وڭىردە ۆولونتەرلەر ءاردايىم بەلسەندى, ولاردى بارلىق شارۋانىڭ باسى-قاسىنان كورۋگە بولادى. وبلىستىڭ جاستار ساياساتى ماسەلەلەرى جونىندەگى باسقارماسىنىڭ ءبولىم باسشىسى ابىلاي فازىلبەكتىڭ ايتۋىنشا, ۆولونتەرلىكتى دامىتۋ جونىندەگى 2021-2023 جىلدارعا ارنالعان جول كارتاسىنا سايكەس ۆولونتەرلىك قىزمەتتى جۇيەلى دامىتۋ, باستامالار مەن جوبالاردى قولداۋ جانە ۇيلەستىرۋ ءۇشىن جاستار رەسۋرستىق ورتالىعى جانىنان وبلىستىق «ۆولونتەرلەر فرونت-ءوفيسى» جانە «ۆولونتەرلەر كورپۋسى» توبى قۇرىلعان. توپتىڭ بولىمشەلەرى ءوڭىردىڭ بارلىق قالا-اۋدانىندا جۇمىس ىستەيدى.
«فرونت-ءوفيستىڭ قولداۋىمەن بۇگىنگە دەيىن ۆولونتەرلىك توپتار مەن ۇيىمداردىڭ 1800-گە جۋىق باستاماسى جۇزەگە اسىرىلدى جانە 50-گە جۋىق ۆولونتەرلىك ۇيىم مەن باستاماشىل توپ اكىمشىلىك, اقپاراتتىق جانە كونسۋلتاتسيالىق قولداۋ الدى», دەيدى ا.فازىلبەك.
قازىرگى تاڭدا ماڭعىستاۋ وبلىسىندا ۆولونتەرلىكپەن اينالىساتىن 53 باستاماشىل توپ, 10 ۇكىمەتتىك ەمەس ۇيىم بار. وڭىردە بارلىعى 5 230 ۆولونتەر قىزمەت كورسەتەدى, ونىڭ ىشىندە 14-35 جاس ارالىعىنداعى ۆولونتەر سانى 4 540 ادامدى قۇرايدى. سونداي-اق وبلىس بويىنشا تەحنيكالىق جانە كاسىپتىك ءبىلىم بەرۋ ۇيىمدارىنداعى 21 ۆولونتەرلىك كلۋبتا 1363 ستۋدەنت ۆولونتەرلىك قىزمەتپەن اينالىسادى.
2023 جىلى ءوڭىردىڭ ۆولونتەرلىك ۇيىمدارى مەن باستاماشىل توپتارى جانە مەملەكەتتىك مەكەمە وكىلدەرىنىڭ قاتىسۋىمەن ۆولونتەرلىك قىزمەتتى دامىتۋ جانە ونى جۇيەلەندىرۋ ماسەلەلەرى تالقىلانىپ, ماڭعىستاۋ وبلىسىنىڭ جاستار ساياساتى ماسەلەلەرى باسقارماسىنىڭ تاپسىرىسىمەن ۇەۇ ءۇشىن «جاستار اراسىندا ۆولونتەرلىكتى ناسيحاتتاۋ, جاستار ورتاسىندا الەۋمەتتىك-مادەني بەلسەندىلىكتى ارتتىرۋ, سونداي-اق ماڭعىستاۋ وبلىسىندا ۆولونتەرلىك قوزعالىستى دامىتۋ» تاقىرىبىندا 9 221 ملن تەڭگە سوماسىنا مەملەكەتتىك گرانت جاريالانىپ, «جالىن PRO» قوعامدىق قورى جەڭىمپاز اتاندى. گرانت اياسىندا ايماقتاعى ۆولونتەرلىك توپتار مەن ۇيىمدارعا ارنالعان 300 مىڭ تەڭگە كولەمىندە 15 شاعىن گرانت بەرىلدى. قازىرگى تاڭدا جەڭىمپازدار ءوز جوبالارىن جۇزەگە اسىرىپ كەلەدى. ولاردىڭ اراسىندا ەكولوگيالىق باعىتتاعى, جاس ناۋبايشىلارعا, ءۇي جانۋارلارىن زارارسىزداندىرۋعا ارنالعان, سپورتتىق باعىتتاعى جوبالار بار. اتالعان گرانت اياسىندا ۆولونتەرلىك توپتار مەن ۇيىمداردىڭ كەمىندە 40 جەتەكشىسى كەشەندى وقىتۋدان وتكىزۋ جانە جىل سوڭىنا دەيىن ۆولونتەرلىك باعىتتاعى كەمىندە 30 ءىس-شارا ۇيىمداستىرۋ جوسپارلانعان. جىل باسىنان بىرقاتار ۆولونتەرلىك ۇيىمنىڭ ۇيىمداستىرۋىمەن وڭىردە ەكولوگيالىق اكتسيالار ۇيىمداستىرىلىپ, الەۋمەتتىك جاعىنان از قامتىلعان وتباسىلارعا, جالعىزباستى انالارعا, قارت ادامدارعا ماتەريالدىق, پسيحولوگيالىق كومەكتەر كورسەتىلدى. مىسالى, ء«بىز ادامبىز – ءبىز بىرگەمىز» قورى اي سايىن جالعىزباستى انالارعا تەگىن ماسساج كۋرسىن ۇيرەتىپ, جاعدايى تومەن وتباسىنداعى جانە مۇگەدەكتىگى بار بالالارعا تەگىن ماسساج جاساپ, اي سايىن الەۋمەتتىك جاعىنان از قامتىلعان وتباسىلارعا ارنالعان جارمەڭكە ۇيىمداستىرىپ كەلەدى. ال «اتادان ميراس» قوعامدىق قورى «Biz birgemiz!» جوباسى اياسىندا 320 مۇقتاج وتباسىنى ءبىر ايلىق ازىق-ت ۇلىكپەن قامتاماسىز ەتتى. «كلۋب دوبرياكوۆ» توبى جانە «اقتاۋ قايىرىمدى جاندارى» توبى جالعىزباستى, مۇمكىندىگى شەكتەۋلى جانە كوپبالالى وتباسى ساناتىنا جاتاتىن ازاماتتارعا ۇزدىكسىز الەۋمەتتىك جانە قارجىلاي كومەك كورسەتسە, قۇرىلعانىنا 3 جىل تولعان «كومەك جاڭاوزەن» قايىرىمدىلىق توبى بۇگىنگە دەيىن تۇرمىسى تومەن 39 وتباسىنى باسپانامەن قۋانتتى.
«مۇنداي مىسالدى كوپتەپ كەلتىرۋگە بولادى. جالپى, اتالعان يگى ىستەرگە ۆولونتەرلىك ۇيىمداردان 2 مىڭعا جۋىق ۆولونتەر بەلسەندى تۇردە اتسالىستى. ءوڭىر باسشىسى نۇرلان نوعاەۆتىڭ تاپسىرماسىنا سايكەس 2024 جىلى ايماقتاعى ۆولونتەرلىك باستامالارعا قولداۋ كورسەتۋ جانە ماڭعىستاۋ وبلىسىنىڭ ۆولونتەرلىك فرونت-ءوفيسىنىڭ جۇمىسىن ۇيىمداستىرۋ بويىنشا قارجى قاراستىرىلىپ, مەملەكەتتىك گرانتتار ىسكە اسادى», دەدى ا.فازىلبەك.
ماڭعىستاۋ وبلىسى