سۋاستى ىزدەستىرۋ جۇمىستارىن ۇزدىك اتقارۋىمەن تانىلىپ, ءوزىنىڭ بىلىكتى مامان ەكەنىن ۇنەمى كورسەتىپ كەلەدى, ياعني قىزمەت جەلىسى بويىنشا جۇمىس تاجىريبەسى مول. ارىپتەستەرىنىڭ ايتۋىنشا, ول – ءوزىنىڭ تاجىريبەسىن جاستارعا ۇيرەتىپ, ۇجىمنىڭ قوعامدىق ومىرىنە بەلسەندى تۇردە ارالاسىپ جۇرەتىن ۇجىمعا سىيلى مامان.
قيىن ساتتە ءومىرىن قاۋىپكە تىگىپ, وزگەلەرگە كومەكتەسەتىن توتەنشە جاعداي قىزمەتى سالاسى ماماندارىنىڭ ءار كۇنى, ءار ءساتى قيىندىققا تولى. ولار ەلدىڭ تىنىشتىعىنا, دامۋىنا ازاماتتىق ۇلەسىن قوسىپ كەلەدى.
ماڭعىستاۋ وبلىسى