قازاقستاندا سۋ تاپشىلىعى قاۋپىنە بايلانىستى سۋ پايدالانۋ ليميتتەرى قىسقارتىلدى. بۇل تۋرالى ۇكىمەت وتىرىسىندا سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ مالىمدەدى, دەپ حابارلايدى Egemen.kz.
ءمينيستردىڭ ايتۋىنشا, سىرداريا وزەنى باسسەينىندە سۋ قويمالارىنىڭ تولۋى وتكەن جىلمەن سالىستىرعاندا 1,6 ملرد تەكشە مەترگە ازايعان. قازاقستانعا كەلەتىن سۋ اعىنى ورتاشا كوپجىلدىق نورمانىڭ 70%-ىن عانا قۇراپ وتىر. بۇل جاعداي تومەن سۋ رەجيمىن قالىپتاستىرىپ, ورتا جانە تومەنگى اعىستا تاپشىلىق قاۋپىن ارتتىرادى.
«بالقاش – الاكول باسسەينىندەگى سۋ قويمالارىنىڭ تولۋ دەڭگەيى 97%-دى قۇرايدى. قاپشاعاي سۋ قويماسى 98% تولعان. 2026 جىلعا بەكىتىلگەن سۋ پايدالانۋ ليميتتەرى الماتى وبلىسى بويىنشا 2,1 ملرد تەكشە مەتردى, ال جەتىسۋ وبلىسى بويىنشا 1,8 ملرد تەكشە مەتردى قۇرايدى. جينالعان سۋ قورىنىڭ جوعارى دەڭگەيىنە قاراماستان, الماتى وبلىسىنداعى كۇرتى سۋ قويماسى ماڭىندا سۋ تاپشىلىعى قاۋپى ساقتالىپ وتىر. قازىرگى ۋاقىتتا سۋ قويماسىنداعى سۋ كولەمى 64 ملن تەكشە مەتردى قۇرايدى, بۇل وتكەن جىلمەن سالىستىرعاندا 38 ملن تەكشە مەترگە از», دەدى ن.نۇرجىگىتوۆ.
قازاقستان قازىردىڭ وزىندە سۋ تاپشىلىعى ايماعىندا تۇر: سۋ رەسۋرستارىنىڭ 45%-ى ترانسشەكارالىق كوزدەر ارقىلى قالىپتاسادى
وڭتۇستىك وڭىرلەردەگى سۋ قويمالارىندا جالپى 26,2 ملرد تەكشە مەتر سۋ جينالعان. بۇل وتكەن جىلمەن سالىستىرعاندا 500 ملن تەكشە مەترگە كوپ.
تازا سۋ تاپشىلىعى قاشان جويىلادى؟
ءمينيستردىڭ مالىمەتىنشە, قىرعىزستان اۋماعىنداعى كيروۆ جانە ورتو-توكوي سۋ قويمالارىنىڭ تومەن تولۋى دا الاڭداۋشىلىق تۋعىزىپ وتىر. وسىعان بايلانىستى 2026 جىلعا ارنالعان سۋ پايدالانۋ ءليميتى 1,2 ملرد تەكشە مەتردەن 900 ملن تەكشە مەترگە دەيىن قىسقارتىلعان.
نۇربولات امانبەك