استانا, الماتى قالالارىنداعى قارۋلى كۇشتەردىڭ اسكەري قىزمەتشىلەرى ەكىنشى دۇنيەجۇزىلىك سوعىستىڭ ارداگەرلەرىن كەلە جاتقان جاڭا جىلمەن قۇتتىقتادى. استانادا قورعانىس مينيسترلىگى وكىلدەرى «قارۋلى كۇشتەردىڭ ارداگەرلەرى» رەسپۋبليكالىق قوعامدىق بىرلەستىگىمەن بىرلەسىپ ەكى مايدانگەرگە باردى. استانا قالاسى قورعانىس ىستەرى جونىندەگى دەپارتامەنت وكىلى زاپاستاعى پولكوۆنيك عاني ارتىقوۆ وسى كۇندەرى ەلوردادا ەكىنشى دۇنيەجۇزىلىك سوعىسىنا قاتىسقان 7 ارداگەر تۇراتىنىن, جىل وتكەن سايىن مايدانگەرلەر ازايىپ بارا جاتقانىن, ءار ارداگەر – ءتىرى تاريح ەكەنىن, جەڭىستىڭ وڭاي كەلمەگەنىن وسكەلەڭ ۇرپاق ءبىلۋ كەرەكتىگىن اتاپ ءوتتى. سونىمەن قاتار الماتى اسكەري قىزمەتشىلەرى مايدانگەردىڭ ۇيىنە باردى, دەپ حابارلايدى Egemen.kz مينيسترلىك سايتىنا سىلتەمە جاساپ.
استانا اسكەري قىزمەتشىلەرى ۇيىنە بارعان رزاعۇل بايكەشەۆ 1923 جىلى 18 قازاندا اقتوبە وبلىسىنا قاراستى مۇعالجار اۋدانىندا دۇنيەگە كەلگەن. رجەۆ شايقاسىنا, ۆەليكولۋكسكىگە شابۋىلداۋ وپەراتسياسىنا, پولشانى, رۋمىنيانى, ۆەنگريانى ازات ەتۋ شايقاستارىنا قاتىسقان, ءتۇرلى وردەندەرمەن جانە مەدالدارمەن ماراپاتتالعان. سوعىستان كەيىن ول روجدەستۆەنكا سوۆحوزىندا ەكسپەديتور بولىپ جۇمىس ىستەپ, 1983 جىلى زەينەتكە شىققان.
اسكەري قىزمەتشىلەر رايسا سافونيچەۆا تۇراتىن ەلوردالىق قارتتار مەن مۇگەدەكتەرگە ارنالعان مەديتسينالىق-الەۋمەتتىك مەكەمەگە باردى. ول 1925 جىلى 10 شىلدەدە باشقۇرت اسسر, تاشكەنت اۋدانى, شينچياككۋل اۋىلىندا دۇنيەگە كەلگەن. 1944 جىلى ناۋرىز ايىندا گوركي قالاسىنداعى سورموۆ اۋداندىق اسكەري كوميسسارياتىنان مايدانعا ءوز ەركى بويىنشا شاقىرىلعان. مينسك قالاسىندا قىسقا مەرزىمدىك بايلانىس كۋرسىن ءتامامداپ, ەكىنشى ۋكراينا مايدانىنا جىبەرىلگەن. كيەۆ, بەسسارابيا, رۋمىنيا, ۆەنگريا ءۇشىن بولعان شايقاستارعا قاتىسىپ, جەڭىستى بۋداپەشت ماڭىندا قارسى الدى. وردەندەرمەن ءھام مەدالدارمەن ماراپاتتالعان. سوعىستان كەيىن 1946 جىلى رەسەيگە ورالعان ونى كومسومولدىق جولدامامەن تىڭ جەرلەردى يگەرۋ ءۇشىن قازاقستانعا جىبەرەدى. جامبىل گەولوگيالىق بارلاۋ ەكسپەديتسياسىندا اسپاز بولىپ جۇمىس ىستەدى. زەينەتكە شىققاننان كەيىن دە قوعامدىق جۇمىستارعا بەلسەنە قاتىسىپ, قالالىق ارداگەرلەر كەڭەسىنىڭ مۇشەسى بولدى.
قورعانىس ۆەدومستۆوسىنىڭ وكىلدەرى رزاعۇل بايكەشەۆ پەن رايسا سافونيچەۆانى قۇتتىقتاپ, جەڭىستىڭ 80 جىلدىعىن جاۋىنگەرلىك رۋحتا امان-ەسەن قارسى الۋلارىنا تىلەكشىلىك ءبىلدىردى, گۇلدەر, ەستەلىك سىيلىقتار تابىستادى. ولارعا ۇلتتىق اسكەري-پاتريوتتىق ورتالىعى ورتالىق اسكەري ءانسامبلى مۋزىكانتتارى سوعىس جىلدارىنداعى اندەردى ورىنداپ بەردى. ءوز كەزەكتەرىندە ارداگەرلەر اسكەري قىزمەتشىلەرگە بەيبىتشىلىك, اماندىق, قىزمەتتە تابىس تىلەدى.
الماتى قالاسىندا دا دەسانتتىق-شابۋىلداۋ اسكەرلەرىنىڭ اسكەري قىزمەتشىلەرى مەن ماتەريالدىق قامتاماسىز ەتۋ پولكىنىڭ وتباسىمەن جۇمىستى ۇيىمداستىرۋ قىزمەتىنىڭ وكىلدەرى ەكىنشى دۇنيەجۇزىلىك سوعىسىنىڭ ارداگەرى ەگور دوليدۋدانى 96 جاسقا تولعان تۋعان كۇنىمەن جانە جاڭا جىلمەن قۇتتىقتادى.
ول دا سىبىرلىك, كراسنويارسك ولكەسىنىڭ تۋماسى. 1944 جىلى جەلتوقساندا پۋلەمەتشى اتقىش رەتىندە مايدانعا شاقىرىلعان. قيىر شىعىستاعى 184 ديۆيزيانىڭ 297 اتقىشتار پولكىندە قىزمەت ەتكەن ول جەڭىستى جاپونيا شەكاراسىندا قارسى العان. سوعىستان كەيىن مايدانگەر قازاقستانعا كەلەدى. ىشكى ىستەر مينيسترلىگىندە جانە اسكەريلەندىرىلگەن ءورت ءسوندىرۋ بولىمىندە جۇمىس ىستەدى. ەگور دوليدۋدا 1983 جىلى مايور شەنىمەن وتستاۆكاعا شىقتى.
ارداگەر دەسانتشىلاردىڭ ءىلتيپاتتارىنا ريزاشىلىعىن ايتا كەلە, ءوزى وتكەن مايدان جولى, ودان كەيىنگى قىزمەتى تۋرالى اڭگىمەلەپ, سۇيىكتى ءانىن دە شىرقاپ بەردى.