قارجىلىق مونيتورينگ اگەنتتىگى قازاقستان اۋماعىندا ونلاين كازينو قىزمەتىن جۇزەگە اسىراتىن ۇيىمداردىڭ ءتىزىمىن جاريالادى, دەپ حابارلايدى Egemen.ءkz تيىستى ۆەدومستۆونىڭ ءباسپاسوز قىزمەتىنە سىلتەمە جاساپ.
اتالعان ءتىزىم مەملەكەت باسشىسىنىڭ زاڭسىز قۇمار ويىنداردى وتكىزۋدى شەكتەۋ تۋرالى تاپسىرماسىن ورىنداۋ اياسىندا تۋريزم جانە سپورت مينيسترلىگىمەن بىرلەسىپ قۇرىلدى.
ءتىزىم قارجىلىق مونيتورينگ سۋبەكتىلەرىنىڭ زاڭسىز ويىن بيزنەسىنە قارسى ءىس-قيمىل شەڭبەرىندە جانە ءوز قىزمەتىندە پايدالانۋى ءۇشىن قما پورتالىندا ورنالاستىرىلعان.
«ول زاڭسىز ويىن بيزنەسىن جۇزەگە اسىرۋ كەزىندە قارجى ۇيىمدارىنىڭ ونىمدەرى مەن قىزمەتتەرىن پايدالانۋ دەڭگەيىن تومەندەتۋگە باعىتتالعان. ويىنعا تاۋەلدىلىك ادام تاعدىرىن بۇزاتىن قاۋىپتى قۇبىلىسقا اينالادى. بۇل پروبلەما وتباسىلىق, تۇرمىستىق زورلىق-زومبىلىقتىڭ تۋىنداۋىنا جانە باسقا دا قىلمىستىق قۇقىق بۇزۋشىلىقتار جاساۋعا العىشارتتار تۋعىزادى», دەلىنگەن حابارلامادا.
رەسمي دەرەكتەر بويىنشا, 2019-2022 جىلدار ارالىعىندا 73 جاسىرىن كازينو جويىلىپ, 2280 ويىن تەرمينالى تاركىلەندى.
«وسى جىلدىڭ باسىنان بەرى اگەنتتىك قىزمەتكەرلەرى 19 زاڭسىز ويىن مەكەمەسىن جانە 111 ويىن تەرمينالىن انىقتادى. قابىلدانعان الدىن الۋ شارالارىنىڭ ارقاسىندا سوڭعى 5 جىلدا تىركەلگەن ىستەر سانىنىڭ 5,5 ەسەگە تومەندەۋى بايقالادى. سونىمەن قاتار بۇگىنگى كۇنى اگەنتتىك زاڭسىز ويىن قىزمەتى (ونلاين كازينو) بەلگىلەرى بار الەۋمەتتىك جەلىلەردەگى سايتتار مەن اككاۋنتتارعا 3 مىڭنان استام سىلتەمەلەرىن بۇعاتتاعان», دەپ حابارلادى اگەنتتىك.
سونداي-اق قارجى مونيتورينگ اگەنتتىگى ازاماتتاردىڭ قۇقىقتارىن قورعاۋ جانە ولاردى زاڭسىز قۇمار ويىندارعا تاۋەلدىلىكتەن ساقتاۋ جونىندەگى بەلسەندى جۇمىستى جالعاستىرىپ جاتقانىن ەسكەرتتى.