بيىل ارتىنا مول مۇرا قالدىرعان اقىن مۇرات موڭكە ۇلىنىڭ تۋعانىنا 180 جىل تولدى. زار زاماننىڭ وكىلى جەتى جاسىنان جەتىمدىكتىڭ زاردابىن كورگەن. اۋىل مولداسىنان ارابشا ساۋات اشقان ول اقىندىق ونەرىمەن تانىمال بولعان.
جاقىندا اتىراۋدا اقىن ءارى جىراۋدىڭ شىعارماشىلىعىنا ارنالعان جىرشى-تەرمەشىلەردىڭ ايماقتىق بايقاۋى ءوتتى. وعان اقتوبە, ماڭعىستاۋ جانە اتىراۋ وبلىستارىنىڭ ونەرپازدارى قاتىستى. وبلىستىق مادەنيەت جانە تىلدەردى دامىتۋ باسقارماسى ۇيىمداستىرعان بايقاۋ بىرنەشە ماقساتتى كوزدەدى.
«ايماقتىق بايقاۋ, بىرىنشىدەن, مۇرات موڭكە ۇلىنىڭ شىعارماشىلىعىن جاڭعىرتۋ, ەكىنشىدەن, دارىندى جاستاردىڭ ورىنداۋشىلىق شەبەرلىگىن شىڭداۋ, ۇشىنشىدەن, جاس ۇرپاقتى ۇلتجاندىلىققا تاربيەلەۋ ماقساتىندا وتكىزىلدى. اتادان بالاعا ميراس بولعان ساف التىنداي تەرمە ونەرىنە جاڭا سەرپىن بەرۋدى ۇيعاردىق», دەدى وبلىستىق حالىق شىعارماشىلىعى ورتالىعىنىڭ باسشىسى جانىبەك امانيازوۆ.
بايقاۋعا قاتىسۋشىلار ەكى كەزەڭدە باق سىنادى. الدىمەن اقىننىڭ جىرىن, ال ەكىنشى كەزەڭدە تەرمە مەن تولعاۋلاردى ورىندادى.
ماسەلەن, اقتوبەلىك ونەرپاز جانەركە قۇتتىعاي دومبىرانى جەتى جاسىنان سەرىك ەتكەن. باستاپقىدا حالقىمىزدىڭ ءداستۇرلى اندەرىن ورىنداپ جۇرگەن. كەيىن جىرشىلىق باعىتقا دەن قويعان. «ماعان بۇل باعىت وتە ۇنايدى. تەرمە – مازمۇنى جاعىنان تەرەڭ, تاربيەلىك سيپاتى بار 3-4 مينۋتتىق شىعارما. تولعاۋ – 10 جانە ودان دا كوپ مينۋتقا سوزىلاتىن تۋىندى. ال جىر ورىنداۋ جارتى ساعاتتان التى ساعاتقا دەيىن سوزىلۋى مۇمكىن. ازىرگە جارتى ساعاتتىق شىعارمالاردى ورىنداپ ءجۇرمىن. شىعارماشىلىقتىڭ بۇل جانرى پاتريوتتىق سەزىمدى, وتانعا دەگەن سۇيىسپەنشىلىكتى وياتادى. ۇلت باتىرلارىنىڭ ەرلىگى باياندالاتىن جىر كوپ. ارينە, ەكى جاستىڭ اراسىنداعى ماحابباتتى جىرلايتىن تۋىندىلار دا بار. جىر-تەرمەلەردى ورىنداپ, سوزدىك قورىمدى بايىتتىم», دەيدى جانەركە قۇتتىعاي.
ونىڭ ايتۋىنشا, اقتوبەدە جىر-تەرمە مەكتەبى اشىلعان. قازىر ۇلتتىق ونەردى دارىپتەيتىن مەكتەپتە قازاق ۇلاندارى كوپ. ولارمەن بىرگە ورىستىڭ ءۇش بالاسى ءدارىس الادى.
قازىلار القاسى ءار قاتىسۋشىنىڭ ورىنداۋشىلىق شەبەرلىگىنە باس ءمان بەردى. سايىس قورىتىندىسىمەن ماڭعىستاۋ وبلىسىنان قاتىسقان بەردىباي تويعۇليەۆ باس جۇلدەنى يەلەندى. ءبىرىنشى ورىن اتىراۋ قالاسىنىڭ تۋماسى ارۋجان ەرىموۆاعا, ەكىنشى جۇلدە اقتوبە قالاسىنان كەلگەن ونەرپاز ديلناز قۋانىشقا بەرىلدى. ال جانەركە قۇتتىعاي ءۇشىنشى جۇلدەگە لايىق دەپ تانىلدى.
اتىراۋ وبلىسى