ەلىمىزدىڭ بارلىق وڭىرىندەگى شالعاي اۋىلدارداعى وقۋشىلاردى تاسىمالداۋعا مەملەكەت بيۋدجەتىنەن 488 سۋ جاڭا مەكتەپ اۆتوبۋستارى بەرىلدى.
بالالاردىڭ قاۋىپسىزدىگىن قامتاماسىز ەتۋ ماقساتىندا بەرىلگەن كەڭ ءارى جايلى جاڭا اۆتوبۋستار بارلىق تەحنيكالىق ەرەجەگە ساي. اتاپ ايتساق, قوزعالتقىش پەن جانارماي باگىنداعى ورتكە قارسى جۇيە, قاۋىپسىزدىك بەلدىكتەرى بار ورىندىقتار, ءموبيلدى گادجەتتەردى قۋاتتاۋعا ارنالعان USB پورتتار جانە ارنايى شامدار بار. جاڭا ساقتىق تالاپتارى بويىنشا وقۋشىلاردىڭ قيمىل-قوزعالىسىن جانە جۇرگىزۋشىلەر جول قوزعالىسىن باقىلاۋدا ۇستاۋ ءۇشىن 360 گرادۋسقا دەيىن كورسەتەتىن ارنايى كامەرالار دا ورناتىلعان.
جاڭا اۆتوبۋستاردى وتاندىق QazTehna زاۋىتى Yutong كومپانياسىمەن بىرلەسىپ شىعارعان. كولىكتەر الەم نارىعىنداعى بىرەگەي ستاندارتتارعا سۇيەنىپ جاسالعان.
جولعا شىقپاس بۇرىن جۇرگىزۋشىلەر مەديتسينالىق باقىلاۋدان, ال اۆتوبۋستار تەحنيكالىق تەكسەرىستەن وتەدى. ەندى وڭىرلەردەگى وقۋشىلار اۋدان مەن وبلىس ورتالىقتارىندا وتەتىن سايىستارعا الاڭسىز قاتىسا الادى. جىل سوڭىنا دەيىن قاۋىپسىزدىكتى باستى نازاردا ۇستايتىن اۆتوبۋستاردىڭ جالپى سانى 515-كە جەتەدى دەپ جوسپارلانىپ وتىر.
ەركەناز قورداباي,
ل.ن.گۋميلەۆ اتىنداعى
ەۇۋ 4-كۋرس ستۋدەنتى