ۇلتتىق بانك ەلەكتروندى اقشاعا قاتىستى وزگەرىس ەنگىزدى

ەندى ەلەكتروندى اقشا ارقىلى تولەم جاسالعاننان كەيىن پايدالانۋشىعا وپەراتسيانى راستايتىن ساۋدا چەگى بەرىلۋگە ءتيىس. ول ەلەكتروندى حابارلاما نەمەسە قاعاز نۇسقاسىندا ۇسىنىلادى.

سونىمەن قاتار ساۋدا چەگىندە كورسەتىلەتىن مالىمەتتەر ءتىزىمى كەڭەيتىلدى. اتاپ ايتقاندا, قۇجاتتا تولەم سوماسى, وپەراتسيانىڭ كۇنى مەن ۋاقىتى, چەك ءنومىرى, ترانزاكتسيا كودى, جىبەرۋشى مەن الۋشىنىڭ ەلەكتروندى ءاميان دەرەكتەرى, بايلانىس نومىرلەرى, وپەراتسيا ماقساتىنىڭ كودى جانە ەلەكتروندى اقشانى وتەۋگە قاتىستى مالىمەتتەر قامتىلۋى كەرەك.

«دامۋ» قورى العاش رەت تسيفرلىق تەڭگەمەن نەسيە بەردى

بۇدان بولەك, ءۇشىنشى تاراپ قىزمەتتەرىن تولەۋ كەزىندە تولەم قۇجاتىندا وپەراتسياعا قاتىسۋشىلاردىڭ تولىق تىزبەگى كورسەتىلۋگە ءتيىس. بۇل تالاپ شەتەلدىك تولەم دەلدالدارى ارقىلى جۇرگىزىلەتىن وپەراتسيالارعا دا قاتىستى.

قاۋلىدا كيبەرقاۋىپسىزدىك تالاپتارى دا كۇشەيتىلگەن. ەندى ەلەكتروندى اقشا جۇيەسىنىڭ وپەراتورلارى كيبەرقاۋىپسىزدىكتى باسقارۋ جۇيەسىن قۇرىپ, ونىڭ تۇراقتى جۇمىسىن قامتاماسىز ەتۋگە مىندەتتى.

وپەراتورلار كيبەرقاۋىپسىزدىك ساياساتىن بەكىتىپ, اقپاراتتىق اكتيۆتەردى قورعاۋعا باعىتتالعان ىشكى قۇجاتتاردى ازىرلەۋى قاجەت. سونداي-اق تسيفرلىق ينفراقۇرىلىمنىڭ قورعانىس دەڭگەيىنە جىلىنا كەمىندە ءبىر رەت تەكسەرۋ جۇرگىزىلىپ, ناتيجەسى بويىنشا ارنايى ەسەپ دايىندالادى.

ۇلتتىق بانكتە تىركەۋدەن وتكەن تولەم ۇيىمدارى ارنايى كيبەرقاۋىپسىزدىك ءبولىمىن قۇرۋى نەمەسە وسى سالاعا جاۋاپتى ماماندى تاعايىنداۋى كەرەك. بۇل قۇرىلىم كيبەرقاۋىپسىزدىك تالاپتارىنىڭ ورىندالۋىن باقىلاپ, ءتيىستى جۇمىستاردى ۇيلەستىرەدى.

تسيفرلىق تەڭگە – ينۆەستيتسيالىق قۇرال ەمەس: ۇلتتىق بانك ازاماتتارعا ەسكەرتۋ جاسادى

قۇجاتقا سايكەس, كيبەرقاۋىپسىزدىك قىزمەتكەرلەرىنىڭ بىلىكتىلىگىن ارتتىرۋ دا مىندەتتەلدى. ولار ىشكى سەمينارلار مەن دارىستەرگە قاتىسىپ, كەمىندە ەكى جىلدا ءبىر رەت سىرتقى وقۋدان ءوتۋى كەرەك.

سونداي-اق جۇمىسقا جاڭادان قابىلدانعان قىزمەتكەرلەر بەس جۇمىس كۇنى ىشىندە كيبەرقاۋىپسىزدىك تالاپتارىمەن تانىستىرىلىپ, ارنايى نۇسقامادان وتەدى. بۇل ءراسىم ارنايى جۋرنالدا نەمەسە وزگە دە قۇجاتتا تىركەلەدى.