زايساندا تۋىپ, باياناۋىلدا تۇلەگەن, اقكول جايىلمادان ايتىس الامانىنا ات قوسىپ, قازاق ايتىسىنىڭ «سولاقاي سەرىسى», «كەرەكۋدىڭ يساسى» اتانعان ايتىسكەر اقىن سەرىك قۇسانباەۆ 60 جاسقا تولدى. ونەر يەسىنىڭ قۇرمەتىنە پاۆلوداردا «اقيقاتتىڭ اقبوزىن الشاڭداتقان» اتتى شىعارماشىلىق كەش ءوتتى.
قازاقتىڭ ۇلىق ونەرى سوناۋ 80-جىلداردىڭ اياعىندا قايتا جاڭعىرىپ, ساحنا تورىنە وزعاندا سەرىك قۇسانباەۆ پاۆلودار وبلىسىنىڭ 50 جىلدىعىندا العاش رەت تەرمە ورىنداۋعا بارىپتى. سول جولعى ايتىس سيقىرى اعامىزدى بىردەن باۋراپ اكەتىپ, ءوزى دە كوپ ۇزاماي ايتىس الامانىنا قوسىلىپ كەتەدى.
«...شابىتسىز جىر شىعا ما, ءان شىعا ما؟
ق ۇلىقسىز كوك دونەندى قامشىلاما.
تەربەلگەن تەڭىز بولسا, قازاق جىرى,
بىزدىكى سوعان قوسار تامشى عانا»,
دەپ جىرلاعان ەكەن اقىن.
پوەزيا مەن ايتىس, تەرمەشىلىك, جۋرناليستيكا سەكىلدى بىرنەشە ونەردى تەڭ الىپ جۇرگەن سەكەڭنىڭ عۇمىرىنىڭ دەنى ەرتىس-بايان وڭىرىندە ءوربىدى. اقپارات سالاسىندا 20 جىلعا جۋىق قىزمەت ەتىپ, جۇيرىك قالامىن رۋحانيات سالاسىنا, ۇلتتىق رۋح باعىتىندا سەرمەدى. ورامدى وي, سەرگەك سانامەن جازىلعان دۇنيەلەر ءوز ناتيجەسىن بەرمەي قالعان جوق. نە جازسا دا, تاپ-تۇيناقتاي ەتىپ توگىلتە جازاتىن سەكەڭ ايتىستاعى ادۋىندى شابىسىن گازەت بەتىندە دە كورسەتىپ كەلەدى.
شىعارماشىلىق كەشكە ارنايى كەلگەن ايتىسكەر اقىن, پارلامەنت ءماجىلىسىنىڭ دەپۋتاتى امانجول التاەۆ, عالىم قويلىباي اسانوۆ, ايتىسكەر اقىن, فيلولوگيا عىلىمدارىنىڭ كانديداتى سەرىكزات دۇيسەنعازى, كونە ماقامداردى كەيىنگى ۇرپاققا ناسيحاتتاۋشى, جىرشى قۇدايبەردى مىرزابەك, اقىن داۋلەتكەرەي كاپ ۇلى ءسوز الىپ, سەكەڭنىڭ رۋحانيات سالاسىنداعى ەسەلى ەڭبەگىن جوعارى باعالايتىندارىن جەتكىزدى. «ايتىس – قازاق حالقىنىڭ ۇلتتىق برەندى. ەل تاۋەلسىزدىگىن ەندى الىپ, ەڭسە كوتەرە باستاعان جىلدار ۇلت تاريحى ءۇشىن سىڭدارلى كەزەڭ بولاتىن. تاۋەلسىز ەلدىڭ ىرگەسىن ەندى بەكەمدەپ ەلەڭ-الاڭ كۇي كەشكەن حالىق ساناسىنا ۇلتتىق يدەولوگيا اسا قاجەت بولىپ تۇرعان شاق ەدى. قوعامدا ورىن العان وزەكتى پروبلەمالار سەرىك اقىننىڭ جىرلارىندا تولىقتاي كورىنىس تاۋىپ وتىردى, باسىن بايگەگە تىگىپ شىندىقتى جىرلادى», دەدى قويلىباي اسانوۆ.
ايتىس ارداگەرلەرىمەن كەزدەسۋ جاس اقىندارعا ەرەكشە اسەر سىيلادى. «التىن دومبىرا» يەگەرى اسپانبەك شۇعاتاەۆ ارناۋ جىر ارناسا, جەرگىلىكتى جاس اقىندار جىردان شاشۋ شاشىپ, قۇرمەت كورسەتتى. ونەر يەسىنە كەرەكۋلىك ونەرسۇيەر قاۋىم ات مىنگىزىپ, يىعىنا شاپان جاپتى. كەش يەسىنىڭ ءوزى وسى تاماشا ءساتتى پايدالانىپ, ايتىسقا كيگەن قىزىل شاپانىن بۇقار جىراۋ اتىنداعى ادەبيەت جانە ونەر مۋزەيىنە تابىستادى.
ايتىپ وتەيىك, سەرىك قۇسانباەۆ ايتىس الامانىندا ولجا سالىپ, داۋىرلەپ تۇرعان شاعىندا 13 مارتە باس جۇلدەنى ولجالاعان ەكەن. جىرلارى بەينە ءبىر التايدىڭ اق جاۋىنىنداي سەبەلەپ, ءنارلى دە ءارلى بولىپ كەلەتىن, ءار ولەڭى تاعدىرلى اقىننىڭ دەنىنە ساۋلىق, وتباسىنا اماندىق تىلەيمىز.
پاۆلودار وبلىسى