حالىق مەديتسينالىق تەكسەرۋدەن ءوتۋدى قيىنسىنىپ جاتادى. سەبەبى ۋاقىت كوپ الادى, جۇمىسى دا كوپ. سودان بولار بۇل پاراقتى مەديتسينالىق قىزمەتكەرلەر ساتىپ, حالىق ونى الىپ جاتادى. بۇل ماسەلەنىڭ الدىن الۋ ءۇشىن زاڭگەر, كاسىپكەر شىڭعىس قۇلاحمەتوۆ مەديتسينالىق تەكسەرۋدەن ءوتۋدىڭ اۆتوماتتاندىرىلعان جۇيەسى Med365-ءتى وندىرىسكە ەڭگىزگەن.
Med365 – ادام دەنساۋلىعىنا زياندى وندىرىستەردە جۇمىس ىستەيتىن قىزمەتكەرلەرگە اۋىسىم الدىندا نەمەسە اۋىسىمنان كەيىنگى مەديتسينالىق تەكسەرۋدەن 1 مينۋت ىشىندە وتۋگە مۇمكىندىك بەرەتىن شەشىم. الىنعان دەرەكتەردى تالدايتىن جانە دەنساۋلىققا تونەتىن قاۋىپتى انىقتايتىن ارنايى باعدارلامالىق جاساقتامادان تۇرادى. مۇنىڭ ءبارى تەرمومەتر, تونومەتر, الكوتەستەر, پۋپيللومەترى بار اۆتوماتتاندىرىلعان مەديتسينالىق تەكسەرۋ جۇيەسى اسمو-نىڭ كومەگىمەن جاسالادى. بارلىق دەرەكتەر ارنايى جۇيەگە ءتۇسىپ, ونى جاساندى ينتەللەكت وڭدەيدى. سوسىن دارىگەرلەرگە ادامنىڭ دەنساۋلىعىنداعى ماسەلەلەر تۋرالى دابىل بەرەدى. قازىر ۇجىمدا 30-دان استام ادام جۇمىس ىستەيدى. بۇگىندە بۇل قۇرىلعىنى «سامۇرىق-قازىنا» ينۆەستيتسيالىق حولدينگى, «قازاتومونەركاسىپ» ۇلتتىق اتوم كومپانياسى» اكتسيونەرلىك قوعامى, «قازترانسويل» اكتسيونەرلىك قوعامى, «الماتىەلەكتروترانس» جانە باسقالارى قولدانادى.
دەرەكتەرگە سۇيەنسەك, ەلىمىزدە قاۋىپتى جانە زياندى وندىرىستەردە 1,5 ميلليون ادام جۇمىس ىستەيدى. ولاردىڭ ءبارى كۇن سايىن مەديتسيتسنالىق تەكسەرۋدەن وتۋگە ءتيىس. ال Med365 جۇمىس بەرۋشىگە كۇن سايىن جاڭارتىلاتىن اقپارات بەرىپ وتىرادى. ناقتى دەنساۋلىق جاعدايى مەن بەلگىلى ءبىر اپتاداعى, ايداعى نەمەسە جىلداعى كورسەتكىشتەردى وڭاي كورۋگە بولادى.
– قانشاما ادام اۋىسىم الدىندا نەمەسە اۋىسىمنان كەيىن مەديتسينالىق كۋالاندىرۋدان وتۋگە مىندەتتى. رەگلامەنت بويىنشا وعان 1 ساعات بولىنەدى. مىنە, 600 جۇرگىزۋشى بار فلوتتا وسىنداي ۋاقىت ىشىندە بارلىعىن قالاي تەكسەرۋگە بولاتىنىن ەلەستەتىپ كورىڭىزشى؟ ۇدەرىس تەك فورمالدىلىققا اينالادى. سوندا قانشاما ادام تەكسەرۋسىز رۇقسات الادى. بىراق بۇل دۇرىس ەمەس, ويتكەنى اۆتوبۋس جۇرگىزۋشىلەرى كۇن سايىن مىڭداعان ادامدى تاسىمالدايدى. ولاردىڭ دەنساۋلىعى جولاۋشىلار قاۋىپسىزدى ءۇشىن ماڭىزدى. ءبىز بۇل ماسەلەنى شەشكىمىز كەلدى, – دەيدى ش.قۇلاحمەتوۆ.
جابدىقتى ورناتپاس بۇرىن, كاسىپورىننىڭ بارلىق قىزمەتكەرى باعدارلاماعا تىركەلەدى. جەكە دەرەكتەردى جۇكتەيدى جانە ادام ءتۇرىن انىقتاۋعا مۇمكىندىك بەرەتىن Face ID ءۇشىن سۋرەتكە تۇسەدى. Med365 تەحنيكالىق ديرەكتورى اسحات شاكەنوۆ قۇرىلعىنىڭ Face ID يدەنتيفيكاتورىن ەشكىم الداي المايدى دەيدى.
– ءونىمدى سىناعان كەزدە تانۋ جۇيەسىنە ءارتۇرلى ۇلت وكىلدەرىنىڭ 700 مىڭ فوتوسۋرەتى جۇكتەلدى. بۇل جۇمىسشىلاردى اينىماي تانۋعا كومەكتەسەدى. بىزدە ءبىر كاسىپورىندا ەگىزدەر بولدى, بىراق باعدارلاما ولاردى ەش قيىندىقسىز تانىپ, اجىراتا ءبىلدى. سايكەستەندىرۋدەن كەيىن تەكسەرىستەن رەگلامەنت بويىنشا وتۋگە بولادى. تىنىس تەكسەرەتىنگە ۇرلەپ, قان قىسىمىن ولشەۋگە بولادى. ەڭ قىزىعى – پۋپيللومەتر. ونىڭ كومەگىمەن شارشاۋ دارەجەسى بەلگىلەنەدى جانە ەسىرتكىگە دەگەن كۇدىك تەكسەرىلەدى. دەرەكتەر كومپيۋتەر, فەلدشەر نەمەسە مەدبيكەگە جىبەرىلەدى. ولار دەنساۋلىق جاعدايىن باعالايدى جانە جۇمىسقا رۇقسات بەرۋ-بەرمەۋ تۋرالى شەشىم قابىلدايدى. سوڭعى ءسوزدى مامان ايتادى, – دەپ قۇرىلعى جۇمىسىن ءتۇسىندىردى ا.شاكەنوۆ.
شىڭعىستىڭ قالاۋى – قۇرىلعىنى 100 پايىز وتاندىق ءونىم ەتۋ. ازىرگە شەتەلدەن ءۇش بولىكتى ساتىپ الادى: تونومەتر (جاپونيادان), الكوتەستەر (وڭتۇستىك كورەيادان) جانە مونيتور (قىتايدان). قازىر بارلىق جيىنتىقتاۋىشتاردى ەلدەن ءوندىرۋ مۇمكىندىگىن پىسىقتاپ جاتىر. تاعى ءبىر قولعا العان ماسەلەسى – وڭتايلاندىرۋ. كوبىنە مەديتسينالىق تەكسەرۋدەن وتكىزۋ ءۇشىن كومپانيا فەلدشەرلەردىڭ ۇلكەن شتاتىن ۇستايدى. ولارعا جالاقى تولەۋى كەرەك, سالىق تولەۋى كەرەك, قانداي دا ءبىر جولمەن باقىلاۋى كەرەك. قىسقاشا ايتقاندا, شىعىنى كوپ. ال اسمو-نىڭ ءۇش-تورتەۋىن ورناتا وتىرىپ, قارجى مەن ۋاقىت ۇنەمدەلەدى.
بۇل كوماندا تولىققاندى مەديتسينالىق اقپاراتتىق جۇيەنى جاساعىسى كەلەدى. اۋىسىم الدىنداعى جانە اۋىسىمنان كەيىنگى تەكسەرۋلەردى عانا ەمەس, بارلىق ونەركاسىپتىك مەديتسينانى قامتىماق ويلارى بار. ونىڭ ىشىنە ساقتاندىرۋ, كاسىبي تەكسەرۋ, ەڭبەكتى قورعاۋ جانە گيگيەنانى تسيفرلاندىرۋ كىرەدى.
شىڭعىس قۇلاحمەتوۆ MedTech-ءتى بەكەر تاڭداماعان. شىڭعىستىڭ 18 جاسىندا اكەسى ينفاركت سالدارىنان قايتىس بولعان. سودان باستاپ ەلىمىزدەگى اعا بۋىننىڭ ءوز-وزىنە ۇقىپتى قاراۋ مادەنيەتى جوق ەكەنىن تۇسىنگەن. ءدال وسىنداي ءۇردىستى ول ءوز زامانداستارىنان دا ءجيى بايقايدى ەكەن. ونىڭ ايتۋىنشا حالىق دارىگەرگە بارماۋدىڭ ءارتۇرلى سەبەپتەرىن ويلاپ تاۋىپ جاتادى. سوندىقتان دا ولار دەنساۋلىق ساقتاۋ جۇيەسىنىڭ جۇمىسىن ساپالى قالىپتاستىرۋعا جانە ناسيحاتتاۋعا كومەكتەسىپ ءجۇر.