ماسكەۋدە العاش رەت وتكىزىلىپ وتىرعان «كاتيۋشا» حالىقارالىق فەستيۆالىندە قازاقستان رەسپۋبليكاسى قارۋلى كۇشتەرى ۇلتتىق اسكەري-پاتريوتتىق ورتالىعى ورتالىق ءانسامبلىنىڭ اعا لەيتەنانت مارس جالعاسباەۆ باسشىلىق جاساعان شىعارماشىلىق ۇجىمى «ۇزدىك ۆوكالدىق انسامبل» نوميناتسياسى بويىنشا لاۋرەات اتاندى, دەپ حابارلايدى Egemen.kz.
قارۋلى كۇشتەر اسكەري قىزمەتشىلەرىنىڭ, ارداگەرلەردىڭ جانە ولاردىڭ وتباسى مۇشەلەرىنىڭ حالىقارالىق دارەجەدەگى «كاتيۋشا» حالىق شىعارماشىلىعى فەستيۆالى رەسەي ارمياسىنىڭ ورتالىق ۇيىندە ءوتتى.
بايقاۋعا قاتىسۋشىلاردىڭ ونەرىن رەسەي قورعانىس مينيسترلىگىنىڭ, اسكەري مادەنيەت مەكەمەلەرىنىڭ, بۇقارالىق اقپارات قۇرالدارىنىڭ وكىلدەرى مەن ونەر شەبەرلەرى باعالادى.
بايقاۋدا قازاقستان ۇجىمى كومپوزيتور يان فرەنكەلدىڭ, راسۋل گامزاتوۆتىڭ سوزىنە جازىلعان «جۋراۆلي» ءانىن ورىندادى.
«مۇنداي ءىس-شارالار شىعارماشىلىق ادامدار ءۇشىن وتە ماڭىزدى دەپ بىلەمىن. بۇل بىرىنشىدەن بىزگە ءارتۇرلى ۇجىمدارمەن, وزىندىك تاسىلدەرمەن تانىسۋعا, شىعارماشىلىق ىزدەنىسىمىزدى كەڭەيتۋگە مۇمكىندىك بەرەدى. حالىقارالىق فەستيۆالدە جەڭىسكە جەتۋ ءبىزدى كادىمگىدەي قاناتتاندىردى. سول سەبەپتى دە تىڭداۋشىلارىمىزعا ءاردايىم جارقىن اسەر سىيلاپ, جۇمىستى جالعاستىرا بەرەمىز», دەدى قر قارۋلى كۇشتەرى ۇلتتىق اسكەري-پاتريوتتىق ورتالىعى باستىعىنىڭ ورىنباسارى – كوركەمدىك جەتەكشى مارس جالعاسباەۆ.
بايقاۋعا ون سەگىز ەلدەن كەلگەن ۆوكالدىق ۇجىمدار, ۆوكالدىق-اسپاپتىق انسامبلدەر مەن سوليستەر قاتىسقانىن ايتا كەتۋ كەرەك.