سەناتور اليشەر ساتۆالديەۆ ۇكىمەت باسشىسى ءاليحان سمايىلوۆتىڭ اتىنا جولداعان دەپۋتاتتىق ساۋالىندا تۇركىستان وبلىسىنىڭ سايرام اۋدانىنداعى ينفراقۇرىلىمنىڭ وزەكتى ماسەلەلەرىن كوتەردى, دەپ حابارلايدى Egemen.kz.
سەناتوردىڭ ايتۋىنشا, حالىقتى ساپالى اۋىز سۋ جانە ەلەكترمەن قامتاماسىز ەتۋ ءۇشىن ينجەنەرلىك ينفراقۇرىلىمدى شۇعىل دامىتۋ قاجەت.
«مىسال ءۇشىن, قارابۇلاق اۋىلدىق وكرۋگىندەگى ساپالى اۋىز سۋمەن قامتاماسىز ەتۋ ماسەلەسى وزەكتى كۇيىندە قالىپ وتىر. 59 مىڭعا جۋىق حالقى بار اۋىل وكرۋگى تۇرعىندارىنىڭ تەك 60 پايىزى عانا اۋىز سۋمەن قامتىلعان. اۋىل حالقىنىڭ 30-35 پايىزى قۇدىق جانە وزدەرى قازىپ العان سۋ ۇڭعىمالارىن پايدالانۋعا ءماجبۇر. تۇرعىندار اراسىندا ىشەك اۋرۋلارىنا شالدىققاندار بار. اۋىل كوشەلەرىنىڭ جاعدايى ءماز ەمەس, 70 پايىزى جوندەۋدى قاجەت ەتەدى», دەدى سەناتور.
دەپۋتات سونىمەن قاتار اۋدانداعى حالىق سانىنىڭ وسۋىنە بايلانىستى جاڭا تۇرعىن ۇيلەر سالۋ قاجەتتىگىن ايتتى. ول سونداي-اق سايرام اۋدانىندا جەرگە كەزەكتە 56 مىڭنان استام ازامات تۇرعانىن حابارلادى.
«وسى ماسەلەنى شەشۋ ءۇشىن سايرام اۋدانىنىڭ جەر ۋچاسكەلەرىندە ينجەنەرلىك كوممۋنيكاتسيالار سالۋ جوسپارلانىپ وتىر. قۇنى 891 ملن تەڭگەگە جوبالىق قۇجاتتاما دايىندالدى. سونىمەن قاتار اۋدان تۇرعىندارىن تۇراقتى ەلەكتر جارىعىمەن قامتاماسىز ەتۋ ماقساتىندا اقسۋكەنت اۋىلىنان قوسالقى ەلەكتر ستانتسياسىن سالۋ ءۇشىن قۇنى – 1,7 ملرد تەڭگەنى قۇرايتىن جوبالىق سمەتالىق قۇجاتتار ازىرلەنگەن. جوعارىدا اتالعان ماسەلەلەر بويىنشا بارلىق ءتيىستى قۇجاتتار راسىمدەلىپ, رەسپۋبليكالىق بيۋدجەتتەن قارجىلاندىرۋ بويىنشا وتىنىمدەر جولدانعان», دەدى دەپۋتات.
سەناتور وسىعان بايلانىستى ءاليحان سمايىلوۆتان «قۋاتتى وڭىرلەر – ەل دامۋىنىڭ درايۆەرى» ۇلتتىق جوباسى اياسىندا ايتىلعان ماسەلەلەردى رەسپۋبليكالىق بيۋدجەتتەن قارجىلاندىرۋ ماسەلەسىن قاراۋدى سۇرادى.