...بۇل سۋرەت وسىدان 32 جىل بۇرىن – 1991 جىلدىڭ 10 قازانىندا تۇسىرىلگەن ەدى. قۇرامىندا قازاقتىڭ تۇڭعىش عارىشكەرى توقتار اۋباكىروۆ, اناتولي ارتسەبارسكي جانە اۋستريالىق فرانتس فيبەك بار «مير» كەشەنىنىڭ قۇلديلاۋ اپپاراتى الماتى ۋاقىتىمەن 09 ساعات 12 مينۋتتا قاسيەتتى جەرگە جايلى قوندى.
عارىشكەرلەرگە جۇمساق الاقانىن جايعان جەرۇيىق – ارقالىق اۋدانى مايكوتوۆ اتىنداعى كەڭشاردىڭ جۇرىنباي جايلاۋى تورعاي وبلىسىنىڭ ورتالىعىنان وڭتۇستىك شىعىسقا قاراي 58 شاقىرىمدا جاتىر ەدى. ارنايى قارسى الۋشىلاردىڭ قۇرامىندا «ەگەمەندى قازاقستان» گازەتىنىڭ وسى وبلىس بويىنشا مەنشىكتى ءتىلشىسى رەتىندە ءبىز دە بولعان ەدىك. باسىلىم مارتەبەسىنە وراي قۇرىش قازاق توقتارعا العاشقى سۇراق بەرۋ مۇمكىندىگىن پايدالانىپ, ونىڭ تەر جۋعان جۇزىنە ماساتتانا قاراپ تۇرىپ: «قارقارالىنى» شىرقادىڭىز با عارىشتا؟», دەپپىن. ء«يا, ءمادي بابامنىڭ بۇل ءانىن داۋىسىم جەتكەنشە سالىپ باقتىم عوي», دەگەن ول قىرانشا ساڭق ەتىپ, كوكزەڭگىر اسپانعا قۇمارتا جانار قادادى.
كوكتەن ارىپتەستەرىمەن ەسەن-ساۋ تۇسكەن توقتار اعاسىن كورگەندە اقىن ناعاشىباي مۇقاتوۆ شابىتتانىپ, جىر توككەن:
«كوكىرەك تىم كەرەمەت كۇي ۇققانداي,
ۇلعايدى جاڭالىققا ۇيىپ تورعاي.
عارىشقا تالماي تارتقان قازاق اتىن,
تۇعىرى توقتارىمنىڭ بەرىك بولعاي!»
بۇل ارناۋدان ءلاززاتتانا كۇش جيعان توقتار باتىر ك ۇلىمدەي ءتۇسىپ, كۇركىرەي ءتىل قاتتى:
– عارىشتان جەتكەن كوك بايراعىڭدى قابىلدا, قازاقستانىم! بەرىك قولدا بول, بەيبىت زاماندا ەركىن جەلبىرەي بەرشى!
ءبىز باتىر جۇزىنەن كوز الماي, وتانشىل جۇرەكتىڭ ىستىق ءىلتيپاتىنا قوسا بولەنگەندەي كۇي كەشتىك.
قايسار ءالىم,
«Egemen Qazaqstan»-نىڭ ارداگەرى