باشپايىن باس بارماقتىڭ ورنىنا سالىپ بەردى

بۇل وپەراتسيالاردى الماتىداعى №2 بالالار قالالىق كلينيكالىق اۋرۋحانا­سىنىڭ تراۆماتولوگ-ميكروحيرۋرگ­تەرى مەن ايگىلى ميكروحيرۋرگ, ماسكەۋ قالا­لىق رحدۋ تراۆماتولوگيا جانە ورتو­­پە­ديا كافەدراسىنىڭ پروفەسسورى يگور گولۋبەۆپەن بىرگە جاسادى. ال­تى بىر­دەي كىشكەنتاي ءومىردى وزگەرت­كەن كۇر­دەلى ميكروحيرۋرگيالىق وپەراتسيا­لار «دوبرو­ۆولنوە وبششەستۆو «ميلوسەرديە» قو­عامدىق قورى مەن ال­ماتى قالاسى قو­عام­دىق دەنساۋلىق ساقتاۋ باسقار­ما­سىنىڭ ۇيىمداستىرۋىمەن وتكەن ءۇش كۇندىك شە­بەرلىك-دارىستەرى اياسىندا اتقارىلعانىن ايتا كەتكەن ءجون.

ال 1,5 جاسار بالانىڭ اجەسى ميرا قا­ليبەكوۆا: «نەمەرەمنىڭ تۋعان كەزدە وڭ قولىنىڭ بىلەگى بولمادى, سول قولىنىڭ باس بارماعى جەتىلمەگەن ەكەن. قىزىم «دوم» قوعامدىق قورىنا جۇگىنىپ, مەديتسينالىق تەكسەرۋدەن كەيىن دارىگەرلەر اياقتاعى باشپايدى سول قولعا اۋىستىرىپ سالۋعا بولاتىنىن ايتىپتى. ەندى وسى وپەراتسيادان كەيىن نەمەرەم سول قولىمەن دە ىدىسىن ۇستاپ, ويناي الادى. مەكتەپكە بارعان كەزىندە ەكى قولىمەن كىتاپ, داپتەرىن ۇستاپ, جازا الاتىن بولدى دەپ قۋانىپ وتىرمىز», دەيدى.

«مۇباراك وڭ قول اپلازياسى جانە سول قولدىڭ ءبىرىنشى جانە ەكىنشى ساۋساق­تارىنىڭ ۇشى جوق بولىپ دۇنيەگە كەلگەن. بالا دەگەن جۇرەدى, وينايدى, اتا-اناسى وڭ بىلەگىنە كوسمەتيكالىق پروتەزگە تاپسىرىس بەرگەن ەكەن. ال باشپايدى قولعا اۋىستىرۋ وپەراتسياسى 8 ساعاتقا سوزىلدى. ەندى بالا قالپىنا كەلۋى قاجەت. مۇنداعى بارلىق وپەراتسيالار ءارتۇرلى سيپاتتا بولدى. ناۋقاستاردىڭ ىشىندە ءتۋابىتتى كەسەلدەر, جاراقاتتان پايدا بولعان جاعدايلار دا بار», دەيدى №2 بالالار قالالىق كليني­كالىق اۋرۋحاناسىنىڭ ديرەكتورى مارات رابان­دياروۆ.

ال شەبەرلىك-دارىستەرىنە وسى اۋرۋحانا­نىڭ 20 شاقتى مامانى قاتىستى. اياق-قولدارىندا ءتۋابىتتى جانە جۇرە پاي­دا بولعان كەمىستىكتەرى بار بارلىق بالا­نىڭ ىشىنەن دارىگەرلەر كونسيليۋمى وپە­راتسيا جاساۋ ءۇشىن التى پاتسيەنتتى تاڭداعان. «مۇنداي شەبەرلىك دارىستەرىن دارىگەرلەردىڭ كاسىبيلىگى مەن باس سەرىك­تەسىمىز – «Samruk-Kazyna Trust» الەۋ­مەتتىك جوبالاردى دامىتۋ قورىنىڭ قول­داۋىنسىز اتقارۋ مۇمكىن بولماس ەدى», دەيدى «دوبروۆولنوە وبششەس­تۆو «مي­لوسەر­ديە» قوعامدىق قورىنىڭ نەگىزىن قا­لاۋشى ارۋجان ساين.

الماتى