استانا حالىقارالىق اۋەجايى اۋا رايىنىڭ ناشارلاۋىنا بايلانىستى ۋاقىتشا جابىلدى, دەپ حابارلايدى Egemen.kz.
«قولايسىز اۋا رايىنا بايلانىستى استانا حالىقارالىق اۋەجايىنىڭ اۋەايلاعى 30 جەلتوقسان 09:00-12:00 ارالىعىندا جابىق. قازىر ەلوردا اۋەجايىنا قوناتىن 27 اۋە رەيسى كەشىكتىرىلىپ جاتىر. سونداي-اق اۋەجايداعى ۇشۋ-قونۋ ءۇشىن قولايسىز اۋا-رايى ورناۋىنا بايلانىستى اۋەكومپانيالار رەيستەرىن كەيىنگە قالدىرۋعا شەشىم قابىلدادى», دەپ مالىمدەدى اۋەجايدىڭ ءباسپاسوز قىزمەتى.
ايتا كەتسەك, بۇعان دەيىن قولايسىز اۋا رايى سالدارىنان ەلوردا اۋەجايىنان ۇشىپ شىعاتىن 12 رەيس پەن ۇشىپ كەلۋگە ءتيىس 19 رەيستىڭ ۋاقىتتارى كەيىنگە شەگەرىلگەن ەدى.
ال ساعات 10:00-دەگى جاعداي بويىنشا 27 رەيس ءالى دە كەشىكتىرىلىپ جاتىر.
كەشىكتىرىلگەن رەيستەر كەلەسى رەيستەردىڭ كەشىگۋىنە اكەلۋى مۇمكىن. وسىعان بايلانىستى جولاۋشىلار اۋەكومپانيالاردىڭ انىقتامالىق قىزمەتتەرىندە رەيستىڭ مارتەبەسى مەن ۇشۋ ۋاقىتىن الدىن الا ناقتى ءبىلىپ العانى ءجون.
ەگەر اۋە كومپانيانىڭ كىناسىنەن رەيس كەشىكتىرىلگەن جاعدايدا, جولاۋشىلارعا قر-نىڭ زاڭناماسىندا كوزدەلگەن كەشىگۋ ۇزاقتىعىنا بايلانىستى قىزمەتتەر (سالقىن سۋسىندار, ىستىق تاماق, قوناقۇيدە ورنالاستىرۋ) ۇسىنىلادى.