سەنبىدەن جەكسەنبىگە قاراعان ءتۇنى پاۆلودار وبلىسىندا جىلدامدىعى سەكۋندىنا 37 مەترگە دەيىن جەتەتىن سۇراپىل داۋىل تۇرىپ, جەرگىلىكتى ينفراقۇرىلىمدار مەن ەلەكتر باعاندارىنا, كوممۋنالدىق جانە تۇرعىن ءۇي عيماراتتارىنا زاقىم كەلدى. توتەنشە جاعدايدان ەكىباستۇزداعى جىلۋ-ەنەرگيا ورتالىعىنىڭ قازاندىقتارى دا ىستەن شىقتى. كەشە وبلىستاعى 3 قالا مەن 6 اۋدان توتەنشە جاعداي رەجىمىن جاريالادى.
مامانداردىڭ ايتۋىنشا, مۇنداي سۇراپىل داۋىل سوڭعى 20 جىلدا تىركەلمەگەن. «قازگيدرومەت» رمك-نىڭ جەرگىلىكتى فيليالى قاتتى جەلدىڭ بولاتىنى تۋرالى الدىن الا ەسكەرتكەن. ايتسا ايتقانداي, ەكپىندەي سوققان جەل ەلدى مەكەندەردەگى اعاشتاردى تۇبىرىمەن قۇلاتىپ, ۇيلەر مەن عيماراتتاردىڭ شاتىرلارى, توبە جابىندارىن ۇشىرىپ اكەتتى. توتەنشە جاعداي دەپارتامەنتىنىڭ ءباسپاسوز قىزمەتى حابارلاعانداي, بۇل ءتۇنى 100-دەن اسا ەلدى مەكەندە ەلەكتر قۋاتى ۇزىلگەن.
پاۆلودار وبلىسى اكىمىنىڭ ءبىرىنشى ورىنباسارى سەرىك باتىرعوجينوۆ اتاپ وتكەندەي, جەلدىڭ سالدارىنان وڭىردە 83 الەۋمەتتىك نىسانعا نۇقسان كەلگەن. ونىڭ 61-ءى – ءبىلىم بەرۋ ۇيىمى. 63 كوپقاباتتى ءۇيدىڭ توبە جابىندارى مەن شاتىرلارى, ەندى ءبىرىنىڭ قابىرعا جاپسىرمالارى زاقىمدانعان.
– داۋىل سوققان ءتۇنى وبلىستىڭ ەلەكتر جۇيەسىندە 246 اۆاريالىق اجىراتۋ ورىن الدى. جالپى سانى 70 مىڭنان اسا جەكە ءۇي, 6 مىڭنان اسا زاڭدى تۇلعالار قۋات كوزىنەن اجىراتىلدى. قالپىنا كەلتىرۋ جۇمىستارى شۇعىل جۇرگىزىلىپ, باسىم بولىگىندە جاعداي رەتتەلدى. قازىرگى ۋاقىتتا 4 اۋدانداعى 28 اۋىل ءالى دە جارىقسىز وتىر. سۇراپىل جەل ۇلكەن ەلەكتر باعاندارىن قۇلاتقان. ءتىپتى باياناۋىل اۋدانى ورتالىعىندا 50 جىل مىزعىماي تۇرعان ستەللانى سۇلاتىپ تۇسىرگەن. 3 قالا مەن 6 اۋدان بۇگىن تابيعي
سيپاتتاعى توتەنشە جاعداي رەجىمىن جاريالادى. ول ءبىر تاۋلىك ىشىندە كۇشىنە ەنىپ, ەرتەڭنەن باستاپ عيماراتتاردى قالپىنا كەلتىرۋ جۇمىستارى باستالادى. ال م ۇلىكتىك زارداپ شەككەن ازاماتتاردىڭ شىعىنى ارنايى قاعيدا بويىنشا جەرگىلىكتى اتقارۋشى بيلىكتىڭ قاراستىرۋىمەن 30 تاۋىلىك ىشىندە وتەلۋى كەرەك. ايتىپ وتەيىك, ەرتىس, جەلەزين, اقتوعاي, تەرەڭكول اۋداندارىنىڭ ينفراقۇرىلىمى تابيعاتتىڭ بۇل توسىن قۇبىلىسىنان امان قالدى, – دەدى ول.
بۇل ءتۇنى پاۆلودار قالاسىنا قاراستى اۋىلداردىڭ ەنەرگيالىق جۇيەسى كوپ زارداپ شەكتى. ەلەكتر جۇيەسىندە اقاۋ شىققاندىقتان وبلىس ورتالىعىنداعى كوپتەگەن تۇرعىن ۇيدە جىلۋ ءبىراز ۋاقىت جوعالىپ كەتتى. جىلۋمەن قامتۋ مەكەمەسىنىڭ اقپارىنا سەنسەك, قورەك كوزىنەن ۇزىلگەن جىلۋ سورعىلارى ءبىراز ۋاقىتقا توقتاپ قالعان. بۇعان قوسا كوشەلەردەگى جارنامالىق كونسترۋكتسيالار, باعدارشامدار, ونداعان اۆتوبۋس ايالدامالارى جەلدىڭ ەكپىنىمەن قيرادى. ءۇي اۋلالارى مەن كوشەلەردە قۇلاعان اعاشتاردىڭ سالدارىنان ونداعان جەڭىل كولىك زاقىمدانعان.
ال ەكىباستۇز قالاسىندا بۇل ءتۇنى ەكپىندەي سوققان جەل جىلۋ بەرۋ جۇيەسىن توقتاتىپ تاستادى. ەكىباستۇز جەو-داعى ەلەكتر قۋاتىمەن قامتۋ جۇيەسىنە زاقىم كەلىپ, ورتالىقتاعى نەگىزگى جانە رەزەرۆتىك شاعىن ستانسالار ىستەن شىققان. جەو-داعى نەگىزگى جابدىقتار ەلەكتر ەنەرگياسى ەسەبىنەن جۇمىس ىستەيتىندىكتەن مۇنداعى جىلۋ قازاندىقتارى دا توقتاعان. تەك تاڭعى ساعات بەستەر شاماسىندا عانا ستانساداعى اقاۋلىقتار جويىلىپ, قازاندىقتار تاڭەرتەڭ ىسكە قوسىلدى. سوڭعى ەكى كۇندە كومىرلى شاھاردىڭ جىلۋ جۇيەسىندەگى پارامەترلەر رەتتەلىپ, جىلۋمەن قامتۋ قايتا تۇراقتاندى.
ايتىپ وتەيىك, وڭىردەگى داۋىلدىڭ سالدارىن جويۋعا قاتىستى قازىرگى ۋاقىتتا توتەنشە جاعداي شتابى قۇرىلىپ, جەدەل جەلى جۇمىس ىستەۋدە. ازاماتتىق قورعاۋ قىزمەتىنىڭ كۇشتەرى مەن قۇرالدارىن پايدالانا وتىرىپ, جوندەۋ-قالپىنا كەلتىرۋ جۇمىستارى جالعاسىپ جاتىر.
پاۆلودار وبلىسى