بۇل كۇندەرى الماتىدا ءداستۇرلى تۇردە وتكىزىلىپ كەلە جۇرگەن بيبىگۇل تولەگەنوۆانىڭ ءحىى حالىقارالىق ۆوكاليستەر كونكۋرسى دا مارەگە جەتىپ, جەڭىمپازدار انىقتالدى.
اباي اتىنداعى قازاق ۇلتتىق وپەرا جانە بالەت تەاترىنىڭ 90 جىلدىق مەرەيلى ماۋسىمىنىڭ اشىلۋىمەن قاتار وتكەن كونكۋرستىڭ الەۋمەتتىك سەرىكتەسى – «Samruk-Kazyna Trust» الەۋمەتتىك جوبالاردى دامىتۋ قورى ەكەندىگىن ايتا كەتۋ كەرەك.
سونىمەن بيىلعى باس جۇلدە ءازىربايجان استاناسى – باكۋدەن كەلگەن ماحير تاگيزادەگە بۇيىردى. وعان قوسا ماحير تاگيزادە «قازاقستان كومپوزيتورلارىنىڭ تۋىندىسىن شەبەر ورىنداعانى ءۇشىن» دەپ اتالاتىن ارناۋلى سىيلىققا دا يە بولدى.
كونكۋرستىڭ قازىلار القاسىنىڭ ءتورايىمى, كسرو جانە قازاقستاننىڭ حالىق ءارتىسى, سوتسياليستىك ەڭبەك ەرى, كسرو جانە قازاقستاننىڭ مەملەكەتتىك سىيلىقتارىنىڭ يەگەرى, اكادەميك, قازاق كلاسسيكالىق ونەرىنىڭ بۇلب ۇلى بيبىگۇل تولەگەنوۆا سالتاناتتى ماراپاتتاۋ راسىمىندە: «بايقاۋىمىزدىڭ بارشا قاتىسۋشىسىن, جاس ءارى تالانتتى ورىنداۋشىلاردى شىن جۇرەكتەن قۇتتىقتاي وتىرىپ, وسى بايقاۋعا قولداۋ بىلدىرگەن قر مادەنيەت جانە اقپارات مينيسترلىگىنە جانە ءمينيسترى ايدا بالاەۆاعا, الماتى اكىمدىگىنە, «Samruk-Kazyna Trust» الەۋمەتتىك جوبالاردى دامىتۋ قورىنا, اباي اتىنداعى قازاق ۇلتتىق وپەرا جانە بالەت تەاترىنا جانە ءبىزدىڭ بارلىق دەمەۋشىلەرىمىزگە العىس بىلدىرەمىن! ولاردىڭ قولداۋىنىڭ ارقاسىندا كونكۋرس ويداعىداي ءوتتى.
بيبىگۇل تولەگەنوۆانىڭ حالىقارالىق ۆوكاليستەر كونكۋرسى مەنىڭ جەكە كونكۋرسىم ەمەس, بۇل قازاقستان تۋرالى, ەل مادەنيەتىنىڭ يگىلىگى. كونكۋرس ەڭ الدىمەن قازاقستاننىڭ اتىن شىعاراتىن جوبا. بۇل بايقاۋ ورتالىق ازيا ەلدەرىندەگى كلاسسيكالىق ونەردەگى جالعىز جوبا بولعاندىقتان ءبىزدىڭ كونكۋرسقا قاتىسۋ ءۇشىن الىس جانە جاقىن شەتەلدەردەن كوپتەگەن تالانت يەلەرى كەلىپ, كاسىبي وپەرا جانە كونتسەرتتىك كامەرالىق انشىلەر جينالادى. بۇل ءبىز ءۇشىن جەتىستىك, قۋانىش. بيىلعى كونكۋرس ادەتتەگىدەي جوعارى دەڭگەيدە ءوتتى. كونكۋرستا جاڭا ەسىمدەر اتالدى, كلاسسيكالىق ونەردىڭ جاس قارلىعاشتارى قاناتتارىن قاقتى جانە ولار بيبىگۇل تولەگەنوۆانىڭ حالىقارالىق ۆوكاليستەر كونكۋرستىنىڭ لاۋرەاتتارى اتانادى. بۇلار – قازاقستاننىڭ ماقتانىشى. ءدال وسى كونكۋرستىڭ لاۋرەاتتارى الەمدىك ساحناعا شىعىپ, قازاقستاننان شىققان انشىلەر ەلىمىزدىڭ اتىن شىعارادى», دەدى.
بيبىگۇل تولەگەنوۆانىڭ ءحىى حالىقارالىق ۆوكاليستەر كونكۋرسىنىڭ جەڭىمپازى ماحير تاگيزادە جۋرناليستەرگە بەرگەن سۇحباتىندا: «قۋانىشىم قوينىما سىيماي تۇر, بۇل كونكۋرسقا ءۇش رەت قاتىسقىم كەلسە دە ءساتى تۇسپەگەن ەدى. ەندى مىنە, قاتىسىپ قانا قويماي, جەڭىمپاز اتاندىم. مەن ءوز ەلىمدەگى جانە باسقا دا كوپتەگەن حالىقارالىق كونكۋرستارعا قاتىسقانمىن. بۇل جولى الماتىدا, قازاقستاندا, بيبىگۇل احمەتقىزىنىڭ وتانىندا وتكەن بايقاۋعا قاتىسقانىما وتە قۋانىشتىمىن. قازاقستاندى ەكىنشى ءۇيىم دەپ سانايمىن. كونكۋرس تالابى بويىنشا ءبىز قازاق رومانسىن ورىندادىق, ودان وزگە ءوزىمنىڭ جەكە قالاۋىم بويىنشا فينالدا «اباي» وپەراسىنان اريا ورىندادىم. قازاقتىڭ كلاسسيكالىق شىعارمالارىن شىرقاۋ جانىمدى راحاتقا بولەيدى».
وسىلايشا گالا-كونتسەرتتە اباي اتىنداعى قازاق ۇلتتىق وپەرا جانە بالەت تەاترىنىڭ سيمفونيالىق وركەسترىنىڭ سۇيەمەلدەۋىمەن (ديريجەرى ە.احمەدياروۆ) كونكۋرس لاۋرەاتتارى ەڭ تانىمال قازاق جانە شەتەلدىك كلاسسيكالىق اندەردى ورىندادى.
2001 جىلدان بەرى ءار ەكى جىل سايىن وتكىزىلىپ كەلە جاتقان حالىقارالىق بايقاۋعا بيىل 70-تەن استام ءوتىنىش كەلىپ تۇسسە, ونىڭ 66-سى قاتىسىپ, 11 ەلدەن جاس تالانتتار باقتارىن سىنادى. قازاقستاننىڭ, رەسەي, قحر, چەحيا, ليۋكسەمبۋرگ, يتاليادان الەمدىك وپەرا ونەرىنىڭ مايتالماندارىنان قۇرالعانجوعارى دەڭگەيدەگى كاسىبي حالىقارالىق قازىلار القاسى قاتىسۋشىلاردىڭ ونەرىنە باعا بەرىپ, ۇزدىكتەرىن انىقتادى.
1 پرەميا جانە لاۋرەات اتانعاندار:
ازيزا وماروۆا – استانا, قازاقستان
ابىلاي بەكەن – استانا, قازاقستان
2 پرەميا جانە لاۋرەات اتانعاندار:
نۇرعالىم امانباي – الماتى, قازاقستان
اتاش كاراەۆ – باكۋ, ءازىربايجان
ليانتسزە حاو – تسزىبو, قىتاي
3 پرەميا جانە لاۋرەات اتانعاندار:
اياجان قۋانىشاليەۆا – الماتى, قازاقستان
ديار نۇرسۇلتانوۆ – الماتى, قازاقستان
ماقسات ساماتوۆ – الماتى, قازاقستان
گالينا تسولاكيان – ەرەۆان, ارمەنيا
ارنايى سىيلىق يەگەرلەرى:
بيبىگۇل تولەگەنوۆانىڭ رەپەرتۋارىنان قازاقستان كومپوزيتورلارىنىڭ اندەرىن ۇزدىك ورىنداعانى ءۇشىن ماراپاتتالعاندار:
ايبەك حايرۋللا (استانا, قازاقستان)
ماريامگۇل تولەگەنوۆا اتىنداعى ء«ۇمىت» سىيلىعىن يەلەنگەندەر:
جويان يۋ (قىتاي)
كونكۋرستىڭ ۇزدىك كونتسەرتمەيستەرى اتانعاندار:
ۆيكتوريا يۆانوۆا – رەسەي
ءزارۋ جازىقباەۆا – قازاقستان
الماتى