جاقسىنىڭ كۇلكىسى دە جاقسى

ادامنىڭ ادامدىق سىن-سيپا­تىن انىقتايتىن قادىر-قاسيەتتەر از ەمەس. سونىڭ ءبىرى – كوڭىل-قوشىنىڭ كو­­تەرىڭكى, جانى­نىڭ جايدارى كەزىن جار­­قىراتىپ كور­سەتەتىن, سىرتقى بەت-بەي­نەسىنەن عانا ەمەس, ىشكى دۇنيەسى­نەن دە ايقىن حابار بەرەتىن سەزىمىنىڭ ء­بىر ساۋ­لەلى ءساتى كۇلكىسى بولسا كەرەك.

كۇلكىنىڭ سان الۋان ءتۇرى بار... مۇ­نى قازاق اتامىز باياعىدا-اق ايتىپ قويعان! سول سياقتى ونىڭ ءبارىن ءوز شىعارمالارىندا كەيىپكەرىن بەينەلەۋ, بەدەرلەۋ ارقىلى جىلىكتەپ, جىكتەپ كورسەتكەن قالامگەرلەرىمىز دە جەتەدى. سونداي-اق, سىقاقشى اقىن, ساتيريك جازۋشىلارىمىز دا ءازىل-شىنى ارالاس, ءتۇرلى-ءتۇرلى كۇلكىنى تىزبەلەپ, ءتىزىپ بەرگەنىن بىلەمىز...

مىنا سۋرەتتە ديماش اتانىڭ مو­يىن­قۇمدىقتارمەن كەزدەسۋىنىڭ ءبىر ءساتى كورىنىس تاپقان. ۇلكەن كىسى­نىڭ شىن جۇ­رەكپەن كۇلگەنى... ەل باس­شىسىنىڭ كەڭ جاي­لاۋداي جا­يىلعان, كورىكتى كول­دەي كولكىگەن كو­ڭىلى... حالقىن سۇيگەن قايراتكەردىڭ ناعىز قازاقى قالپى...

سول جاقتان باستاساق, سۋرەت­تە جام­بىل وبلىستىق پارتيا كومي­تە­تى­نىڭ ءبىرىنشى حاتشىسى حاسەن بەكتۇرعانوۆ, اۋدان­دىق اۋىل شارۋاشىلىعى باسقار­ما­سىنىڭ باستىعى قاراتاي ادامباەۆ جانە سوعىس ارداگەرى, سول تۇستاعى فۋرمانوۆ اتىنداعى كەڭشاردىڭ كا­سىپ­وداق كوميتەتىنىڭ توراعاسى ءالي­­حان ەسجانوۆ (اق جەيدەلى) تۇر. ال رەس­­پۋب­ليكاداعى ەڭ جوعار­عى لاۋا­­زىمدىق قىزمەتىنە قاراماس­تان قارا­پايىمدىلىق پەن كىشىپەيىلدىلىكتىڭ ۇلگىلى ۇردىسىمەن ديمەكەڭنىڭ ءوزى قولتىعىنان ۇستاعان اق ساقالدى قاريا – فۋرمانوۆ اتىنداعى كەڭشاردىڭ وزات مالشىسى قوڭقا ورمانبەكوۆ.

كوزىن كورگەندەردىڭ ايتۋىنشا, ول كىسى ءازىل-قالجىڭدى ۇناتاتىن, قۋاقى ءتىلدى ادام ەكەن. سوندىقتان سول شاقتا بارلىعىن دا قاتتى كۇلدىرەتىن ءسوز ايتقان بولۋى كەرەك...

بەرىكباي قادىقوۆ,

جۋرناليست

الماتى وبلىسى,

قاراساي اۋدانى