ماڭعىستاۋ وبلىسىنىڭ شەكاراسىنا ەنەتىن اۋماقتىڭ جالپى اۋدانى 721,940,2365 گەكتاردى, ياعني 722 مىڭ گەكتارعا جۋىق اۋداندى قۇرايدى. قۇزىرلى ورىندار ماماندارى بۇل ۋچاسكەنىڭ قازاقستان شەكاراسىنا قانداي دا ءبىر وزگەرىستەر اكەلمەيتىندىگىن جانە ەلىمىزدىڭ سۋ قورى جەرلەرىنىڭ ساناتىنا جاتاتىندىعىن ايتادى.
وبلىس شەكاراسى بۇرىن كاسپي تەڭىزىنىڭ جاعالاۋىندا اياقتالاتىن. وسىعان بايلانىستى, تەڭىز جاعاسىنداعى باستاپقى سىزىق وبلىس اۋماعىنا ەنگىزىلدى. بۇل وزگەرىس ءوڭىردىڭ ەكونوميكالىق دامۋىن قارقىنداتىپ, ونىڭ ىشىندە ءتۋريزمدى ىنتالاندىرادى, جاعالاۋدا سالىنعان نىسانداردى زاڭداستىرۋ ارقىلى بيۋدجەت تۇسىمدەرىن ارتتىرادى. وبلىس شەكاراسى مەن كاسپي تەڭىزى اكۆاتورياسىنىڭ باستاپقى سىزىعى اراسىنداعى اۋماقتى قوسۋ ارقىلى ماڭعىستاۋ ءوڭىرى شەكاراسىنداعى وزگەرىستەردى سيپاتتايتىن قاۋلى جوباسى 2023 جىلعى شىلدەدە «اشىق نقا» پورتالىندا جاريالاندى. بۇل جوبا ۇلتتىق كاسىپكەرلەر پالاتاسى, ساراپتامالىق كەڭەستەر جانە سىبايلاس جەمقورلىققا قارسى عىلىمي ساراپتامانىڭ قورىتىندىلارىن الدى.
ۇكىمەت قاۋلىسى قابىلدانعاننان كەيىن بۇل جەر ۋچاسكەلەرى وبلىستىڭ جەر رەزەرۆىنە ەنگىزىلىپ, اقتاۋ قالاسىندا, قاراقيا جانە تۇپقاراعان اۋداندارىندا تەڭىز جاعالاۋلارىن ءبولۋ جۇمىستارى جۇرگىزىلەدى.
ماڭعىستاۋ وبلىسى