ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتتەرى مەن پروفەسسور-وقىتۋشىلار قۇرامى «تازا قازاقستان» ەكولوگيالىق اكتسياسى اياسىندا ۇيىمداستىرىلعان اۋقىمدى سەنبىلىككە قاتىستى, دەپ حابارلايدى Egemen.kz.
ءىس-شارانىڭ باستى ماقساتى – قورشاعان ورتانى قورعاۋ, ۋنيۆەرسيتەت اۋماعىن اباتتاندىرۋ جانە ەكولوگيالىق مادەنيەتتى قالىپتاستىرۋ.
سەنبىلىككە ۋنيۆەرسيتەتتىڭ بارلىق فاكۋلتەتتەرى, ينستيتۋتتارى مەن مەكتەپتەرى بەلسەندى تۇردە جۇمىلدىرىلدى. الدىن الا تازالىق جۇمىستارى جۇرگىزىلەتىن نەگىزگى اۋماقتار بەلگىلەنىپ, قاتىسۋشىلار بىرلەسە جۇمىس اتقاردى. اتاپ ايتقاندا, ۋنيۆەرسيتەت اۋماعىن جانە ستۋدەنتتىك جاتاقحانالارعا جاقىن جەرلەردى قوقىستان تازارتىپ, ستۋدەنتتىك سپورت ورتالىعىنىڭ ماڭىنا اعاش كوشەتتەرى وتىرعىزىلدى. ۋنيۆەرسيتەت اكىمشىلىگى سەنبىلىكتى ۇيىمداستىرۋمەن قاتار, قاتىسۋشىلار ءۇشىن جايلى ءارى كوتەرىڭكى كوڭىل كۇي قالىپتاستىرۋعا دا ەرەكشە ءمان بەردى.
«تازا قازاقستان»: الماتىدا 550-دەن استام ادام سەنبىلىككە شىقتى
اكتسياعا ەۋرازيا ۇلتتىق ۋنيۆەرسيتەتىنىڭ باسقارما توراعاسى – رەكتور ەرلان سىدىقوۆ تا قاتىستى. ول مۇنداي باستامالاردىڭ ستۋدەنتتىك ورتادا ەكولوگيالىق مادەنيەتتى قالىپتاستىرۋداعى ماڭىزىن اتاپ ءوتتى.
− «تازا قازاقستان» رەسپۋبليكالىق اكتسياسىن جۇزەگە اسىرۋ – مەملەكەت باسشىسى ەرەكشە نازار اۋداراتىن ەكولوگيالىق جاۋاپتى قوعام قالىپتاستىرۋداعى ماڭىزدى قادام. ەۋرازيا ۇلتتىق ۋنيۆەرسيتەتى ستۋدەنتتەر مەن قىزمەتكەرلەردى تۇراقتى دامۋ قۇندىلىقتارى توڭىرەگىندە بىرىكتىرەتىن وسىنداي باستامالاردى قولدايدى. ستۋدەنتتەردىڭ «تازا قازاقستان» اكتسياسىنا قاتىسۋى ولاردىڭ سانالى ۇستانىمىن جانە قوعامنىڭ ەكولوگيالىق مادەنيەتىن دامىتۋعا ۇلەس قوسۋعا دايىن ەكەنىن كورسەتەدى, − دەدى ەۇۋ رەكتورى ەرلان سىدىقوۆ.
رەكتور ستۋدەنتتەر مەن ۋنيۆەرسيتەت قىزمەتكەرلەرىمەن بىرگە اعاش كوشەتتەرىن وتىرعىزىپ, قورشاعان ورتاعا ۇقىپتى قاراۋدىڭ ماڭىزىن جەكە ۇلگىسىمەن كورسەتتى.
«مۇنداي اكتسيالار تەك ەكولوگيا تۇرعىسىنان عانا ەمەس, جالپى مادەنيەت پەن جاۋاپكەرشىلىكتىڭ كورىنىسى رەتىندە دە ماڭىزدى. ستۋدەنتتەرمەن جانە ارىپتەستەرمەن بىرگە قاتىسقاندا, بىرلىك پەن ۇلكەن ىسكە قاتىستىلىق سەزىمى پايدا بولادى, بۇل شىنىمەن دە شابىتتاندىرادى», دەپ اتاپ ءوتتى كولىك-ەنەرگەتيكا فاكۋلتەتىنىڭ دەكانى ءومىرجان قوقاەۆ.
قاتىسۋشىلار ءۇشىن بۇل جاي عانا سەنبىلىك ەمەس, ەكولوگياعا ءوز ۇلەسىن قوسۋ مۇمكىندىگى بولدى. ستۋدەنتتەردىڭ ايتۋىنشا, مۇنداي شارالار ادامداردى بىرىكتىرىپ قانا قويماي, كوماندالىق رۋحتى نىعايتادى, قورشاعان ورتاعا ۇقىپتى قاراۋعا جانە كۇندەلىكتى ومىردە تازالىقتى ساقتاۋعا ىنتالاندىرادى.
«سەنبىلىككە قاتىسۋ مەن ءۇشىن وتە ماڭىزدى ءارى پايدالى تاجىريبە بولدى. ءبىز تەك ۋنيۆەرسيتەت اۋماعىن تازالاپ قانا قويماي, تابيعاتقا دەگەن جاۋاپكەرشىلىگىمىزدى ارتتىردىق. وسىنداي شارالار ستۋدەنتتەردى بىرىكتىرىپ, ورتاق ىسكە جۇمىلدىرادى. بولاشاقتا دا مۇنداي يگى باستامالارعا بەلسەندى تۇردە قاتىسامىن», دەدى زاڭ فاكۋلتەتىنىڭ 2 كۋرس ستۋدەنتى گۇلمارجان يبراگيموۆا.
«تازا قازاقستان»: ورمانشىلار وقۋشىلارمەن بىرگە اعاش ەكتى
ەۋرازيا ۇلتتىق ۋنيۆەرسيتەتىندە تۇراقتى دامۋ مەن ەكولوگيالىق جاۋاپكەرشىلىك ماسەلەلەرىنە ەرەكشە كوڭىل بولىنەدى. ۋنيۆەرسيتەت «تازا قازاقستان» رەسپۋبليكالىق اكتسياسىنا بەلسەندى قاتىسىپ قانا قويماي, ەكولوگيالىق مادەنيەتتى قالىپتاستىرۋعا باعىتتالعان ءوز باستامالارىن دا جۇزەگە اسىرىپ كەلەدى. ەۇۋ-دا تۇراقتى دامۋ ساياساتى بەكىتىلگەن, ونىڭ اياسىندا ستۋدەنتتەر مەن وقىتۋشىلار قويىلعان ماقساتتارعا جەتۋگە باعىتتالعان ءىس-شارالاردى تۇراقتى تۇردە وتكىزەدى. مۇنداي يگى شارالار جاستاردىڭ ازاماتتىق جاۋاپكەرشىلىگىن ارتتىرىپ قانا قويماي, ەل تازالىعى – ۇلتتىق مادەنيەتتىڭ ايناسى ەكەنىن دالەلدەيدى. ەۇۋ ۇجىمى الداعى ۋاقىتتا دا ەكولوگيالىق باستامالاردى قولداپ, سەنبىلىك جۇمىستارىن تۇراقتى تۇردە جالعاستىرۋدى جوسپارلاپ وتىر.