قىتايدىڭ حانچجوۋ قالاسىندا ءوتىپ جاتقان IV ازيا پارا ويىندارىندا دزيۋدودان العاش رەت التىن العان سپورتشىلارىمىزدى اۋەجايدان تۋعان-تۋىستارى, جانكۇيەرلەرى مەن استانا قالاسى دەنە شىنىقتىرۋ جانە سپورت باسقارماسىنىڭ وكىلدەرى كۇتىپ الدى, دەپ حابارلايدى Egemen.kz ەلوردا اكىمدىگىنىڭ ءباسپاسوز قىزمەتىنە سىلتەمە جاساپ.
ازيا پارا ويىندارىندا 20-عا جۋىق پارا دزيۋدوشىمىز ونەر كورسەتىپ, 3 التىن, 4 كۇمىس جانە 7 قولا جۇلدەگە يە بولدى. ولاردىڭ ىشىندە ەلوردا سپورتشىلارىنىڭ ساپىنان اقمارال ناۋاتبەك قازاقستان تاريحىندا دزيۋدودان ازيا پارا ويىندارىندا العاشقى التىندى الدى. سونداي-اق J1 ساناتىنداعى ەرعالي شامەي 73 كەلىدە قارسىلاس شىداتپادى. ال اسىلان نۇرداۋلەتوۆ كۇمىس جۇلدەگە قول سوزسا, باۋىرجان ارستانبەكوۆ قولانى مىسە تۇتتى.
«ازيا پارا ويىندارىنعا تىڭعىلىقتى دايىندىقتى الماتى وبلىسىندا وتكىزدىم. كەيىنگى جىلدارى سالماعىمدا باسەكەلەستىك قاتتى كۇشەيىپ كەلەدى. ەكى دۇركىن الەم چەمپيونى بولسام دا باستى قارسىلاستارىم وزبەكستان, قىتاي سپورتشىلارى دەپ سانايمىن. سوندىقتان ازيا پارا ويىندارىندا مەن ءۇشىن چەمپيون بولۋ وڭاي بولمادى. اسىرەسە الاڭ قوجايىنىمەن وتكەن فينالدىق بەلدەسۋ قيىنعا سوقتى. باستاپقى سەكۋندتاردا اۋىرتۋ ادىسىنە ءتۇسىپ قالسام دا دەر كەزىندە بوساپ شىقتىم. ەندى الدا جاپونيادا وتەتىن گران-پري جارىسىنا قاتىسىپ, پاريج پاراليمپياداسىندا چەمپيون بولۋ ءۇشىن جاتتىعۋ جۇمىستارىنا كىرىسەمىن», دەدى ازيا پارا ويىندارىنىڭ چەمپيونى اقمارال ناۋاتبەك.
پارا دزيۋدودان ۇلتتىق قۇراما ازيا پارا ويىندارىندا مەدالدىك ەسەپتە 2-ورىنعا ورنىقتى. ءبىرىنشى ورىندا 5 التىن, 2 قولا جانە 4 كۇمىس مەدالمەن قىتاي تۇرسا, ءۇشىنشى ورىنعا 2 التىن 1 كۇمىس, 3 قولا مەدالمەن يران تۇراقتادى.