ىشكى ىستەر مينيسترلىگى تەرروريزم اكتىسى تۋرالى ادەيى جالعان اقپارات تاراتقاندار زاڭ الدىندا جاۋاپ بەرەتىنىن تاعى دا ەسكە سالدى. ۆەدومستۆونىڭ مالىمەتىنشە, مۇنداي ارەكەتتەر قىلمىستىق كودەكستىڭ 273-بابىنا سايكەس قىلمىستىق قۇقىقبۇزۋشىلىق رەتىندە قاراستىرىلادى, دەپ جازادى Egemen.kz.
قازىرگى تاڭدا جارىلعىش زات قويىلعانى نەمەسە قوعامدىق قاۋىپسىزدىككە قاۋىپ تونگەنى تۋرالى جالعان حابارلامالار ينتەرنەت, مەسسەندجەرلەر مەن الەۋمەتتىك جەلىلەر ارقىلى تارالىپ جاتىر. ءتىپتى ءازىل رەتىندە جاسالعان مۇنداي ارەكەتتەردىڭ ءوزى اۋىر سالدارعا اكەلۋى مۇمكىن.
مامانداردىڭ ايتۋىنشا, جالعان اقپارات جاپپاي ەۆاكۋاتسياعا, مەكەمەلەردىڭ جۇمىسىنىڭ توقتاۋىنا جانە شۇعىل قىزمەتتەردىڭ نەگىزسىز جۇمىلدىرىلۋىنا سەبەپ بولادى. سوندىقتان مۇنداي ارەكەتتەر ءۇشىن كىنالىلەرگە باس بوستاندىعىنان ايىرۋعا دەيىنگى جازا كوزدەلگەن.
جالعان اقپارات تاراتۋدىڭ جاۋاپكەرشىلىگىن بىلەمىز بە؟
مينيسترلىك بارلىق حابارلامالار مىندەتتى تۇردە تەكسەرىلەتىنىن, ال ونى تاراتقان تۇلعالار زاماناۋي تەحنولوگيالار ارقىلى انىقتالاتىنىن اتاپ ءوتتى.
پوليتسيا ازاماتتاردى تەكسەرىلمەگەن اقپاراتتى تاراتپاۋعا, جالعان حابارلامالار جاساماۋعا جانە بالالارعا مۇنداي ارەكەتتەردىڭ جاۋاپكەرشىلىگىن تۇسىندىرۋگە شاقىرادى. ال كۇماندى نەمەسە قاۋىپتى حابار العان جاعدايدا دەرەۋ قۇقىق قورعاۋ ورگاندارىنا حابار بەرۋ قاجەت.