قر ۇلتتىق عىلىم اكادەمياسىنىڭ جاڭا پرەزيدەنتى تاعايىندالدى

«مەملەكەت باسشىسىنىڭ وكىمىمەن اقىلبەك قاجىعۇل ۇلى كۇرىشباەۆ قازاقستان رەسپۋبليكاسىنىڭ ۇلتتىق عىلىم اكادەمياسىنىڭ پرەزيدەنتى لاۋازىمىنا تاعايىندالدى», دەلىنگەن رەسمي حابارلامادا.

اقىلبەك كۇرىشباەۆ 1961 جىلعى 13 ساۋىردە الماتى قالاسىندا دۇنيەگە كەلگەن.

اۋىل شارۋاشىلىعى عىلىمدارىنىڭ دوكتورى, پروفەسسور, قازاقستان رەسپۋبليكاسى ۇلتتىق عىلىم اكادەمياسىنىڭ جانە رەسەي اۋىلشارۋاشىلىق عىلىمدارى اكادەمياسىنىڭ اكادەميگى. ا. ي. باراەۆ اتىنداعى سىيلىقتىڭ لاۋرەاتى, 200-دەن اسا جاريالانىمنىڭ, 4 مونوگرافيانىڭ اۆتورى.

1983 جىلى اقىلبەك كۇرىشباەۆ قازاق اۋىلشارۋاشىلىق ينستيتۋتىن «اگروحيميا جانە توپىراقتانۋ» ماماندىعى بويىنشا ۇزدىك ءبىتىردى.

1977 جىلى ەڭبەك جولىن الماتى وبلىسى تالعار اۋدانىنداعى مرسحو بىرلەستىگىندە كومباينەر بولىپ باستاعان.

1983 جىلى ۆ.ۆيليامس اتىنداعى قازاق ەگىنشىلىك عىلىمي-زەرتتەۋ ينستيتۋتىنىڭ لابورانتى بولعان.

1984 جىلى اسپيرانتۋراعا وقۋعا تۇسكەن.

1986 – 1997 جىلدار ارالىعىندا ۆ.ۆيليامس اتىنداعى قازاق ەگىنشىلىك عىلىمي-زەرتتەۋ ينستيتۋتىندا كىشى عىلىمي قىزمەتكەر, كاسىپوداق توراعاسى, اعا عىلىمي قىزمەتكەر, ديرەكتوردىڭ عىلىم جونىندەگى ورىنباسارى لاۋازىمدارىندا قىزمەت اتقارعان.

1997 – 2002 جىلدارى ا.ي.باراەۆ اتىنداعى استىق شارۋاشىلىعى عىلىمي-زەرتتەۋ ينستيتۋتىنىڭ ديرەكتورى بولعان.

2002 – 2005 جىلدارى قازاقستان رەسپۋبليكاسىنىڭ اۋىل شارۋاشىلىعى ۆيتسە-ءمينيسترى لاۋازىمىن اتقارعان.

2006 جىلى قر اشم عىلىم دەپارتامەنتىنىڭ ديرەكتورى بولىپ تاعايىندالدى.

2007 جىلى قازاقستان رەسپۋبليكاسىنىڭ اۋىل شارۋاشىلىعى ۆيتسە-ءمينيسترى بولىپ قايتا تاعايىندالعان.

2008 – 2011 جىلدارى قازاقستان رەسپۋبليكاسىنىڭ اۋىل شارۋاشىلىعى ءمينيسترى لاۋازىمىن اتقارعان.

2011 – 2020 جىلدارى «س.سەيفۋللين اتىنداعى قازاق اگروتەحنيكالىق ۋنيۆەرسيتەتى» اكتسيونەرلىك قوعامىنىڭ باسقارما توراعاسى بولعان.

2020 جىل تامىز ايى – 2022 جىلى قازان ايى ارالىعىندا قازاقستان رەسپۋبليكاسى پارلامەنتى سەناتىنىڭ دەپۋتاتى بولعان.

2022 جىلى 1 قاراشادا «قازاق ۇلتتىق اگرارلىق زەرتتەۋ ۋنيۆەرسيتەتى» كەاق باسقارما توراعاسى – رەكتورى لاۋازىمىنا تاعايىندالدى.