سايلاۋعا ازىرلىك پىسىقتالدى

ساپاردىڭ العاشقى كۇنى ش.ەسەنوۆ اتىنداعى كاسپي مەملەكەتتىك تەحنولوگيالار جانە ينجينيرينگ ۋنيۆەر­سي­تەتىنىڭ ستۋدەنتتەرىمەن كەزدەسۋ ءوتتى. ستۋدەنتتەرمەن كەزدەسۋ بارىسىندا نۇرلان ءابدىروۆ ەل پرەزيدەنتىنىڭ ىسكە اسىرىلعان كونستيتۋتسيالىق رەفورمالارى, ارالاس سايلاۋ جۇيەسىنىڭ ەرەكشەلىكتەرى, اۋداندىق دەڭگەيدەگى اكىمدەردى سايلاۋ ينستيتۋتىن ەنگىزۋ تۋرالى كەڭىنەن ايتىپ بەردى. ستۋدەنت­تەر­مەن اڭگىمەلەسۋ بارىسىندا وسك توراعاسى حالىقارالىق سايلاۋدى باي­قاۋ تاقىرىبىن قوزعادى. ول ەقىۇ/دياقب ميسسيالارىنىڭ ەلدە وتكەن پرەزيدەنتتىك جانە پارلامەنتتىك سايلاۋدى بايقاۋ جونىندەگى قورىتىندى ەسەپتەرى تۋرالى ايتتى. ەقىۇ ۇسىنعان ۇسى­نىمدارعا بەرىلگەن وتاندىق عالىم­دار مەن ساراپشىلاردىڭ باعالارىنا توقتالدى.

مۇنان كەيىن جينالعان 70 ستۋدەنت ونلاين داۋىس بەرۋگە بەلسەندى قاتىستى. ماسەلەن, رەسپوندەنتتەردىڭ 34%-ى قاشىقتىقتان ەلەكتروندىق داۋىس بەرۋدى ەنگىزۋدى قولدايدى, ال 28,6%-ى ارالاس ەلەكتروندىق داۋىس بەرۋدى (ستاتسيونارلىق, قاشىقتىقتان) قولايلى دەپ ساناسا, 77,1%-ى ەل پرە­زي­دەنت­تىگىنە كانديدات مەملەكەتتىك ءتىلدى ءبىلۋى جانە لينگۆيستيكالىق ەمتيحان تاپسىرۋى مىندەتتى دەپ ەسەپ­تەيدى. ال رەسپوندەنتتەردىڭ 48,6%-ى سوتتىلىعى بار ازامات پرەزيدەنتتىڭ, دەپۋتاتتىڭ, اكىمنىڭ سايلانبالى لاۋازىمدارىنا ۇسىنىلا المايدى دەپ جاۋاپ بەردى.

مۇنان كەيىن نۇرلان ءابدىروۆتىڭ ماڭعىستاۋ اۋدانىنداعى №10 وكرۋگ بويىنشا شىعىپ قالعان تۇلعانىڭ ورنىنا اۋداندىق ءماسليحات دەپۋتاتىن سايلاۋعا دايىندىق پەن وتكىزۋ بارىسىمەن تانىستى. ونىڭ توراعا­لىعىمەن شەتپە كەنتىندە كەڭەس ءوتتى, وندا وبلىستىق جانە اۋدان­دىق سايلاۋ كوميسسيالارىنىڭ, جەر­گى­لىكتى اتقارۋشى جانە قۇقىق قور­عاۋ ورگاندارىنىڭ باسشىلارى سايلاۋشىلار تىزىمدەرى, سايلاۋدى ۇيىمداستىرۋشىلىق, ماتەريالدىق-تەحنيكالىق قامتاماسىز ەتۋ, مۇگەدەكتىگى بار 74 ادامعا سايلاۋ ۋچاسكەلەرىنىڭ فيزيكالىق قولجەتىمدىلىگى ءۇشىن قاجەتتى جاعداي جاساۋ, سايلاۋ بيۋللەتەندەرىن ۋاقتىلى جەتكىزۋ جانە ساقتاۋ بويىنشا جۇرگىزگەن جۇمىستارى تۋرالى بايانداما جاسادى. كەڭەستى قورىتىندىلاي كەلە, ورتالىق سايلاۋ كوميسسياسىنىڭ توراعاسى نۇرلان ءابدىروۆ ۋاكىلەتتى ورگانداردىڭ نازارىن سايلاۋ ۋچاسكە­لەرىندەگى ءاربىر سايلاۋشىنىڭ كونستي­تۋتسيالىق قۇقىقتارى مەن قوعامدىق ءتارتىپتى قامتاماسىز ەتۋگە اۋداردى.

سونىمەن قاتار ن.ءابدىروۆ سايلاۋ كوميسسيالارىنىڭ مۇشەلەرىمەن, جەرگى­لىكتى اتقارۋشى ورگاننىڭ, اۋدان­­­دىق پروكۋراتۋرانىڭ, پوليتسيا جانە توتەنشە جاعدايلار بولىم­دەرىنىڭ وكىلدەرىمەن بەينەۋ اۋدانى اكىمىنىڭ سايلاۋىن پيلوتتىق رەجىمدە ۇيىمداستىرۋ ماسەلەلەرىنە ارنالعان كەڭەس وتكىزدى. كەڭەسكە قاتىسۋشىلار وزدەرىنىڭ جەتەكشىلىك ەتەتىن سالالارىنا سايكەس جۇرگىزىپ جاتقان دايىندىق جۇمىستارى تۋرالى باياندادى. كەڭەس سوڭىندا وسك توراعاسى بۇل ماڭىزدى سايلاۋ ناۋقانى زاڭعا قاتاڭ سايكەس ءجۇرۋى جانە جوعارى ۇيىمداستىرۋشىلىق دەڭگەيدە ءوتۋى ءتيىس ەكەنىن اتاپ ءوتتى. بارلىق ۇيىمداستىرۋشىلارعا ۇلكەن جاۋاپكەرشىلىك جۇكتەلگەن.

ماڭعىستاۋ وبلىسى