حالىقارالىق ۆولونتەرلەر كۇنىنە وراي ەلىمىزدە قىسقى مەيىرىمدىلىك اكتسياسى باستالدى. بۇل تۋرالى حالىقارالىق ۆولونتەرلەر سيمپوزيۋمىندا ايتىلدى. ءىس-شارادا شەتەلدىك سپيكەرلەر الەمدەگى ۆولونتەر قىزمەتىنىڭ جاعدايىن تالقىلاپ, تاجىريبەلەرىمەن ءبولىستى. ولاردىڭ ايتۋلارىنشا, مۇنداي جيىندار ۆولونتەرلىك قاۋىمداستىقتى نىعايتۋعا مۇمكىندىك بەرەدى.
مادەنيەت جانە اقپارات مينيسترلىگى مەن ۇلتتىق ۆولونتەرلىك جەلىنىڭ قولداۋىمەن وتكەن مەرەكەلىك باسقوسۋدا ءماجىلىس دەپۋتاتى ۆەرا كيم قوعامداعى ۆولونتەرلىكتىڭ ماڭىزدىلىعىنا, ونىڭ باسىم باعىتتارى مەن جەتىستىكتەرىنە ءجىتى توقتالدى.
– ەل دامۋىنداعى ۆولونتەرلەردىڭ رولىنە ۆولونتەرلىك جانە قايىرىمدىلىق قىزمەتى ارقىلى الەۋمەتتىك ارىپتەستىكتىڭ الەۋەتىن ارتتىرۋعا مەملەكەت باسشىسى تاراپىنان ەرەكشە نازار اۋدارىلدى. ناتيجەسىندە, ۆولونتەرلىك قوزعالىستىڭ جالپىۇلتتىق اۋقىمى ءوسىپ كەلە جاتىر. وتانداستارىمىزدا جاقسىلىق جاساۋعا, كومەك كورسەتۋگە جانە ءومىرىن جاقسى باعىتقا وزگەرتۋگە دەگەن نيەتى مەن قارىم-قابىلەتى قالىپتاسىپ كەلەدى. وسىناۋ ماڭىزدى كۇندە «ۆولونتەر بولۋ وڭاي» اتتى قىسقى مەيىرىم اپتالىعىنىڭ باستالعانىن حابارلايمىز. مادەنيەت جانە اقپارات مينيسترلىگىنىڭ قولداۋىمەن ۇلتتىق ۆولونتەرلىك جەلى ۇيىمداستىرعان بۇل باستاما قوعام يگىلىگى ءۇشىن ۆولونتەرلىك جوبالاردى ىنتالاندىرۋ جانە جۇزەگە اسىرۋدى كوزدەيدى. يگى باستاما 4-10 جەلتوقسان ارالىعىندا وتەدى, – دەدى دەپۋتات.
ءوز كەزەگىندە مادەنيەت جانە اقپارات ۆيتسە-ءمينيسترى دانيار قادىروۆ رەسپۋبليكالىق جانە حالىقارالىق دەڭگەيدە ۆولونتەرلىكتى دامىتۋ بويىنشا ستراتەگيالىق قۇجاتتار مەن باستامالاردى قابىلداۋدىڭ ماڭىزدىلىعىنا توقتالدى.
– كەلەر جىلى اوسشك-گە مۇشە ەلدەر ۆولونتەرلەر كەزدەسۋىن وتكىزەدى. وسى تۇرعىدا قازاقستان ءوز مىندەتتەمەلەرىن دايەكتى جانە ماقساتتى تۇردە جۇزەگە اسىرىپ, ەل ىشىندە جانە ورتالىق ازيا وڭىرىندە عانا ەمەس, ۆولونتەرلىك قىزمەت پەن ۆولونتەرلەردىڭ دەڭگەيىن جاھاندىق تۇرعىدا ارتتىرۋعا ۇمتىلىپ كەلەدى. بۇل الەۋمەتتىك, ەكونوميكالىق جانە ساياسي سالالارداعى سوڭعى وقيعالارعا بايلانىستى وتە ماڭىزدى, ويتكەنى ۆولونتەرلەر ورتاق ماقساتقا – بەيبىتشىلىك پەن ىزگىلىككە ۇمتىلعان ىزگى نيەتتى ادامدار, – دەپ اتاپ ءوتتى ۆيتسە-مينيستر.
سيمپوزيۋم بارىسىندا ەلىمىزدىڭ ۆولونتەرلىك تاجىريبەسىنەن بولەك, الەمدەگى ۆولونتەرلىك الەۋەتى تۋرالى 2025 جىلعى جانە بۇۇ-نىڭ ورتالىق ازياداعى ۆولونتەرلەردىڭ جاعدايى تۋرالى العاشقى باياندامالاردى دايىنداۋ ءتاسىلى ۇسىنىلدى.
سونداي-اق سەسسيادا قىرعىزستان, تاجىكستان جانە وزبەكستاننىڭ جەتەكشى ۆولونتەرلىك ۇيىمدارىنىڭ وكىلدەرى ءوز وڭىرلەرىندە ۆولونتەرلىك باعىتتىڭ دامۋى تۋرالى اقپاراتپەن ءبولىسىپ, وڭىرلىك دەڭگەيدە ۆولونتەرلىك باستامالاردى ودان ءارى دامىتۋ تۋرالى ۇسىنىس-پىكىرلەرىن ورتاعا سالدى. ءىس-شاراعا مەملەكەتتىك ورگانداردىڭ, حالىقارالىق ۇيىمداردىڭ, شەتەلدىك ەلشىلىكتەردىڭ وكىلدەرى مەن ۆولونتەرلىك قىزمەت سالاسىنداعى ساراپشىلار جيىلدى.