سينوپتيكتەر الداعى ءۇش كۇنگە ارنالعان اۋا رايى بولجامىن ۇسىندى. بولجامعا سايكەس ەلىمىزدە قار مەن جاڭبىر جاۋىپ, كۇن سۋىتادى, دەپ حابارلايدى Egemen.kz.
«قازگيدرومەت» رمك مالىمەتىنشە, جاقىن كۇندەرى قازاقستان اۋماعىنا قارا تەڭىز ايماقتارىنان كەلەتىن تسيكلونعا بايلانىستى شىعىس وڭىرلەردە قار ارالاس جاڭبىر جاۋادى.
«28 قاراشا كۇنى باتىستا, 29 قاراشا كۇنى سولتۇستىك, ورتالىق جانە وڭتۇستىك وبلىستاردا, 30 قاراشادا رەسپۋبليكانىڭ باسىم بولىگىندە تۇمان, كوكتايعاق كۇتىلەدى. 28 جانە 30 قاراشادا سولتۇستىك وبلىستاردا جەلدىڭ ەكپىنى 23-28 م/س دەيىن كۇشەيىپ, قار جاۋادى», دەدى سينوپتيكتەر.
قارا تەڭىز ايماقتارىنان كەلەتىن تسيكلوننىڭ اسەرىن اسىرەسە رەسپۋبليكانىڭ وڭتۇستىك وبلىستارىنىڭ تۇرعىندارى سەزىنەدى. بۇل وڭىرلەردە قار ارالاس جاۋىن جاۋىپ, كۇندىز اۋا تەمپەراتۋراسى 15-24 گرادۋستان 0-12 گرادۋسقا دەيىن تومەندەيدى.