«قىز جىبەك» فيلمىندە باستى ءرولدى سومداعان اكتريسا مەرۋەرت وتەكەشوۆا كامزول داۋىنا قاتىستى پىكىر ءبىلدىردى. ول بايان الاگوزوۆانىڭ قولىنداعى كامزولدىڭ تۇپنۇسقا ەكەنىن راستادى, دەپ حابارلايدى Egemen.kz.
بيىل 75 جاسقا تولعان اكتريسا جۋرناليست گۇلبانۋ ابەنوۆاعا ءفيلمنىڭ كوپتەگەن رەكۆيزيتتەرى مەن كوستيۋمدەرى جان-جاققا تاراپ كەتكەنىن ايتقان. ول مۋزەيدە ساقتالعان جالعىز عانا نۇسقا بارىن, بىراق وعان دۇرىس كۇتىم جاسالماي وتىرعانىن جەتكىزگەن.
بايان ماقساتقىزىنىڭ قولىنداعى كامزول بۇعان دەيىن بىرەۋدىڭ ۇيىندە ساندىقتا جاتقان.
مەرۋەرت وتەكەشوۆا كامزول قايدا ساقتالۋى كەرەك دەگەن ساۋالعا ءوز پىكىرىن بىلدىرگىسى كەلمەگەن. كامزول توڭىرەگىندەگى اڭگىمەنىڭ تىم كوبەيىپ كەتكەنى اكتريساعا اسا ۇناي قويماعان.
«قازىر اكتريسانىڭ پىكىرىنشە, اڭگىمە ەڭ الدىمەن ءوزى تۋرالى ايتىلۋى كەرەك. سەبەبى وسى فيلمدە ويناعانداردىڭ ىشىنەن ءتىرى قالعان جالعىز ءوزى ەكەنىن ايتتى», دەپ جازدى گ.ابەنوۆا Facebook پاراقشاسىندا.
ەسكە سالايىق, بۇعان دەيىن مادەنيەت جانە اقپارات مينيسترلىگى «قىز جىبەك» ءفيلمىنىڭ رەكۆيزيتتەرىنە قاتىستى مالىمدەمە جاساعان ەدى.