وبلىستىڭ اۋىلدىق جەرلەرىندەگى ەسكى مەكتەپتەردىڭ ماسەلەسى بىرتىندەپ شەشىلىپ كەلەدى. بيىل بىرنەشە ەلدى مەكەندە جاڭادان ءبىلىم بەرۋ ۇيىمدارى سالىنىپ, سونىڭ ءبىرى جۋىقتا الىستاعى قاراجار اۋىلىندا اشىلدى.
قاراجار – وبلىس ورتالىعىنان 240 شاقىرىم جەردە, مىرزاشوقى تاۋ-شاڭعى كەشەنىنە جاقىن ورىن تەپكەن, 300-دەن اسا تۇرعىنى بار ەلدى مەكەن. رەسپۋبليكالىق جولدىڭ بويىندا ورنالاسقاندىقتان, اۋىلدىڭ بولاشاعى زور دەپ سانالادى. مۇندا كەيىنگى جىلدارى جەرگىلىكتى ەسكى مەكتەپتىڭ ماسەلەسى ءجيى كوتەرىلىپ, اقىرى ول «ERG» كومپانيالار توبى مەن پاۆلودار وبلىسى اكىمدىگى اراسىندا جاسالعان الەۋمەتتىك ماڭىزدى جوبالاردى جۇزەگە اسىرۋداعى ءوزارا ارىپتەستىك تۋرالى مەموراندۋم اياسىندا شەشىمىن تاپتى. وسىلايشا, دەمەۋشىلەر قاراجاتىنا اۋىلعا 100 ورىندىق زاماناۋي مەكتەپ سالىندى. كەرەگەسى كەڭەيگەن ءبىلىم بەرۋ ۇيىمىنىڭ ءوزى ەندى نەگىزگى مەكتەپتەن ورتا ءبىلىم بەرۋ جۇيەسىنە اۋىستىرىلادى دەپ كۇتىلىپ وتىر.
جاڭا نىساننىڭ اشىلۋىنا وقۋ-اعارتۋ ءمينيسترى عاني بەيسەمباەۆ, پاۆلودار وبلىسىنىڭ اكىمى اسايىن بايحانوۆ, جەرگىلىكتى اۋىل تۇرعىندارى مەن مەكتەپ وقۋشىلارى قاتىستى.
«قاراجار اۋىلىنداعى بۇعان دەيىنگى ەسكى مەكتەپ اپاتتىق دەپ تانىلعان سوڭ, جاڭا عيمارات سالۋعا شەشىم قابىلداندى. ناتيجەسىندە, قىسقا عانا مەرزىمدە وسىنداي ءبىلىم شاڭىراعى بوي كوتەرىپ, وقۋشىلارعا ەسىگىن ايقارا اشتى. بالا مىنەز-قۇلقىنىڭ نەگىزى مەكتەپتە قالىپتاساتىنى بەلگىلى. سوندىقتان ۇستازدار مەن اتا-انالارعا ەلىمىزدىڭ بولاشاق مادەنيەتتى, بىلىكتى, ەڭبەكقور پاتريوتتارىن تاربيەلەۋ جولىندا ساتتىلىك تىلەيمىن», دەدى ا.بايحانوۆ.
عاني بەيسەمباەۆ مەملەكەتتىڭ پەداگوگ مارتەبەسىن كوتەرۋ, ينفراقۇرىلىمدى دامىتۋ, جايلى ءارى قاۋىپسىز جاعداي جاساۋ بويىنشا بارلىق مىندەتتەمەنى ورىنداپ جاتقانىن اتاپ ءوتتى. «1 قازانعا دەيىن ەلىمىزدە 78 500 ورىندىق 77 جاڭا مەكتەپ اشىلدى. اتالعان كورسەتكىشتى 132 مىڭ ورىنعا دەيىن جەتكىزۋدى جوسپارلاپ وتىرمىز. بۇل 12 اپاتتى جانە 29 ءۇش اۋىسىمدى مەكتەپتىڭ ماسەلەسىن, سونداي-اق 113 ەلدى مەكەندەگى وقۋشى ورىندارىنىڭ تاپشىلىعىن شەشۋگە مۇمكىندىك بەرەدى. «جايلى مەكتەپ» ۇلتتىق جوباسى اياسىندا الداعى ءۇش جىلدا 740 مىڭ ورىندىق 369 مەكتەپتىڭ قۇرىلىسىن باستاۋ جوسپارلانىپ وتىر. بۇل ماسەلەنى شەشۋدە بيزنەس وكىلدەرىنىڭ دە شەتتە قالماعانى قۋانتادى», دەدى ول.
جاڭا مەكتەپتىڭ قۇرىلىسىنا 650 ملن تەڭگە جۇمسالدى. مۇندا وقۋ كابينەتتەرى, شەبەرحانالار, سپورتزال, ءماجىلىس زالى, شاعىن ورتالىق, اسحانا, IT-سىنىپتار, اشىق ويىن الاڭى قاراستىرىلعان. قازىرگى كۇنى قاراجار مەكتەبىندە 72 بالا ءبىلىم الىپ جاتىر. تۇرعىندار زاماناۋي عيمارات الداعى ۋاقىتتا ەلدى مەكەننىڭ زياتكەرلىك جانە مادەني ورتالىعىنا اينالادى دەپ ءماز. بۇعان دەيىن وسىنداي جاڭا مەكتەپتىڭ ءبىرى جەلەزين اۋدانىنا قاراستى مويسەەۆكا اۋىلىندا دا اشىلعان. الاش ارداقتىسى ماعجان جۇماباەۆتىڭ ەسىمىن يەلەنگەن ءبىلىم شاڭىراعى بۇرىنعى اپاتتى مەكتەپتىڭ ورنىنا تۇرعىزىلدى.
بيىل پاۆلودار وبلىسىنداعى 54 مەكتەپتى جاڭارتۋ ءۇشىن بيۋدجەتتەن 6 ملرد 465,4 ملن تەڭگە قاراستىرىلعان. بۇعان اعىمداعى جوندەۋ, مەكتەپ جيھازدارىن, اسحانالاردى, كىتاپحانالاردى جاڭارتۋ, قاۋىپسىزدىكتى قامتاماسىز ەتۋ جۇمىستارى كىرەدى. عيماراتتاردى جاڭعىرتۋ جۇمىستارى تولىق اياقتالدى.
پاۆلودار وبلىسى,
باياناۋىل اۋدانى,
قاراجار اۋىلى