كوزى تىرىسىندە-اق ەرەن ەڭبەگى ەلەنىپ, حالىق كوسەمىنە اينالعان دىنمۇحامەد قوناەۆتىڭ ورنى بولەك. «قۇدايدىڭ سۇيگەن ق ۇلى سول ەمەس پە, كەمەڭگەر ۇل قوناەۆ دىنمۇحامەد» دەپ اقىندار جىرعا قوسسا, جۇرتشىلىقتىڭ «ديمەكەڭ», «ديماش اعا» دەپ ەركەلەتىپ اتاۋى سوم تۇلعانىڭ ەل جۇرەگىنەن ەلەۋلى ورىن العانىنىڭ اينىماس ايعاعى.
دىنمۇحامەد قوناەۆتى جاس ۇرپاققا تانىستىرۋ ماقساتىندا ءارتۇرلى جيناقتار جارىق كورىپ كەلەدى. بىلتىر عانا «ول كىم؟» سەرياسى بويىنشا «مازمۇنداما» باسپاسىنان «دىنمۇحامەد قوناەۆ كىم؟» اتتى كىتاپشا جارىق كورگەن ەدى. جيناقتا ديماش احمەت ۇلىنىڭ ءومىرى مەن قىزمەتى جايلى بالالار بىلۋگە ءتيىس مالىمەتتەر جان-جاقتى قامتىلعان. كىتاپشا اۆتورى سەرىكبول حاسان جيناقتىڭ بالالار ءۇشىن ماڭىزى جوعارى ەكەنىن اتاپ ءوتتى.
– بۇل كىتاپتىڭ ماقساتى – بالالارعا دىنمۇحامەد قوناەۆتىڭ ءومىر جولىن, ەكى رەت ۇكىمەت, ەكى رەت مەملەكەت باسقارعان ەڭبەگىن تۇسىنىكتى ەتىپ جازىپ شىعۋ بولاتىن. ىرگەلى كەزدەسۋلەرى مەن ۇلكەن ءوندىرىس ورىندارىن سالۋى سەكىلدى تاريحي وقيعالاردى دا قامتۋعا تىرىستىق. جالپى, بۇل جيناق – قوناەۆتىڭ ەكى كىتابى, باسقا دا تۇلعا جونىندە ەستەلىك كىتاپتاردى شولىپ وقىپ شىعىپ, سول كىتاپتاردىڭ نەگىزىندە بالالارعا لايىقتاپ قايتا جازىلعان دۇنيە. جالپى مۇنى ەرەكشە جاڭالىعى بار زەرتتەۋ كىتاپ ەمەس, بالالارعا ارنالعان تانىمدىق كىتاپشا دەپ ايتساق بولادى. جالپى, «ول كىم؟» سەرياسى بويىنشا ءتورت كىتاپقا اۆتورلىق ەتتىم», – دەيدى اۆتور.
ال بەلگىلى قالامگەر وراز قاۋعاباي «قوناەۆتىڭ 12 قاسيەتى» كىتابىندا ءال-فارابي دانالىعى بويىنشا كەمەڭگەر پاتشاعا ءتان «12» قاسيەتتىڭ دەگدار تۇلعانىڭ بويىندا تۇگەل توعىسقانىن تاراتىپ جازادى.
– ءال-ءفارابيدىڭ دانالىعىندا كەمەڭگەر باسشى ءوزىنىڭ سۇيەك-سىنى, سىرتقى تۇلعاسى ارقىلى ەرەكشە كورىنۋى كەرەك. ياعني ول ادام وتە سىمباتتى ء«مىنسىز, مۇسىندەي ادەمى, ءيمانجۇزدى بولۋعا ءتيىس». ديمەكەڭ جاراتىلىسىنان كورىكتى, بويشاڭ جانە جۇزىنەن نۇر توگىلىپ تۇراتىن ءيمانجۇزدى كىسى ەدى. كەڭەستىك داۋىردەگى مەملەكەت قايراتكەرلەرىنىڭ ىشىندەگى ەڭ سىمباتتى, بوي جاعىنان دا, وي جاعىنان دا ەرەكشە بولەك تۇلعا ديمەكەڭ ەكەنى بەلگىلى. ەكىنشى قاسيەتى تۋرالى ءال-فارابي ول ادام «وزىنە ايتىلعان ءسوزدىڭ ءبارىن تەرەڭ تۇسىنەتىن جانە ءىستىڭ جاي-جاعدايىنا سايكەس جان- جاقتى تەز ۇعىپ الاتىن اسا زەرەك بولۋى كەرەك» دەيدى. ديمەكەڭنىڭ زەرەكتىگى مەن ءبارىن ءبىلىپ, سەزىپ تۇراتىن ايرىقشا قاسيەتى جونىندە قاسىندا جۇرگەن سەرىكتەرى قازىرگە دەيىن تاڭدانا ايتادى,– دەيدى اۆتور كىتابىندا.
سونىمەن قاتار جيناقتا د.قوناەۆتىڭ قاپشاعاي سۋ قويماسىن سالۋداعى باتىل شەشىمى, مەدەۋ شاتقالىنا بايلانىستى تاۋەكەلدەرى, حالقى ءۇشىن بارىنە بارۋعا دايار شىنايى ۇلت پەرزەنتى ەكەنى كەڭىرەك جازىلعان.
اقيقات قارتايمايدى. ول بولاشاققا جاڭا, ساف كۇيىندە جەتىپ وزىنەن قازىنا تاراتپاق. بىزدىڭشە, قوناەۆ قازىناسى – ءالى تولىق اشىلماعان, تيىسىنشە زەردەلەنبەگەن بەكزات دۇنيە.