قورعانىس مينيسترلىگى تاربيە جانە يدەولوگيالىق جۇمىس جانە تۇركىستان وبلىسى قورعانىس ىستەرى جونىندەگى دەپارتامەنتتەرىنىڭ باستىقتارى ادىلەت پولكوۆنيگى تىلەۋحان باسقوجاەۆ پەن پولكوۆنيك نۇرماحانبەت دۇيسەباەۆ ەكىنشى دۇنيەجۇزىلىك سوعىسىنىڭ ارداگەرى 96 جاستاعى ءابجاپپار دايراباي ۇلىن كەلە جاتقان ايتۋلى مەرەكە – رەسپۋبليكا كۇنىمەن قۇتتىقتادى, دەپ حابارلايدى Egemen.kz اتالعان ۆەدومستۆوعا سىلتەمە جاساپ.
ءابجاپپار دايراباي ۇلى 1927 جىلى 1 قاڭتاردا تۇركىستان اۋدانى تارتوعاي اۋىلىندا دۇنيەگە كەلگەن. 1932 جىلدان باستاپ تۇركىستان قالاسىنىڭ بالالار ۇيىندە تاربيەلەنىپ, سودان كەيىن ۇلكەن اعاسى بيماش دايراباي ۇلىنىڭ قامقورلىعىندا بولعان. بەس جاسىندا اشتىقتان امان قالعان ول ەكىنشى دۇنيەجۇزىلىك سوعىسى باستالعان شاقتا نەبارى 14 جاستا ەدى.
ءا.دايراباي ۇلى 16 جاسىنان باستاپ بەلارۋس جانە ۋكراينا مايداندارىندا سوعىسىپ, پولشانى ازات ەتۋگە قاتىسىپ, «وتان سوعىسى» وردەنىمەن جانە مەدالدارمەن ماراپاتتالعان.
ەلگە ورالعان سوڭ مۇعالىم بولىپ جۇمىس ىستەگەن. سوعىس ارداگەرلەرى قالالىق كەڭەسىنىڭ توراعاسى بولدى. اقساقال ەكى ۇل, ءۇش قىز تاربيەلەپ وسىرگەن.