سەنات توراعاسىنىڭ ورىنباسارى ولگا پەرەپەچينا مەن سەناتور اسەم راحمەتوۆا سولتۇستىك قازاقستان وبلىسىنا ساپارى اياسىندا پەتروپاۆل قالاسى مەن قىزىلجار اۋدانىندا بىرقاتار كەزدەسۋ وتكىزدى.
دەپۋتاتتار قيار وسىرۋگە ماماندانعان جاڭا جىلىجاي كەشەنىندە بولدى. ايماق تۇرعىندارىن جۇمىسپەن قامتاماسىز ەتىپ وتىرعان بۇل كاسىپورىن وبلىس حالقىنىڭ قيارعا دەگەن سۇرانىسىنىڭ شامامەن 30%-ىن قاناعاتتاندىرا الادى. سەناتورلار سونىمەن قاتار قىزىلجار اۋدانىندا اۋداندىق ءماسليحات دەپۋتاتتارىمەن, قوعامدىق كەڭەس مۇشەلەرىمەن جانە اۋدان اكتيۆىمەن كەزدەستى. كەزدەسۋگە قاتىسۋشىلار مەملەكەت باسشىسىنىڭ «Egemen Qazaqstan» گازەتىنە بەرگەن سۇحباتىندا ەلىمىزدىڭ وڭىرلەرىن الەۋمەتتىك-ەكونوميكالىق ودان ءارى دامىتۋعا باعىتتالعان نەگىزگى تۇجىرىمدارىن تالقىعا سالدى. كەزدەسۋ بارىسىندا اۋدان ورتالىعىندا زاماناۋي تۇردەگى جاڭا ەمحانا سالۋ تۋرالى ماسەلە كوتەرىلدى. دەپۋتاتتار بۇل ماسەلەنى جەدەل شەشۋدىڭ ماڭىزدىلىعىن اتاپ ءوتىپ, ونى باقىلاۋعا الاتىنىن جەتكىزدى.
سەناتورلار سونىمەن قاتار قىزىلجار اۋدانىنداعى №3 بەشكول ورتا مەكتەبىندە بولدى. دەپۋتاتتار وقۋ ۇدەرىسىنىڭ ەرەكشەلىگىمەن تانىستى جانە مۇعالىمدەر قاۋىمىمەن جۇزدەستى. سونداي-اق سەنات قىزمەتىنىڭ نەگىزگى قورىتىندىلارى, ەلىمىزدە جۇزەگە اسىپ جاتقان ساياسي جانە الەۋمەتتىك-ەكونوميكالىق رەفورمالار تۋرالى اڭگىمەلەدى.
دەپۋتاتتار وبلىس اكىمى عاۋەز نۇرمۇحامبەتوۆپەن كەزدەستى. وبلىس باسشىسى سەناتورلاردى جىل قورىتىندىلارى مەن الداعى كەزەڭگە ارنالعان جوسپارلار تۋرالى حاباردار ەتىپ, پارلامەنتشىلەردى جىلىتۋ ماۋسىمى جانە كوكتەمگى سۋ تاسقىنىنا دايىندىق جاعدايىمەن تانىستىردى. سەناتورلار ءوز كەزەگىندە تۇرعىندار جولداعان حاتتاردا ايتىلعان بىرقاتار پروبلەمالىق ماسەلەگە توقتالدى جانە ازاماتتاردى قولداۋ, كاسىپكەرلىكتى دامىتۋ جونىندەگى سەنات قابىلداعان زاڭدار تۋرالى ءمالىم ەتتى.