قازاقستان, بەلارۋس, قىرعىزستان جانە رەسەي ۇكىمەتتەرىنىڭ باسشىلارى 25-27 قىركۇيەكتە استانادا ءوتىپ جاتقان «يننوپروم. قازاقستان» حالىقارالىق ونەركاسىپ كورمەسىنىڭ ەكسپوزيتسياسىمەن تانىستى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
اتالعان ءىس-شارانى العاش رەت وتكىزىپ وتىرعان قازاقستان 2019 جىلدان بەرى «يننوپرومنىڭ» تۇراقتى قاتىسۋشىسى بولىپ كەلەدى, ال وتكەن جىلى كورمەنىڭ سەرىكتەس ەلى رەتىندە ءوز ونىمدەرىن ۇسىندى. كورمەنىڭ نەگىزگى ماقساتى – وندىرىستىك كووپەراتسيانى دامىتۋ, ينۆەستيتسيا تارتۋ, ساۋدا ىنتىماقتاستىعىن كەڭەيتۋ جانە ءوزارا تاجىريبە الماسۋ.
وتاندىق «يننوپرومنىڭ» تاقىرىبى – جاڭا كەزەڭنىڭ ونەركاسىپتىك ستراتەگيالارى.
ەلورداداعى EXPO ورتالىعىنىڭ الاڭىندا ۇيىمداستىرىلعان كورمەگە ەاەو ەلدەرىنەن 300-دەن استام كاسىپورىن مەن كومپانيا قاتىسىپ جاتىر. كەلۋشىلەر نازارىنا مەتاللۋرگيا, ماشينا جاساۋ, حيميا جانە جەڭىل ونەركاسىپ, قۇرىلىس يندۋسترياسى مەن فارماتسەۆتيكا سالالارىنداعى ونىمدەردىڭ كەڭ اسسورتيمەنتى ۇسىنىلعان.
كورمەنى ارالاۋ بارىسىندا ءاليحان سمايىلوۆ, رومان گولوۆچەنكو, اقىلبەك جاپاروۆ جانە ميحايل ميشۋستينگە «تكش قازورتالىعى» اق» كومپانياسىنىڭ, Railways System KZ تەمىرجول ماشينا جاساۋ كاسىپورىندارى قاۋىمداستىعىنىڭ, وتاندىق اۋىل شارۋاشىلىعى تەحنيكاسى, اۆتوموبيلدەر, مۇناي-گاز, تاۋ-كەن جانە مەديتسينالىق تەحنيكا, ەلەكتروتەحنيكا, باقىلاۋ-ولشەۋ اسپاپتارى, ارنايى جۇمىس كيىمدەرى, تىڭايتقىشتار ت.ب. وندىرۋشىلەرىنىڭ ستەندتەرى تانىستىرىلدى. سونىمەن قاتار ۇكىمەتتەر باسشىلارى نازارىنا ۆيرتۋالدى شىندىق تەحنولوگيالارىن پايدالانا وتىرىپ, ونەركاسىپتىك ءىت ازىرلەمەلەر, اقپاراتتىق جۇيەلەر مەن تسيفرلىق ونىمدەر ۇسىنىلدى.
ايتا كەتەيىك, قازاقستان ەاەو سەرىكتەستەرىمەن بىرلەسىپ ونەركاسىپ سالاسىندا 38 بىرلەسكەن جوبانى جۇزەگە اسىرعان. بۇل رەتتە كووپەراتسيانىڭ نەگىزگى باسىمدىقتارى تەرەڭ وڭدەۋ, بارىنشا وقشاۋلاۋ, جاڭا ءونىم شىعارۋ جانە ەكسپورتتىق الەۋەت بولدى. سونىمەن قاتار بۇگىنگى تاڭدا تاعى 80 جوبانى ىسكە اسىرۋ جۇمىستارى پىسىقتالىپ جاتىر. بۇل مەملەكەت باسشىسى قاسىم-جومارت توقاەۆتىڭ تاياۋداعى قازاقستان حالقىنا جولداۋىندا ايتىلعان ەلدىڭ ونەركاسىپتىك نەگىزىن قالىپتاستىرۋ جانە تەرەڭ وڭدەلگەن كلاستەرلەر قۇرۋعا دەن قويۋ جونىندەگى تاپسىرمالارى تۇرعىسىنان ەرەكشە ماڭىزعا يە.
جالپى, سوڭعى 5 جىلدا رەسپۋبليكانىڭ وڭدەۋ ونەركاسىبىندەگى ءونىم كولەمى 2,2 ەسەگە – 2017 جىلعى 9,4 ترلن تەڭگەدەن 2022 جىلى 20,7 ترلن تەڭگەگە دەيىن ءوستى.