پرەمەر-ءمينيستردىڭ ءبىرىنشى ورىنباسارى رومان سكلياردىڭ توراعالىعىمەن ينۆەستيتسيالاردى تارتۋ جونىندەگى كەڭەستىڭ (ينۆەستيتسيالىق شتاب) كەزەكتى وتىرىسى ءوتتى.
قاتىسۋشىلار ازاماتتاردىڭ قازاقستاننىڭ جەر قورى تۋرالى اقپاراتقا تولىق قولجەتىمدىلىگىن قامتاماسىز ەتۋ ءۇشىن قۇرىلعان «جىلجىمايتىن م ۇلىكتىڭ بىرىڭعاي مەملەكەتتىك كاداسترى» (جمبمك) جۇيەسىن جەتىلدىرۋ ماسەلەلەرىن تالقىلادى. جۇيە اياسىندا جەر ۋچاسكەلەرىن بەرۋدىڭ بارلىق ۇدەرىسى ەلەكتروندىق فورماتقا اۋىستىرىلدى. بۇگىنگى تاڭدا جمبمك ارقىلى 1 ملن-نان استام قىزمەت كورسەتىلدى, 238 مىڭ كاداسترلىق پاسپورت بەرىلدى.
جۇيەنىڭ ەلدىڭ ينۆەستيتسيالىق تارتىمدىلىعىن ارتتىرۋدا ماڭىزدى ءرول اتقاراتىنى اتاپ ءوتىلدى. وسىعان بايلانىستى ورتالىق جانە جەرگىلىكتى اتقارۋشى ورگاندارعا جمبمك-نى قاجەتتى اقپاراتپەن ساپالى تۇردە ۋاقىتىلى تولتىرىپ وتىرۋ تاپسىرىلدى. ۇلتتىق ەكونوميكا مينيسترلىگى مونوپوليستەر تاراپىنان جمبمك-گە دۇرىس ءارى سەنىمدى مالىمەتتەر بەرۋ ۇدەرىسىن باقىلاۋعا الۋى كەرەك.
سونىمەن قاتار وتىرىستا ارنايى ەكونوميكالىق ايماقتاردى دامىتۋ ماسەلەلەرى تالقىلاندى. رومان سكلياردىڭ ايتۋىنشا, ولاردىڭ الەۋەتى ءالى تولىق اشىلماعان. اتاپ ايتقاندا, جاڭا جوبالاردى تارتۋ ءۇشىن قاجەتتى ينفراقۇرىلىمدى جۇرگىزۋ بويىنشا جۇمىستى جانداندىرۋ كەرەك. مەملەكەتتىك ورگاندارعا ناقتى شەشىمدەر دايىنداۋ تاپسىرىلدى.
وعان قوسا ينۆەستيتسيالىق شتاب وتىرىسىندا ەكى ءىرى ينۆەستيتسيالىق جوبانى ىسكە اسىرۋ بارىسى قارالدى.
شىعىس قازاقستان وبلىسىندا «قىزىلقايىڭ» كەن ورنىنا جاقىن جەردە جىلىنا 25 ملن توننا ءونىم شىعاراتىن بايىتۋ كومبيناتى سالىناتىن بولادى. الدىن الا باعالاۋ بويىنشا جوبانىڭ قۇنى 216 ملرد تەڭگەدەن اسپاق. 4 500-گە جۋىق جۇمىس ورنىن قۇرۋ جوسپارلانىپ وتىر. بۇل ءوز كەزەگىندە وبلىستىڭ ەكونوميكالىق الەۋەتىن دامىتۋعا مۋلتيپليكاتيۆتى اسەر بەرەدى.
تۇركىستان وبلىسىنداعى وگەم وزەنىندە سۋ ەلەكتر ستانساسىنىڭ قۇبىرىن سالۋ جونىندەگى ينۆەستيتسيالىق جوبا ەرەكشە ستراتەگيالىق ماڭىزى بار سۋ شارۋاشىلىعى نىساندارىنىڭ تىزبەسىنە ەنگىزىلگەن. جوبانىڭ قۋاتى – جىلىنا 110 ملن م3 اۋىز سۋ جانە 72 مۆت/ساع. ەلەكتر ەنەرگياسى. ونى ىسكە اسىرۋ وڭىردە ەنەرگيا ءوندىرۋدى ۇلعايتۋعا, سونداي-اق 1 ملن-نان استام تۇرعىندى سۋمەن قامتاماسىز ەتۋگە مۇمكىندىك بەرەدى.
مەملەكەتتىك جانە جەرگىلىكتى اتقارۋشى ورگاندارعا وسى ينۆەستيتسيالىق جوبالاردى ىسكە اسىرۋ بويىنشا پروبلەمالىق ماسەلەلەردى قىسقامەرزىمدە شەشۋ تاپسىرىلدى.